Fundargerð skólanefndar 122

122. fundur

Fundur haldinn      í skólanefnd Hornafjarðar miðvikudaginn 24. febrúar 2010 kl. 17:00 í ráðhúsi Hornafjarðar.  

 Mætt voru:     Gunnar Sigurjónsson formaður, Gísli Vilhjálmsson, Anna María Ríkharðsdóttir, Sigríður Kristinsdóttir, Torfi Friðfinnsson, Sædís Guðmundsdóttir, Þorvaldur J. Viktorsson og Stefán Ólafsson.          

Gengið var til dagskrár og eftirfarandi tekið fyrir:

1.      Fundargerð 121. fundar

Engar athugasemdir gerðar.

2.      Skólastjóri Grunnskóla Hornafjarðar segir starfi sínu lausu

Í bréfi, dags. 10. febrúar 2010, segir Þorvaldur Viktorsson starfi sínu sem skólastjóri Grunnskóla Hornafjarðar lausu. Sigríður sagði að nú þurfi að horfa á stjórnun grunnskólans í samhengi við þær breytingar sem átt hafa sér stað í Grunnskóla Hornafjarðar. Sagði hún það ekki vera í sínum huga næsta skref að ráða skólastjóra heldur aðstoðarskólastjóra. Lagði hins vegar áherslu á að hún væri mjög sátt við störf núverandi skólastjórnenda. Þá benti hún á að með slíkri breytingu mætti spara þar sem aðstoðarskólastjóri væri lægra launaður en skólastjóri sem væri í samræmi við það sjónarmið sveitarfélagsins að draga úr kostnaði. Sædís, fulltrúi kennara sagði að hennar samskipti væru við þann skólastjóra sem er í því húsi sem hún starfar. Sagði það sitt álit og margra annarra kennara að mikilvægt væri að hafa skólastjóra í hvorri aðalbyggingu, stjórnanda sem hefði fullt umboð til að taka ákvarðanir. Gísli sagði að spurningin snerist um hið faglega starf. Velti upp spurningunni hvort skólastjórinn hefði tækifæri til að fara á milli bygginga og á hvað það kallaði. Þá þyrfti skólastjóri að starfa yfir báðum byggingum. Það fyrirkomulag kallaði væntanlega á ráðningu annars millistjórnanda sem væri dýrara en að vera með tvo skólastjóra. Ráðning skólastjóra væri rökrétt til að tryggja gott skólastarf áfram. Anna María tók undir orð Gísla. Sigríður sagði að hún væri á öndverðum meiði við það sem fram hefur komið. Kominn væri tími til að stíga út úr þessum farvegi sem fyrirkomulag á stjórn grunnskólans er í og lagði áherslu á einn skólastjóra og aðstoðarskólastjóra. Sædís sagði að faglega séð gæti verið betra að hafa skólastjóra og aðstoðarskólastjóra. Gunnar sagðist hafa rætt við Þórgunni, skólastjóra grunnskólans. Sagði eftir henni að hún væri hlynnt því að hafa áfram tvo skólastjóra. Það hafi gefist vel og mikið starf væri enn eftir óunnið í skólanum í kjölfar allra þeirra breytinga sem átt hafa sér stað. Stefán greindi frá samskiptum við menntamálaráðuneyti og fyrirspurnum til þess vegna þessa máls sem og ýmsum kostnaðarútreikningum við mismunandi stjórnunarform. Þorvaldur svaraði fyrirspurnum um samstarf skólastjóranna og verkaskiptingu þeirra á milli.

Formaður skólanefndar lagði fram eftirfarandi bókun meirihluta skólanefndar:

Miklar breytingar hafa verið gerðar á skipulagi Grunnskóla Hornafjarðar á undanförnum árum.  Árið 2007 var grunnskólinn sameinaður undir eina stjórn og samhliða var stjórnendum í skólamálum fækkað úr sjö í fimm.  Árið 2009 var allt skólahald Grunnskóla Hornafjarðar flutt á Höfn.  Samhliða var stjórnunarstöðum fækkað úr fimm í þrjár.  Í núverandi skipulagi eru tveir skólastjórar sem staðsettir eru annars vegar í Hafnarskóla og hins vegar Heppuskóla og að auki einn deildarstjóri sem sinnir sérkennslu.

