Fundargerð Félagsmálaráðs 96

96. Fundur

Fundur haldinn í félagsmálaráði Hornafjarðar í ráðhúsi þriðjudaginn 26. ágúst. 2003, kl 16.10.


Mætt voru: Þorbjörg Helgadóttir, Jónína Sigurjónsdóttir, Guðmundur Ingi Sigbjörnsson, Margret Jóhannesdóttir, Sigurbjörg Karlsdóttir og Birgir Þ. Kjartansson


1. Einstaklingsmál

Sjá trúnaðarbók.


2. Önnur mál

Þjónusta félagssviðs við íbúa í Suðursveit og Öræfum.
Félagsmálastjóri greindi frá ferðum og viðveru í Hofgarði og Hrollaugsstöðum á síðasta vetri. Þar var félagsmálastjóri til viðtals, einu sinni í mánuði.

Þessi viðvera hans rædd töluvert og telur félagsmálaráð fulla þörf á að halda þessari þjónustu áfram með svipuðu sniði þar sem hún hefur verið töluvert notuð.

Félagsmálastjóri greindi frá bréfi sem fræðslu-og félagssvið sendi foreldrum barna í 7. til 10.bekk, Hafnar og Heppuskóla. Í bréfinu er lögð áhersla á að foreldrar og börn þeirra virði reglur um útivist.

Þorbjörg Helgadóttir vekur athygli á því að skemmtanahald í Þrykkjunni standi fram yfir löglegan útivistartíma unglinga í 8.-10. bekk, þ.e.a.s. á föstudagskvöldum. Þorbjörg telur gæta misræmis í því að verið sé að brýna fyrir foreldrum að halda löglegan útivistartíma, en félagsmiðstöðin stuðlar að því að þessar reglur séu brotnar.

-----------------------------------------------------

Til foreldra barna í 7. til 10. bekk

Ágætu foreldrar / forráðamenn

Um leið og við óskum ykkur og börnum ykkar velfarnaðar á komandi skólaári, vekjum við athygli á eftirfarandi.

Ef við viljum búa börn okkar vel undir lífið þá er mikilvægt að þau venjist því frá unga aldri að samfélagið setur þegnum sínum ýmsar reglur og skyldur.
Allflestir foreldrar sjá til þess að þeirra börn virði útivistarreglur. Líkja má þeim við umferðarreglur, því fleiri sem virða þær þeim mun auðveldara ganga hlutirnir fyrir sig. Útivistarreglur eru settar til verndar börnum okkar. Samstaða okkar getur skipt sköpum um hvernig til tekst með velferð þeirra. Markmið okkar er að draga úr ótímabærri áfengis- og fíkniefnaneyslu, andlegri og félagslegri vanrækslu og vandkvæðum. Ef við tökum höndum saman og virðum skynsamlegar reglur minnkar hættan á alls konar uppákomum og óhöppum.

Það er eðlilegt að börn okkar gleðjist með vinum sínum. Hins vegar er það ljóst að einhver ungmenni munu telja þær samverustundir innihaldsmeiri ef þau drekka áfengi. Við hvetjum því foreldra til að fylgjast með börnum sínum og fyrirbyggja þannig hugsanleg vandræði þeirra. Höfum hugfast að því yngri sem unglingar eru þegar þeir hefja áfengisneyslu aukast líkurnar á að þeir lendi í alvarlegum vanda eða leiðist út í neyslu annarra fíkniefna. Áfengisneysla er oftast fyrsta skref barna og unglinga í neyslu fíkniefna og því brýnt að koma í veg fyrir tilraunir þeirra á því sviði. Hins vegar má ekki gleyma því að sem betur fer velja margir unglingar að drekka ekki.

Við viljum að börn okkar njóti góðrar menntunar, heilbrigðs lífs, almennra lífsgæða
og verði síður fyrir áföllum og erfiðleikum í lífinu. Þar berum við foreldrar mesta ábyrgð.



Með bestu kveðjum,

Birgir Þ. Kjartansson, félagsmálastjóri

Haukur H. Þorvaldsson, æskulýðsfulltrúi

Stefán Ólafsson, framkvstjóri fræðslu- og félagssviðs

-----------------------------------------------------

Fundi slitið kl. 18:15


Jónína Sigurjónsdóttir
Þorbjörg Helgadóttir
Guðmundur Ingi Sigbjörnsson
Margret Jóhannesdóttir
Sigurbjörg Karlsdóttir

Birgir Þ. Kjartansson