Fundargerð atvinnumálanefndar 6

6. fundur

Fundur haldinn í atvinnumálanefnd Hornafjarðar miðvikudaginn 5. mars 2003 kl. 17:00 í Ráðhúsi Hornafjarðar.

Mættir voru: Reynir Arnarsson, Sveinbjörn Imsland, Pálmi Guðmundsson, Björn Emil Traustason og Inga Jónsdóttir. Einnig Inga Jóna Halldórsdóttir.


Gengið var til dagskrár og eftirfarandi tekið fyrir :


1. Fundargerð síðasta fundar

Engar athugasemdir.



2. Ógreiddur hreindýraarður

Inga Jóna upplýsti að enn er ógreiddur hreindýraarður vegna 13 Holta- og Hjáleigujarða á Mýrum vegna áranna 1997-1999. Leitað hefur verið til Hreyndýraráðs vegna málsins og mun starfsmaður ráðsins Karen Erla Erlingsdóttir leggja fram tillögu að skiptingu arðsins. Tillögunnar er að vænta fljótlega og mun ákvörðun um greiðsluna verða tekin á næsta fundi nefndarinnar.



3. Samningar við ráðna veiðimenn um refa- og minkaveiðar

Stefán Helgason sem er ráðinn skotmaður hjá sveitarfélaginu mætti á fundinn til að ræða almennt um refa- og minkaveiðar.

Inga Jóna kynnti bréf sem sent verður til ráðinna skotmanna þar sem þeir eru hvattir til þess að leita á markvissan hátt á úthlutuðum svæðum.

Samþykkt var að leita álits hjá Veiðistjóra um greiðslu veiðilauna.



4. Bann við lausagöngu stórgripa í öllu sveitarfélaginu

Á 56. fundi bæjarstjórnar ræddu fulltrúar um þörf á banni við lausagöngu stórgripa, banni sem næði yfir allt Sveitarfélagið Hornafjörð.

Inga Jóna kynnti drög að samþykkt um bann við lausagöngu stórgripa á Austur-Héraði en þessi drög verða væntanlega lögð fyrir bæjarstjórn þar fljótlega. Í Sveitarfélaginu Hornafirði er öll lausaganga búfjár bönnuð á Höfn, í gildi er bann við lausagöngu hrossa í Nesjahreppi frá 18. mars 1986 og bann við lausagöngu hrossa og nautgripa í Mýrahreppi frá 16. maí 1990.

Ólafur Dýrmundsson hjá Bændasamtökunum sem Inga Jóna ræddi við segir bannið á Austur-Héraði byggjast á því að stærstur hluti vegsvæða þar séu lokaður með góðum girðingum. Hann telur að aðstæður hér séu aðrar og að ábyrgðarlaust sé af sveitarstjórnarmönnum að setja allsherjar bann við þær aðstæður sem hér ríkja. Stefnt er að því að halda fund með Ólafi Dýrmundssyni hjá bændasamtökunum og Reyni Gunnarssyni hjá Vegagerðinni um málið.



5. Fjallskil í sveitarfélaginu

Bæjarstjóri ræddi um fyrirkomulag fjallskila í Nesjum síðustu tvö ár. Atvinnumálanefnd samþykkir að bæjarstjóri vinni áfram að málinu á sama hátt og undanfarin ár. Fyrirhugað er að halda fund með bændum, fulltrúum sveitarfélagsins og Ólafi Dýrmundssyni um fyrirkomulag fjallskila í sveitarfélaginu í lok mars eða byrjun april.



6. Önnur mál

Inga Jónsdóttir lagði fram eftirfarandi tillögu :

?Lagt er til að haft verði samband við ORF líftækni ehf, en fyrirtækið gerir ráð fyrir því að skapa nokkur hundruð manns atvinnu innan tíu til fimmtán ára.

Kannaður verði grundvöllur þess að atvinnumálanefnd komi á fundi með ORF líftækni og bændum í sveitarfélaginu þar sem vilji til samstarfs um ræktun á erfðabreyttu korni (byggi) verði kannaður. Einnig verði kannaðir möguleikar á uppbygging próteinhreinsistöðvar.

Benda má á að í sveitarfélaginu er til staðar reynsla í ræktun korns, fyrirtæki sem byggir á líftækni (enzymvinnsla úr fiskúrgangi) og laust húsnæði (Nýheimar, fyrrverandi hús FAS í Nesjum og fl.)

Sjá frekari upplýsingar í DV, fimmtud. 27. feb., bls. 8-9 og Morgunblaðinu, sunnud. 2. mars, bls. 18-21?

Starfsmaður nefndarinnar mun hafa samband við ORF líftækni og forsvarsmenn Búnaðarsambandsins vegna málsins.



Fundi slitið kl: 19:15

Reynir Arnarson Inga Jóna Halldórsdóttir

Inga Jónsdóttir

Sveinbjörn Imsland

Pálmi Guðmundsson

Björn E. Traustason