Fundargerð Skólanefndar

43. fundur

Fundur haldinn í ráðhúsinu, miðvikudaginn 16. október 2002 kl. 17.10



Mætt voru: Sigríður Kristinsdóttir, Bryndís Hólmarsdóttir, Elín Magnúsdóttir, Aðalheiður Björnsdóttir, Valdís Kjartansdóttir, Guðmundur Ingi Sigbjörnsson og Stefán Ólafsson.





Gengið var til dagskrár og eftirfarandi tekið fyrir:





1. Fundargerð 42. fundar

Engar athugasemdir.



2. Lengd viðvera – staða mála

Fram kom að sótt hefði verið um vistun fyrir fjögur börn í lengdri viðveru, tvö í þrjá daga og tvö í einn dag. Stefán sagðist ekki geta mælt með því að hefja starfsemi með svo fá börn. Það væri ekki heppilegt barnanna vegna, reynslan af starfi með svo fá börn væri ekki góð. Þá myndi gjald vegna vistunar aðeins duga fyrir um fjórðungi útgjalda.

Skólanefnd sammála því að boðið verði upp á lengda viðveru á þessu skólaári. Vísar nefndin því til starfsmanns nefndarinnar að vinna áfram að undirbúningi málsins. (Elín sat hjá við afgreiðslu þessa máls.)

Undir þessum lið var einnig rætt um akstur með yngstu börnin heim strax að loknum skóla.



3. Bréf foreldraráðs Hafnarskóla – verð á skólamáltíðum

Stefán lagði fram minnisblað, dagsett 16.10.02, sem sýnir mismunandi kostnað sveitarfélagsins ef til niðurgreiðslna á matarbökkum kæmi. Samkvæmt þeim útreikningum gæti kostnaðurinn legið á bilinu frá um 800.000 krónum á skólaári til um 6.000.000. Færi kostnaðurinn eftir upphæð til hvers og eins og eftir fjölda þeirra sem niðurgreiðslna nytu. Ákveðið hefði verið af bæjaryfirvöldum að fara útboðsleiðina fyrir þetta skólaár og engar yfirlýsingar um niðurgreiðslur verið gefnar.
Rætt var um hvort hægt væri að hafa eitt mötuneyti fyrir grunnskólana og leikskólana og hugsanlega lækka þannig kostnað við matarskammta. (Elín vék af fundi.) Guðmundur greindi frá ánægju í Heppuskóla með þann mat sem er í boði og sagði hann hafa góð áhrif á lífið í skólanum. Hann velti því og upp hvort niðurgreiðsla á mat væri meira forgangsmál en ýmis önnur sem lúta að skólahaldi.

Skólanefnd því sammála að niðurgreiðsla á mat sé ekki óeðlileg krafa en vísar málinu að öru leyti til bæjarráðs.



4. Önnur mál

· Rætt um sundkennslu í skólum. Samkvæmt upplýsingum skólastjóra Heppuskóla fá nemendur 8. bekkjar ekki þá sundkennslu sem þeim ber samkvæmt reglugerð um sundnám í grunnskóla. Þetta stafar m.a. af því að skólinn fær ekki nægan tíma í sundlauginni þannig að hægt sé að uppfylla þessar skyldur. Ekki hefur komið fram að aðrir skólar nái ekki fullri kennslu í sundi. Einnig var rætt um nauðsyn þess að kynjaskipta í sundi. Skólanefnd leggur áherslu á að reglugerð um sundkennslu verði uppfyllt í öllum skólum sveitarfélagsins.

· Rætt um námskeið fyrir skólanefndarmenn en ekki varð af þátttöku Hornfirðinga í námskeiði sem haldið var með notkun fjarfundarbúnaðar þann 13. okt. sl. Ákveðið að reyna að fá þetta námskeið.

· Guðmundur lagði áherslu á viðhaldsmál í Heppuskóla og minnti í leiðinni á 30 ára starfsafmæli skólans. Bauð hann skólanefndinni í heimsókn. Einnig ræddi hann eineltisverkefni í Heppuskóla o. fl.







Fundi slitið kl. 19:45