Fundargerð Skólanefndar 58

58. fundur

Fundur haldinn í ráðhúsinu, þriðjudaginn 17. febrúar 2004 kl. 16:10

Mætt voru: Sigríður Kristinsdóttir, Bryndís Hólmarsdóttir, Elín Magnúsdóttir, Ólöf Þórhalla Magnúsdóttir, Valdís Kjartansdóttir, Guðmundur Ingi Sigbjörnsson, Sævar Þór Gylfason og Stefán Ólafsson.

Gengið var til dagskrár og eftirfarandi tekið fyrir:

1. Fundargerð 57. fundar
Engar athugasemdir gerðar.

2. Leikskólinn Óli prik – ákvörðun um framtíð
Samkvæmt upplýsingum leikskólastjóra eru 11 börn í skólanum í dag. Hefur staðan verið nánast óbreytt þetta skólaár. Eins og áður hefur komið fram og samþykkt var á fundi skólanefndar þann 17. september 2003, er skólinn nú einungis opinn eftir hádegi, þ.e. frá klukkan 13 - 17. Á fundi sínum þann 5. febrúar sl. samþykkti bæjarráð eftirfarandi bókun undir þeim lið þar sem rætt var um framtíð leikskólans Óla priks: „Í samræmi við þá stefnu sem fram kom við afgreiðslu fjárhagsáætlunar fyrir árið 2004 samþykkir bæjarráð að vísa ákvörðun um framtíð leikskólans til umfjöllunar í skólanefnd.”
Frá árinu 1998 – 2003 hefur orðið veruleg fækkun í hópi yngstu árganga í sveitarfélaginu, þ.e. aldurshópnum á 1. ári til 5 ára. Er þessi fækkun um 20% á þessu tímabili.

1998 1999 2000 2001 2002 2003
258 börn 248 börn 242 börn 222 börn 217 börn 206 börn

Í ársbyrjun 2001 var leikskólinn Krakkakot tekinn í notkun. Við það fjölgaði leikskólaplássum verulega. Fyrsta ár þessa nýja leikskóla var nýting góð en hefur síðan dregið úr henni. Er nú svo komið að í leikskólum sveitarfélagsins eru alltaf laus pláss. Við þær aðstæður er rökrétt að nýta þá leikskóla þar sem aðstæður eru bestar, bæði hvað varðar húsnæði og uppeldisaðstæður. Í reglum sveitarfélagsins um leikskóla segir: „Öll börn tveggja ára og eldri skulu eiga kost á leikskólavist og hafa þau forgang um vistun. Séu laus pláss eftir að öllum umsóknum úr þeim aldurshópi hefur verið sinnt geta börn allt niður í eins árs aldur fengið leikskólapláss.” Þrátt fyrir að leikskólaplássum fækki lítillega mun þetta markmið reglnanna nást enda fækkun barna á leikskólaaldri veruleg. Skólanefnd leggur því til við sveitarstjórn að leikskólanum Óla priki verði lokað við lok þessa skólaárs um miðjan júlí. Um leið leggur skólanefnd áherslu á að viðkomandi börnum verði tryggð leikskólapláss í leikskólunum á Höfn.

3. Úttekt á sjálfsmatsaðferðum grunnskólanna
Farið yfir útsend gögn frá menntamálaráðuneytinu. Úttektirnar voru unnar af Rannsóknarþjónustu Kennaraháskóla Íslands síðastliðið haust og birta þær stöðu hvers skóla fyrir sig. Fram kemur að skólarnir í þéttbýlinu eru lengra á veg komnir í að innleiða sjálfsmatsaðferðir en dreifbýlisskólarnir tveir. Fram kom í máli Guðmundar Inga að vinna við sjálfsmatsaðferðir væri stöðug og lyki í reynd aldrei. Bætti hann við að þetta væri tímfrek vinna og vandasöm.

4. Skýrsla Rannsókna og greiningar um vímuefnaneyslu ungs fólks á Hornafirði
Skýrslan birtir helstu niðurstöður rannsókna meðal nemenda í 8., 9. og 10. bekk á Hornafirði 1997 til 2003. Gögnin sem þessi skýrsla byggir á eru fengin úr viðamiklum könnununum Rannsókna & greiningar sem lagðar voru fyrir nemendur í 8., 9. og 10. bekkjum grunnskóla á Íslandi á árunum 1997 – 2003. Því er ekki um hefðbundnar úrtakskannanir að ræða heldur hafa þær verið lagðar fyrir alla nemendur þessara bekkja sem mættir eru í skólann á þeim tíma sem könnunin er lögð fyrir. Skýrslan á því að endurspegla vel stöðu mála. Staða hornfirskra ungmenna er ekki nógu góð þegar þeir eru bornir saman við jafnaldra á Íslandi. Einkum er áberandi hvað staðan í reykingum og áfengisnotkun er verri hjá nemendum í 10. bekk grunnskóla á Hornafirði en hjá öðrum jafnöldrum þeirra síðastliðin tvö ár, þ.e. árin 2002 og 2003.

5. Önnur mál

• Sigríður greindi frá fyrirspurnum sem hún hafði fengið frá foreldrum um fjölda samræmdra prófa sem nemendur þyrftu að taka til að komast inn í hina ýmsu framhaldsskóla. Guðmundur fór yfir ráðleggingar Heppuskóla til nemenda sinna í þessu sambandi. Greindi hann m.a. frá fundum með nemendum í 10. bekk um inntökuskilyrði í framhaldsskóla og ráðleggingum sem nemendur fá strax í 8. bekk. Einnig var farið yfir reglugerð um innritun nemenda í framhaldsskóla og skilyrða um fjölda samræmdra prófa til að geta innritast inn á mismunandi brautir. (Guðmundur Ingi og Sævar sátu fundinn undir liðum 3, 4 og 5.1 og yfirgáfu fundinn eftir þennan lið)
• Gerð grein fyrir bréfi menntamálaráðuneytisins um samræmd próf 2. – 10. maí 2005. Prófað verður í íslensku, ensku, dönsku, samfélagsgreinum, náttúrufræði og stærðfræði.
• Skipan eins fulltrúa í þriggja manna nefnd samkvæmt ákvörðun bæjarráðs þann 5. febrúar sl. Skal nefndin skila tillögum um fyrirkomulag mötuneytismála í skólum. Skólanefnd skipar Sigríði Kristinsdóttur sem sinn fulltrúa.
• Frí vegna ferðalaga starfsmanna skóla á starfstíma þeirra. Stefán gerði grein fyrir svörum stjórnenda við fyrirspurn um frí starfsmanna vegna fyrirhugaðrar ferðar eins af kórunum í sveitarfélaginu í lok apríl.
• Greint frá fyrirhugaðri UT2004 – ráðstefnu um upplýsingatækni í skólastarfi dagana 5. – 6. mars nk.
• Einstaklingsmál fært í trúnaðarbók. (Einungis skólanefndarmenn og starfsmaður nefndarinnar viðstaddir umræðu um þennan lið.)


Fundi slitið kl.19:30