Lions gefur í söfnunina til kaupa á röntgenmyndavélabúnaði
Í gær (sunnudag) komu nokkrir félagar úr Lionsklúbbi Hornafjarðar á heilsugæslustöðina á Höfn og afhentu Guðrúnu Júlíu Jónsdóttur hjúkrunarforstjóra 300.000 kr. í söfnunina til kaupa á röntgenmyndavélabúnaði fyrir heilsugæslustöðina. Unnsteinn Guðmundsson afhenti Guðrúnu gjafabréfið og sagði þetta afrakstur kútmagakvölds hjá þeim Lionsmönnum fyrir stuttu, þetta hefði verið svona ,,karlrembukvöld?? hjá þeim. Guðrún þakkaði þeim félögum og öllum klúbbfélögunum þennan góða stuðning. Guðrún sagði að fleiri hefðu lagt þeim lið t.d.hefðu hjónin Halldóra Bergljót og Ágúst Þorbjörnsson gefið 250.000 kr, Útgerðarfélagið Sigurður Ólafsson 200.000 og Vís 75.000.
Með þessum framlögum í söfnunina eru komnar 9.125.000. kr. en heildarkostnaður er rúmar ellefu millj.kr. svo nú vantar bara herslumuninn. Gangi dæmið upp kemur myndavélabúnaðurinn í lok maí og þá verða Hornfirðingar miklum mun betur settir með heilsugæslubúnað á staðnum.
