Fundargerð Atvinnu- og menningarmálanefndar 26

Árdís Erna Halldórsdóttir kom á fundinn undir þessum lið og kynnti MSc ritgerð sína í ferðamálafræði.  Sagði að hún hafi viljað tengja það við heimabyggðina og snemma hafi sjónarhornið beinst að Höfn sem Þjóðgarðsbæ (e. gateway community) og hvernig nýta mætti nálægð við þjóðgarðinn fyrir uppbyggingu atvinnulífs.  Rannsóknin hafi leitast við að svara tveimur spurningum, þ.e. hver er ímynd Hafnar sem ferðamannastað og hvort Höfn er þjóðgarðsbær.   Rannsóknin sjálf fór fram árið 2009-2010.  Í rannsókninni hafi verið teiknuð mynd af hugmyndum ferðamanna til Hafnar þar sem hafi komið fram að afþreying er veikur þáttur í ferðaþjónustu á staðnum en fram hafi líka komið að lifandi hafnarlíf hafi verið á staðnum og framboð á humri virðist vera aðdráttarafl.  Þá hafi komið fram að jöklasýnin hafi verið stórfengleg og íbúar vingjarnlegir.  Sagði Árdís að ferðabækur framan af hafi verið fremur neikvæðar og vitnaði sérstaklega til bóka sem komu út 1991 og 1997 en umfjöllun batnað þegar tíminn líður fram.  Í hnotskurn hefur Höfn veika ímynd hjá ferðamönnum sem nýkomnir eru í bæinn, bærinn hefur sterka ímynd sem sjávarþorp, ferðamenn upplifa sterka tengingu á milli Hafnar og þjóðgarðsins en í framtíðinni hafi Höfn möguleika á að nýta sér bæði tengingu við sjávarþorpið og Vatnajökulsþjóðgarð.  Sagði Árdís að rannsaka þurfi betur hvaða afþreying ferðafólk væri helst tilbúið að kaupa.  Eins væri mikilvægt fyrir bæinn að vinna meira í umhverfismálum, vottunarkerfum og fleira til að draga fram að íbúar og bæjaryfirvöld hafi metnað í að huga að ásýnd umhverfisins.

Árdísi þakkað fyrir góða kynningu.