Fundargerð menningarmálanefndar 66
Fundargerð 66. fundar
Menningarmálanefnd Hornafjarðar 66. fundur
FUNDARGERÐ
Fundur haldin í menningarmálanefnd í fundarsal Frumkvöðlaseturs í Nýheimum miðvikudaginn 9. mars kl. 16.00. Mætt voru: Hermann Hansson, Ari Hannesson, Bryndís Hólmarsdóttir, Ágústína Halldórsdóttir og Guðlag Hestnes.
Gengið var til dagskrár og eftirfarandi tekið fyrir:
1. Fundargerð síðasta fundar Lögð fram fundargerð 65. fundar frá 7. febrúar til kynningar.
2. Hugmyndir um samstarf Menningarmiðstöðvar og Framhaldsskólans um eflingu á afþreyingu og menningarstarfi fyrir ungt fólk
(Eyjólfur Guðmundsson skólameistari FAS mætti á fundinn undir þessum lið). Eyjólfur gerði grein fyrir samstarfi menningarmiðstöðvar og Framhaldsskólans og fór meðal annars yfir ÚFFF verkefnið. Hann taldi brýna þörf á uppbyggingu afþreyingar fyrir ungt fólk, ekki aðeins innan FAS heldur einnig samfélagið í heild. Kom fram að útfærsla að slíku samstarfi sé ekki fullmótuð. Töluverðar umræður sköpuðust í kjölfarið og kom meðal annars fram sjónarmið að ekki megi drepa niður frumkvæði nemenda FAS og ungs fólks í félagsstarfi. Kom fram að þetta fyrirhugaða samstarf sé í því fólgið að styðja við en ekki stýra menningarstarfi og afþreyingu fyrir ungt fólk. Nefndarmenn voru undantekningalaust hrifnir af hugmyndinni og töldu brýnt að efla afþreyingu og menningarstarf fyrir ungt fólk í byggðarlaginu.
Nefndin felur forstöðumanni að vinna að nánari útfærslu og leggja fyrir nefndina þegar þeirri vinnu er lokið.
3. Greinargerð um stefnumótun í menningar- og safnamálum
Lögð fram ódagsett greinargerð. Greinargerðin er framhaldsvinna frá síðasta fundi. Rætt um hvernig best er að standa að endurskoðun stefnunnar. Ákveðið að halda vinnufund með aðal- og varamönnum í menningarmálanefnd þann 8. apríl frá 14.00-18.00.
4. Jöklasýning
Gerð var grein fyrir stöðu málsins. Kom fram að góður skriður sé á málinu, hönnun sé lokið og fyrstu drög að kostnaðaráætlun liggi fyrir. Þá kom fram að fjármögnun sé ekki lokið en á góðum rekspöl. Einnig kom fram að framkvæmdir við húsnæði séu hafnar og leitað hafi verið eftir tilboðum heimamanna eins og kostur er.
5. Starf upplýsinga- og menningarfulltrúa
Gerð grein fyrir málinu. Kom fram að þeir verkþættir sem falli undir þennan starfsmann séu umsjón með Jöklasýningu, umsjón með upplýsingamiðstöð, umsjón með kynningarstarfi á vegum sveitarfélagsins, umsjón með menningarviðburðum á vegum sveitarfélagsins, Listasafni Austur-Skaftafellssýslu ásamt fleiru.
Samþykkt að starfið verði auglýst.
6. Samningur ríkisins við sveitarfélög á Austurlandi um menningarmál
Gerð grein fyrir málinu.
7. Auglýsing um verkefnastyrki til menningarstarfs á Austurlandi
Kom fram að mikilvægt sé að hvetja aðila í samfélaginu að sækja um styrki og einnig að starfsmenn Menningarmiðstöðvar hafi augun opin um að sækja um styrki í verkefni á vegum Menningarmiðstöðvar.
8. Önnur mál
Guðlaug spurði um hvernig vinnu vegna öryggismála safna miðaði. Kom fram að framkvæmdir séu fyrirhugaðar á næstunni Ágústína spurði um heimsókn Menningarmálanefndar Djúpavogs. Kom fram að haft hafi verið samband og hvatt til þess að af heimsókninni yrði. Sú beiðni verður ítrekuð. Hermann spurði um framkvæmdir við Sindrabæ og Mánagarð. Kom fram að framkvæmdir við Sindrabæ séu vel á veg komnar en styttra í Mánagarði.
Fleira ekki gert, fundi slitið kl. 17.30
