Fundargerð bæjarstjórnar 80
80. fundur
Fundur haldinn í ráðstefnusal Nýheima, miðvikudaginn 22. desember 2004, kl. 13:30 í Ráðhúsi.
Mætt voru: Elín Magnúsdóttir, forseti, Einar Karlsson, Björn Emil Traustason, Björk Pálsdóttir, Reynir Arnarson, Ólafur Sigurðsson og Kristín Gestsdóttir. Einnig Albert Eymundsson, Hjalti Þór Vignisson Ásta H. Guðmundsdóttir, Stefán Ólafsson og Helgi Már Pálsson.
Gengið var til dagskrár.
1. Fundargerðir
Bæjarráð Hornafjarðar 271. fundur 18. nóvember 2004.
· Byggingar- og skipulagsnefnd, 56. fundur, 11. nóvember 2004.
· Félagsmálaráð Hornafjarðar, 118. fundur, 9. nóvember 2004.
· Æskulýðs og tómstundaráð, 63. fundur, 25. október 2004.
· Umhverfisnefnd Hornafjarðar, 46. fundur, 8. nóvember 2004.
Björn spurði um jarðhitaleit í sveitarfélaginu. Þá kallaði hann eftir upplýsingum um málefni Ratsjárstofnunnar.
Kristín gerði umgengni á lóðum í sveitarfélaginu að umtalsefni. Þá spurðist hún fyrir um vinnu sem lýtur að skilgreiningu á eignarhaldi á íþróttamannvirkjum og félagsheimilum í sveitarfélaginu líður.
Bæjarstjóri upplýsti að ákveðið hafi verið að bíða eftir lokaskýrslu um jarðhitaleit í sveitarfélaginu áður en ákvörðun um næstu skref yrði tekin. Þá gerði bæjarstjóri grein fyrir bókun bæjarráðs um málefni Ratsjárstofnunar þar sem lýst var yfir áhyggjum af þeim breytingum sem fyrirhugaðar eru og afleiðingum þess fyrir einstaklinga og sveitarfélagið. Bæjarstjóri upplýsti að óskað hefði verið eftir fundi með stjórnendum stofnunarinnar og utanríkisráðherra um málið. Bæjarstjóri upplýsti að haft hafi verið samband við nokkra aðila um að þeir bættu umgengni á lóðum og að ýmsir hefðu brugðist við en ekki allir. Þá upplýsti bæjarstjóri um að vinna væri í fullum í gangi við að skilgreininga eignarhald á íþróttamannvirkjum og félagsheimilum.
Fundargerð samþykkt.
Bæjarráð Hornafjarðar 272. fundur 25. nóvember 2004.
· Heilbrigðis- og öldrunarráð, 55. fundur, 15. nóvember 2004.
· Stjórn gjafa- og minningarsjóðs Skjólgarðs, 23. fundur, 15. nóvember 2004.
· Skólanefnd Hornafjarðar, 65. fundur, 17. nóvember 2004.
Reynir spurðist fyrir um framkvæmdir á vegi við Dynjanda
Björk spurði um fjárhagsstöðu HSSA. Þá óskaði hún eftir upplýsingum um sorpmál.
Bæjarstjóri upplýsti að Skipulagsstofnun hafi sent bréf til sveitarfélagsins um nýjar hugmyndir að veg við Dynjanda. Breytingar frá fyrri tillögu vegagerðarinnar eru ekki miklar en bæjarstjóri taldi að við mótun nýju tillagnanna væri umferðaröryggi að sumu leyti fórnað fyrir umhverfisvernd. Þá gerði bæjarstjóri grein fyrir samningum við ráðuneytið um HSSA. Niðurstaðan í umræðum við ráðuneytið leiðir til þess að HSSA verður rekið með 3 miljóna króna halla árið 2004. Bæjarstjóri upplýsti að vinna væri í gangi hjá bæjarfélaginu um sorpmál.
Fundargerð samþykkt.
Bæjarráð Hornafjarðar 273. fundur 2. desember 2004.
· Atvinnumálanefnd Hornafjarðar 14. fundur 23. nóvember 2004.
