Það er óhætt að stórauka þorskveiðar
Grétar Mar Jónsson 1. sæti Frjálslynda Flokknum Suðurkjördæmi skrifar:
Við verðum að endurreisa atvinnulífið, auka verðmætasköpun. Þetta eru brýnustu verkefnin á komandi árum og leiðin til þess að komast út úr kreppunni. Lykilatriðið í uppbyggingunni er að sjálfsögðu greiður aðgangur að lánsfé á hagstæðum kjörum, ekki síst til smárra og meðalstórra fyrirtækja því slík fyrirtæki skapa flest störf og verðmæti þegar allt er talið.
Tækifærin liggja víða og það er hlutverk stjórnmálamanna að skapa hagstæð skilyrði til þess að hægt sé að nýta þau, en alls ekki standa í veg fyrir skynsamlegi nýtingu náttúruauðlynda eins og sumir stjórnmálamenn vilja gera.
Við í Frjálslyndaflokknum höfum lagt fram stefnu okkar um atvinnuuppbygginguna í mörgum tillögum. Það er bráðnauðsynlegt að stórauka útflutningstekjurnar og til þess verður að nýta náttúruauðlindir okkar til lands og sjávar.
Varðandi okkar mikilvægustu útflutningsgrein þá hefur núverandi fiskveiðikerfi engum árangri skilað heldur aðeins valdið skaða á þeim aldarfjórðungi sem kerfið hefur verið við lýði. Vegna kvótabraksins og þess gríðarlega fjármagns sem runnið hefur út úr greininni er útgerðin á kafi í skuldum. Flestum er nú orðið ljóst að sú allsherjar græðgisvæðing sem ríkt hefur í þjóðfélaginu undanfarin ár og orsakaði þá kreppu sem þjóðin er nú í, átti upphaf sitt í sölu á fiskveiðiréttindum fyrir stórfé. Samkvæmt úrskurði Mannréttindadómstóls Sameinuðu þjóðanna brýtur kvótakerfið gegn mannréttindum borgaranna og er því ólöglegt en þann úrskurð hafa íslensk stjórnvöld hunsað hingað til.
Frjálslyndi flokkurinn lýsir andúð á slíkum vinnubrögðum og gerir kröfur um tafarlausar breytingar. Flokkurinn hefur frá upphafi boðað gjörbreytta fiskveiðistefnu, ábyrga stefnu, sem virðir mannréttindi borgaranna.
Sem fyrsta skref viljum við opna kerfið neðan frá með því að leyfa frjálsar handfæraveiðar með almennum skilyrðum. Þetta er mjög hófsöm og sjálfsögð breyting sem við höfum í mörg ár flutt tillögur um á Alþingi án þess að fá stuðning frá öðrum flokkum.
Skipsstjórnarmenn með mikla reynslu og þekkingu á fiskimiðinum hafa alltaf haft miklar efasemdir um aðferðir Hafrannsóknarstofnunar og þær forsendur sem notaðar eru við mælingar og útreikninga á stofnstærð fiskistofna.
Þeir telja ástand þorskstofnsins nú miklu betra en niðurstöður Hafró gefa til kynna, enda algjörlega á skjön við þá fiskgengd sem sjómenn upplifa á miðunum.
Nú þegar brýnt er að auka útflutningstekjurnar leggjum við í Frjálslyndaflokknum til að þorskveiðar verði auknar um 100 þúsund tonn á ári a.m.k. næstu tvö þrjú árin.
Þetta er ekki óábyrg tillaga heldur þvert á móti, því tillagan byggist á miklum upplýsingum reyndra skipsstjórnarmanna um allt land sem flokksmenn hafa aflað sér, um mikla þorskgengd á fiskimiðunum allt umhverfis landið.
Það verður að stokka algjörlega upp aðferðarfræði Hafró og taka upp mikla meira samráð við okkar reyndustu skipstjórnarmenn. Verði þetta ekki gert er hætt við að það kreppuástand sem ríkt hefur í þorskveiðunum undanfarin aldarfjórðung vari áfram og jafnvel til eilífðar.
Við gætum allt eins átt von á niðurstöðu um “ofmat” á næsta ári. Það væri aðeins í samræmi við fyrri reynslu af störfum Hafró.
Þjóðin hefur ekki efni á slíkum vinnubrögðum. Það er nú komið og þörfin fyrir breytingar er nú nauðsynlegri en nokkru sinni. Við getum aukið þorskveiðarnar verulega nú , án nokkurrar áhættu.
Höfundur: Grétar Mar Jónsson, þingmaður sem skipar 1. sæti í Suðurkjördæmi
Skrifa athugasemd