Krakkablak, ný íþróttagrein á Hornafirði
Blakdeild Sindra
Mikilvægi þess að stunda holla og góða hreyfingu verður seint ofmetið. Fjölbreytt framboð íþróttagreina er mikilvægt til að auka líkurnar á að fleiri finni íþróttagrein við sitt hæfi. Því er því ánægjulegt að geta sagt frá því að nú eru að hefjast æfingar á nýrri íþróttagrein hér á Hornafirði. Þessi nýja grein er blaklíkur leikur sem nefnist krakkablak (Kidsvolley). Hér er á ferðinni byltingarkennd aðferð við að kenna blak í yngstu aldurshópunum og einnig eldri byrjendum. Hingað til hefur verið talið vonlítið að byrja að kenna krökkum blak fyrr en við 10-12 ára aldurinn vegna þess hversu tæknilega erfið íþróttin er.
Leikurinn er skemmtilegur, í honum er mikil hreyfing og fjör. Það skemmtilegasta er samt það, að það skiptir engu máli hvort iðkandinn ert nýbyrjaður að æfa eða hefur æft lengi, allir geta spilað krakkablak á fyrstu æfingu. Krakkablak er leikur sem tekur mið af hreyfifærni leikmanna og þróun í getu því að erfileikagráða tækniæfinga fer stighækkandi. Haldin eru Íslandsmót í krakkablaki og vonandi verður þess skammt að bíða að Sindri verði með lið þar. Blakæfingarnar verða í íþróttahúsinu á Höfn á þriðjudögum. Boðið verður upp á æfingar fyrir þrjú aldursstig:
- 6-8 ára, sem eiga tíma kl. 18:00
- 9-12 ára, sem eiga tíma kl. 18:50
- 13-16 ára, sem eiga tíma kl. 19:40
Þjálfari hefur verið ráðin Hulda Laxdal Hauksdóttir en hún er með íþróttakennarapróf og BS-gráðu í heilsuþjálfun. Blakdeild Sindra vonast til að hornfirskir krakkar taki þessum nýja valkosti vel og fjölmenni til þátttöku. Fyrstu tveir æfingatímarnir verða ókeypis.
Skrifa athugasemd