· Hafnarstjórn Hornafjarðarhafnar 63. fundur 24. nóvember 2004.
· Æskulýðs- og tómstundaráð Hornafjarðar 64. fundur 22. nóvember 2004.
· Heilbrigðisnefnd Austurlands 51. fundur 24. nóvember 2004.
· Stjórn Sambands íslenskrar sveitarfélaga 719. fundur 19. nóvember 2004
Kristín gerði málþing um kasa 12. nóvember s.l. að umtalsefni. Hún lýsti yfir ánægju með málþingið og þær margvíslegu hugmyndir sem komu fram á þinginu. Hún lagði áherslu á að mikilvægt sé að fylgja verkefninu eftir og taldi að það væri góð leið til að efla byggðina og atvinnulífið á svæðinu. Þá ræddi Kristín um forvarnir og lagði áherslu á að þeim málum væri vel sinnt.
Einar spurðist fyrir um hvort björgunarskip kæmi á staðinn eða ekki. Þá spurði hann um ósk Litlahorns ehf. um viðlegukant á Austurfjörum.
Bæjarstjóri tók undir orð Kristínar um málþing um klasa. Þá upplýsti hann að málefni björgunarskips væri á hendi björgunarfélagsins. Björgunarfélagið hafi leitað til hafnarstjórnar um hvernig sveitarfélagið gæti tekið þátt í kostnaði við rekstur slíks skips. Bæjarstjóri upplýsti að hann hefði ekki nýjar fréttir um málefni Litlahorns.
Fundargerð samþykkt.
Bæjarráð Hornafjarðar 274. fundur 10. desember 2004.
· Félagsmálaráð Hornafjarðar 119. fundur 30. nóvember 2004.
· Húsnæðisnefnd Hornafjarðar 60. fundur 19. nóvember og 61. fundur 30. nóvember2004.
· Menningarmálanefnd Hornafjarðar 62. fundur 1. desember 2004.
Fundargerð samþykkt.
Bæjarráð Hornafjarðar 275. fundur 16. desember 2004.
· Almannavarnanefnd Hornafjarðar 27. fundur 7. desember 2004.
· Hafnarstjórn 64. fundur 13. desember 2004
· Menningarmálanefnd 61. fundur 10. nóvember 2004 og 63. fundur 8. desember 2004.
· Skólanefnd 66. fundur 8. desember 2004.
· Umhverfisnefnd 47. fundur 13. desember 2004.
Björn spurðist fyrir um málefni NorðurÍss.
Kristín tók undir bókun bæjarráðs um fyrirhugaðar breytingar hjá Ratsjárstofnun þar sem lýst var yfir áhyggjum vegna breytinga. Hún vill að Ratsjárstofnun verði krafin skýringa um af hverju verið sé að leggja niður störf á landsbyggðinni og flytja þau á suðvestur hornið, sérstaklega í ljósi þeirrar fjarskiptatækni sem fyrir hendi er. Þá hvatti Kristín bæjarfulltrúa að gæta hagsmuna sveitarfélagsins og hafa samband við ráðherra og aðra sem vald hafa í málinu.
Bæjarstjóri fór yfir málefni NorðurÍss og upplýsti að á hluthafafundi í félaginu hafi verið ákveðið að auka hlutafé í félaginu. Þá upplýsti hann að aðilar bæði innan og utan sveitarfélagsins hafi nýlega keypt hlutafé. Bæjarstjóri gerði grein fyrir að bæjarráð hafi á 276. fundi sínum, dags. 22. desember ákveðið fyrir sitt leyti að bæjarfélagið nýtti sér forkaupsrétt á hlutabréfum í félaginu. Þá gerði hann stuðning sveitarfélagsins að umtalsefni og taldi að með því að kaupa hlutafé væri ekki verið að skekkja samkeppnistöðu gagnvart öðrum fyrirtækjum í sveitarfélaginu. Bæjarstjóri lagði áherslu á að kaupin væri áhættusöm en gerði grein fyrir að rekstrarhorfur fyrirtækisins væru bjartari núna en oftast áður
Fundargerð samþykkt.
