Fundargerð skólanefndar 86

86. fundur

Mætt voru:     Elín Magnúsdóttir, Gísli Már Vilhjálmsson, Anna María Ríkharðsdóttir, Torfi Friðfinnsson, Sigríður Kristinsdóttir, Margrét Ingólfsdóttir, Matthildur Ásmundardóttir, Snæfríður Svavarsdóttir, Guðlaug Úlfarsdóttir,  Þorvaldur J. Viktorsson og Stefán Ólafsson.

 Gengið var til dagskrár og eftirfarandi tekið fyrir:

1. Fundargerð 85. fundar

Engar athugasemdir gerðar

 2. Reglur um leikskóla – framhaldsumræða frá 85. fundi skólanefndar

Tekið fyrir bréf frá Margréti Ingólfsdóttur, dagsett 9. október 2006. Í bréfinu er farið yfir starfsemi leikskólans og um leið velt upp spurningunni hvort allir foreldrar eigi að hafa val um skólatíma sem hentar hverjum og einum best og skólinn sníði starf sitt að þeim óskum.

Könnun foreldrafélags leikskólanna: Foreldrum 100 leikskólabarna og 22 barna sem eru á leikskólaaldri og ekki komin í leikskóla voru afhentir listar þar sem spurt var um óskir foreldra um skólatíma, þ.e. upphafstíma og lok á skólatíma. Samtals bárust 63 svör. Þar kemur eftirfarandi fram:

Ósk um að skólatími hefjist kl.                           Ósk um að skólatíma ljúki kl.

8:00                 37                                                        12:00               11

9:00                 11                                                        13:00               3                     

10:00               4                                                          14:00               18

11:00               6                                                          15:00               2

12:00               1                                                          16:00               13

13:00               4                                                          17:00               16

Sigríður hóf umræðuna og sagðist vilja að boðið verði upp á einn skólatíma til viðbótar við þá sem eru í fyrirliggjandi drögum að nýjum reglum, þ.e. skólatíma sem hæfist kl. 11. Einnig sagði hún að 3 foreldrar hafi verið með börn á skólatíma sem byrjaði kl. 11 þegar núgildandi reglur voru settar 2004. Sá tími hafi hins vegar verið aflagður í núgildandi reglum. Einnig lagði hún áherslu að foreldrar ættu að geta verið sem mest með börnum sínum og tilboð um skólatíma þurfi að vera í samræmi við það.  Lagði hún fram þá tillögu að annar leikskólinn bjóði upp á skólatíma sem hefjist kl. 11:00 og sé fram eftir degi. Gísli taldi kjörna fulltrúa ekki eiga að vera að skipta sér af innra starfi leikskólanna. Sagði hann upphafstíma að morgni og lokunartíma síðdegis eigi að ákveða í reglum en annað verði ákveðið af leikskólunum. Sigríður sagði það vera eitt af meginhlutverkum skólanefndar að fjalla um innra starf skólanna en gat verið því sammála að ákvörðun um skólatíma væri á hendi leikskólanna. Undir þessa hugmynd Gísla um skólatíma tóku Torfi og Anna María. Margrét ræddi könnun foreldrafélagsins, sagði hana góðar gjalda verða en í hana vanti ýmislegt. Margrét sagði umræðu um skólatíma of fyrirferðamikla, lítið rætt um annað í skólanefndinni þegar málefni leikskólanna væru til umfjöllunar. Þetta pirraði starfsfólk leikskólanna. Tók hún undir orð Gísla um skólatíma. Sigríður lagði áherslu á að ná þurfi ákveðnu jafnvægi þegar kemur að skólatímum og mikilvægt að koma til móts við óskir foreldra. Formaður bar tillögu að nýjum reglum upp til atkvæðagreiðslu. Þær voru samþykktar samhljóða með þeim breytingum að kaflinn Greiðslur og skólatímar verður svohljóðandi: Skóli hefst kl. 7:45 og lýkur 17:15. Greiðslur miðast við fjölda klukkustunda og brot úr klukkustund sem barn dvelur í leikskóla. Að öðru leyti er upphaf og lok skólatíma ákvarðað af leikskólunum. Skulu skólatímar liggja fyrir í upphafi hvers skólaárs. Einnig verður breyting á kaflanum Opnunartími sem hljóðar svo: Leikskólarnir starfa 5 virka daga í viku frá klukkan 7:45 – 17:15.

Sigríður dró sína tillögu til baka áður en atkvæði voru greidd.

(Guðlaug vék af fundi áður en þessum dagskrárlið lauk)

 3. Útdeiling á fjármagni til foreldrastarfs í skólum sveitarfélagsins

Á fjárhagsáætlun 2006 er áætlað að verja samtals krónum 300 þús. til foreldrastarfs í skólum sveitarfélagsins. Áætlað var að sótt yrði um þetta fé og því útdeilt af skólanefnd. Til þessa hefur engin formleg umsókn borist en nýlega barst fyrirspurn frá foreldrafélagi leikskólanna um útdeilingu þessa fjár. Samþykkt að senda öllum foreldrafélögunum bréf og benda þeim á að sækja um fyrir 1. desember nk. fé til foreldrastafs. Fram komi í umsókn til hvers þessu fé skal varið.

