Úthlutun styrks til NEST
Fréttatilkynning:
Innan Norðurslóðaáætlunar Evrópusambandsins hefur verið samþykkt að styrkja verkefnið
NEST (Northern Environment for Sustainable Tourism; potential of national parks and protected areas for rural development in the northern periphery) sem Háskólasetrið á Hornafirði, Sveitarfélagið Hornafjörður, Skaftárhreppur og Þróunarstofa Austurlands eru aðilar að. NEST er fjölþjóðlegt samvinnuverkefni á milli Íslands, Finnlands, Svíþjóðar og Skotlands til þriggja ára. Heildarkostnaður við verkefnið er um 90 milljónir króna og íslenska þátttakan í verkefninu er 12 % af heildarkostnaði verkefnisins. Styrkveiting til íslenska hlutans er um sjö milljónir króna. Einnig greiða erlendu samstarfsaðilarnir fyrir stjórnun samstarfsverkefnisins sem er í umsjá Háskólasetursins á Hornafirði, en starf verkefnastjóra verður auglýst fljótlega.
Norðurslóðaáætlun ESB - Northern Periphery Programme (NPP) - er ætlað að stuðla að samstarfsverkefnum meðal svæða á norðlægum slóðum í Evrópu. Þátttökulönd í áætluninni eru norðurslóðir Finnlands, Svíþjóðar, Skotlands og Noregs, sem og Grænland, Færeyjar, Ísland og NV Rússland. Markmið NPP er samvinna þjóða við uppbyggingu jaðarsvæða norðurslóða. Áherslur verkefna eru þrenns konar, þ.e. 1) samgöngu- og fjarskiptamál, 2) atvinnuþróun og sjálfbær nýting náttúru og náttúruauðlinda og 3) efling samfélaga. Umsjón með NPP hér á landi er á höndum Byggðastofnunar.
NEST verkefnið tilheyrir lið tvö um atvinnuþróun og sjálfbæra nýtingu náttúru og náttúruauðlinda. Meginmarkmið NEST er að nýta til framþróunar þau tækifæri sem felast í búsetu nálægt þjóðgörðum og öðrum verndarsvæðum til uppbyggingar sjálfbærrar ferðamennsku með því að: i) efla tengslanet og samvinnu milli svæðanna; ii) efla tengslanet milli hinna ólíku hagsmunahópa; iii) greina og nýta vannýtta möguleika í ferðaþjónustu; iv) byggja upp og þróa fræðandi, sem og menningartengda ferðamennsku; v) vinna að skilgreiningu á ímynd og sérstöðu svæðanna m.t.t. markaðssetningar; vi) efla rannsóknir á umhverfisáhrifum ferðamennsku, þannig að hún samræmist viðkvæmri náttúru og lögmálum um sjálfbæra þróun.
Óhjákvæmilega hefur ferðamennska margvísleg áhrif á umhverfi og samfélag hvar svo sem hún er stunduð. Það er því eðlilegt að umhverfisáhrif hennar séu meira til umræðu nú en nokkru sinni fyrr. Á Norðurslóðum er náttúra landsins ein af meginstoðum ferðaþjónustunnar. Þessi meginstoð er viðkvæm, því er mikilvægt að allir sem standa að uppbyggingu ferðaþjónustu tileinki sér hugmyndafræði sjálfbærrar þróunar, þ.e.a.s. þróunar sem mætir þörfum nútímans án þess að ganga á möguleika framtíðarinnar. Sjálfbær ferðamennska hefur verið skilgreind sem nýting náttúruauðlinda vegna ferðamennsku þar sem efnahagslegur ávinningur til lengri tíma, stöðug náttúruvernd og framþróun byggðaar eru meginmarkmið. Þetta felur í sér að auðlindum er stjórnað með þeim hætti að efnahagslegum, félagslegum og fagurfræðilegum þörfum er fullnægt, á sama tíma og menning, náttúra og samfélag eru vernduð þannig að afkomendurnir fái notið þeirra, hvort sem þeir eru gestir, rekstraraðilar eða íbúar. Öflug og markviss ferðaþjónusta gefur ótal tækifæri á atvinnuuppbyggingu og atvinnusköpun jaðarsvæða. Þekkt er að virk samvinna fyrirtækja/landeigenda, rannsóknarstofnana og sveitarfélaga skilar jákvæðum árangri hvað þetta varðar.
Skrifa athugasemd