Mikilvægt er að starfsmenn, nemendur og foreldrar hafi greiðan aðgang að æðsta stjórnanda skólans og hann þarf að vera í góðum tengslum við alla þessa hópa.  Breytingar á núverandi skipulagi sem fælu í sér að við skólann starfaði einn skólastjóri og einn aðstoðarskólastjóri kölluðu á að skólastjórinn yrði að vera sýnilegur í báðum skólahúsum og þyrfti að byggja upp jafngóð tengsl við starfsfólk, nemendur og foreldra þeirra á báðum stöðum.  Augljóst er að skólastjóri þarf að eiga síðasta orðið með margar ákvarðanir sem varða daglegt starf skólans, um samskipti við nemendur og foreldra þeirra auk þess að skipuleggja allt skólastarfið.  Einn skólastjóri mun ekki anna því að hafa umsjón með daglegu skólahaldi í öðru skólahúsinu og jafnframt að hafa heildarumsjón með öllu skólahaldi.  Það er því rökrétt afleiðing af því að hafa einn skólastjóra að ráða þurfi tvo jafnháttsetta millistjórnendur yfir bæði skólahúsin. 

Meirihluti skólanefndar leggur því til óbreytt skipulag.  Auglýst verði eftir skólastjóra í stað þess sem nú hefur sagt upp störfum og myndi hann skólastjórn með þeim sem fyrir er.  Mikilvægt er að koma auglýsingaferlinu af stað sem fyrst með það fyrir augum að nýr starfsmaður geti tekið til starfa eigi síðar en í  júní næstkomandi og tekið fullan þátt í undirbúningi að skólastarfi fyrir skólaárið 2010-2011.

Sigríður sagðist ekki draga úr því að mikið álag hafi verið á stjórnendum grunnskólans og þar hafi verið unnið gott starf. Ítrekaði þó þá skoðun sín að farsælla væri fyrir skólann að vera með einn skólastjóra og einn aðstoðarskólastjóra. Gunnar sagðist skilja rök Sigríðar en hann byggði sína ákvörðun á samtölum við starfsmenn og fólk í samfélaginu.

Formaður bar bókun meirihlutans undir atkvæði og var hún samþykkt með fjórum atkvæðum einn sat hjá.

 3.      Fyrirkomulag innritunar nýnema í framhaldsskóla 2010

Farið yfir útsend gögn frá menntamálaráðuneytinu þar sem gerð er grein fyrir fyrirkomulagi á innritun nýnema fyrir næsta skólaár. Fram kemur í bréfi menntamálaráðuneytisins að innritun nýnema úr 10. bekk í framhalsskóla fyrir haustið 2010 verði í tvennu lagi þannig að nýnemar sæki um framhaldsskóla dagana 12. – 16. apríl. Þá eigi þeir að velja námsbraut og tvo skóla, aðal- og varaskóla. Að loknum skólaslitum í vor verði lokavitnisburður nemenda sendur til þess skóla sem þeir sóttu um sem fyrra val. Þá gefist nemendum einnig frestur til þess að endurskoða umsókn sína dagana 7. – 11. júní. Einnig kemur fram að nemendum í tilteknum grunnskólum verði tryggður forgangur að skólavist í ákveðnum framhaldsskólum með hliðsjón af nágrenni við skóla, hefðum og samgöngum. Innritun í framhaldsskóla er rafræn, þ.e. sótt er um skólavist á netinu, sjá http://www.menntagatt.is. Framhaldsskólar skilgreina sjálfir í samráði við menntamálaráðuneytið inntökuskilyrði á einstakar námsbrautir. Inntökuskilyrði verða birt í skólanámskrá á vefsíðu hvers framhaldsskóla. Þá upplýsti starfsmaður skólanefndar að fram hafi komið hjá fulltrúa menntamálaráðuneytisins á fundi starfsmanna skólaskrifstofa að nemendum verði áfram frjálst að velja þann skóla sem þeir helst vilja.

 4.      Lokahátíð Stóru upplestrarkeppninnar

Greint frá því að lokahátíð Stóru upplestrarkeppninnar fari fram í Hafnarkirkju þann 17. mars nk. kl. 14. Öllum sé frjálst að mæta á hátíðina.

5.      Opinn fundur skólanefndar um skólamál

Skólanefnd samþykkir að opinn fundur um skólamál verði haldinn í næsta mánuði. Samþykkt að fela starfsmanni skólanefndar að undirbúa fundinn í samráði við nefndarmenn.

6.      Önnur mál

Engin önnur mál borin fram.

Fundi slitið kl. 19:00