Einnig rædd undir þessum lið hugmynd foreldrafélags leikskólanna um að halda svonefnt SOS–námskeið og hugsanlega styrki til þess.

 4. Fjárhagsáætlun 2007

Farið yfir útsend gögn og óskir forstöðumanna (afhent á fundinum) um fjármagn til stofnbúnaðarkaupa. Sigríður gerði að umtalsefni bókfærðan rekstur vegna Framhalds-skólans (reiknuð leiga á hlut sveitarfélagsins í Framhaldsskólanum) sem hún taldi ekki eiga að vera bókfærðan á liðnum 04, fræðslu- og uppeldismál þar sem skólarnir leigja ekki aðstöð í Nýheimum eða Framhaldsskólanum.

 5. Mötuneytismál

Tekið fyrir bréf Þórgunnar Torfadóttur, skólastjóra í Hafnarskóla, dagsett 31. okt. 2006. Í bréfinu er lögð áhersla á að unnar matvörur eigi ekki vera á matseðli skólanna, að samræma þurfi matseðil allra leik- og grunnskóla, að matur berist of seint í Hafnarskóla, skiptar skoðanir séu um sæta eftirrétti sem stundum er boðið upp á og að alltaf heyrist þær raddir að maturinn sé of dýr.   Á yfirstandandi matartímabili kaupa  69 af 126 nemendum í Heppuskóla mat frá Kaffihorninu og 75 af 144 nemendum Hafnarskóla. Skólanefnd felur starfsmanni nefndarinnar að ræða við starfsmenn mötuneytanna og fara yfir þessi mál. Einnig lagt til að matseðlar verði yfirfarnir af Lýðheilsustöð. Það hefur áður verið reynt en ekkert svar fengist frá stofnuninni. Fram kom að viðhorf kennara til þess sem er á boðstólum skipti miklu máli þegar kemur að matarmálum. Gísli fagnaði umræðunni. Sagði hann unnar kjötvörur eigi að vera undantekning þó að sumt í þeim flokki sé í góðu lagi. Sagði hann og þetta vera erfiðan markhóp. Hann sagði að gæði matarins í Hafnar- og Heppuskóla séu nú mun meiri en sl. skólaár.

 6. Önnur mál

·        Ánægjuleg tíðindi úr Hafnarskóla og Heppuskóla   Hafnarskóli hefur verið útnefndur „nýsköpunarskóli ársins” þetta árið, vinna við Legókeppnina í báðum skólum í fullum gangi og ánægjulegt frumkvöðlanámskeið í Heppuskóla að baki. Einnig er staða nemenda Heppuskóla þannig að skólinn er reyklaus og staða nemenda að öðru leyti góð. Skólanefnd gleðst yfir góðum árangri og fréttum af nemendum skólanna. Skólanefnd samþykkir af þessu tilefni að fela starfsmanni nefndarinnar í samráði við skólastjórnendur Hafnar- og Heppuskóla að umbuna nemendum fyrir góðan árangur og góða stöðu. 

·        Endurskoðuð aðalnámskrá grunnskóla í upplýsinga- og tæknimennt Greint frá því að sú breyting hafi orðið á aðalnámskrá grunnskóla í upplýsinga- og tæknimennt frá 1999 að námskrá í hönnun og smíði fyrir grunnskóla hefur verið felld út úr námskránni og gerð að sérstakri námskrá (sjá www.namsskipan.is)  

·        Dagur íslenskrar tungu 16. nóvember  Að venju er haldið upp á þennan dag ár hvert á fæðingardegi Jónasar Hallgrímssonar (sjá http://mrn.stjr.is/malaflokkar/Menning/dit/ ).

·        Bréf People to People þar sem samtökin kynna samskiptakerfi á milli skóla og skólabekkja.

·        Framtíðarsýn í málefnum grunnskólans – ný grunnskólalög  Menntamála-ráðuneytið heldur laugardaginn 25. nóvember nk. málþing á Hótel Nordica í Reykjavík frá kl. 9:30 – 13:00 um framtíðarsýn í málefnum grunnskólans og ný grunnskólalög. Samþykkt að starfsmaður nefndarinnar fari á þingið. Spurt hvort ekki sé hægt að senda þetta málþing út í fjarfundi.

·        Skólastefna sveitarfélagsins   Formaður greindi frá stöðunni og næstu skrefum.

       Fundi slitið kl. 19:05

Ekki tókst að undirrita fundargerðina í fundarlok.

Fundargerð samþykkt í tölvupósti.