Humarhátíð

Humarhátíð er haldin síðustu helgina í júní.

Upphaf Humarhátíðar á Hornafirði má rekja til frumkvæðis einstaklinga og fyrirtækja sem vildu að haldin yrði árleg bæjarhátíð á Hornafirði fyrir Hornfirðinga, brottflutta Hornfirðinga og gesti.

Hátíðin var fyrst haldin árið 1993 þá sá Sveitarfélagið Hornafjörður um framkvæmd hátíðarinnar fyrstu árin en síðar tóku félagasamtök við og hafa þau með virkri þátttöku verslana, veitingastaða og fyrirtækja á Hornafirði staðið að Humarhátíð. Hátíðin verið haldin undir merkjum humars enda Höfn verið þekkt fyrir veiðar og vinnslu á humri.


Á aldarafmæli byggðar á Höfn árið 1997 var stærsta Humarhátíð sem haldin hefur verið en þá heimsóttu Hornafjörð um fjögur þúsund gestir. Hátíðin hefur fest sig í sessi og er orðin miðpunktur sumars á Hornafirði og eru þeir margir sem ekki sleppa úr einni einustu hátíð.

Hátíðin hefur skapað sér sess í bæjarhátíðum landsins og taka íbúar þátt með því að skreyta bæinn með appelsínugulum skreytingum og sumir hafa tekið upp á að bjóða upp á humarsúpu á lóðum sínum. Reynt er að hafa dagskrá við allra hæfi, félagasamtök, íbúar og fyrirtæki eru hvött til að taka þátt og vera með viðburði á Humarhátíð.