Bæjarstjórn Hornafjarðar, 78. fundur, 18. nóvember 2004, ósamþykkt. Fundargerð samþykkt með 6 atkvæðum.
Bæjarstjórn Hornafjarðar 79. fundur, 5. maí 2004, fundargerð áður samþykkt.
2. Fjárhagsáætlun 2005 – 2. umræða
Bæjarstjóri fylgdi áætluninni úr hlaði og lagði fram ítarlega greinagerð sem fylgiblað með fundargerðinni. Helstu niðurstöðutölur:
A-hluti:
Skatttekjur bæjarsjóðs eru áætlaðar 735,8 m.kr. Rekstur og framkvæmdir málaflokka eru áætlaður 798,2 m.kr. Gjöld vegna eignasjóðs og þjónustustöðvar eru áætluð 27 m.kr. Mismunur tekna og gjalda A-sjóðs sveitarfélagsins er því halli um 89,4 m.kr. Aðrir liðir sem áhrif hafa eru 10,1 m.kr. Rekstur, framkvæmdir og afborganir umfram tekjur eru því áætlaðar 99,6 m.kr. Framkvæmdir eru áætlaðar um 81,2 m.kr. Afborganir langtímalána eru áætlaðar 90 m.kr. og að tekið verði langtímalán að upphæð 100 m.kr. Með þessari áætlun hækka langtímaskuldir sveitarsjóðs um 10 m.kr.
B-hluti:
Hornafjarðarhöfn: Gert er ráð fyrir að tekjur verði um 109 m.kr. en rekstrargjöld ásamt fjármagnskostnaði verði 82,9 m.kr. Tekjur umfram gjöld verði því 26,1 m.kr. Framkvæmdir eru áætlaðar um 43,6 m.kr. Afborganir langtímalána eru áætlaðar 6,8 m.kr. og tekið verði langtímalán að upphæð 25 m.kr.
Vatnsveita: Gert er ráð fyrir að tekjur verði 23,8 m.kr. en rekstrargjöld ásamt fjármagnskostnaði og afskriftum verði 19,8 m.kr. Tekjur umfram gjöld verði 4,0 m.kr. Gert er ráð fyrir um 4 m.kr. til framkvæmda
Leiguíbúða: Gert er ráð fyrir að tekjur verði 19,5 m.kr. en rekstrargjöld ásamt fjármagnskostnaði verði 15,2 m.kr. Afborganir langtímalána 7,6 m.kr. Niðurstaðan er neikvæðu um 3,2 m.kr.
Heilbrigðisstofnunar Suðausturlands: Gert er ráð fyrir að tekjur verði 319 m.kr. og gjöld verði 319 m.kr.
Bæjarstjóri ítrekaði að fjárhagsstaða sveitarfélagsins er þröng og ekki svigrúm til stórra framkvæmda.
Lagði hann til að bæjarstjórn samþykkti framlagða tillögu að fjárhagsáætlun bæjarsjóðs og tengdra fyrirtækja fyrir árið 2005.
Kristín ræddi um neikvæða greiðsluafkomu bæjarsjóðs og framkvæmdir í sveitarfélaginu. Hún taldi margar framkvæmdir þarfar og gerði Jöklasýningu sérstaklega að umtalsefni í þessu efni. Hún lagði fram þá hugmynd að leitað væri eftir fjármunum frá einstaklingum til framkvæmda við Jöklasýningu. Hún upplýsti að lítið svigrúm væri fyrir hendi að auka tekjur sveitarsjóðs þar sem núverandi tekjustofnar væru nær fullnýttir. Hún lýsti því yfir að hún sitji hjá við atkvæðagreiðslu fjárhagsáætlunar m.a. vegna þess að hún taldi að lántaka upp á rúmlega 100 milljónir væri ekki heppileg um þessar mundir því að árið 2005 taldi hún vera ár þar sem draga ætti úr öllum framkvæmdum og greiða niður skuldir sveitarfélagsins.
Bæjarstjóri upplýsti að búið væri að endurfjármagna eldri lán. Þá ræddi hann um að nauðsynlegt væri að taka lán til að framkvæma og að með framkvæmdum og viðhaldi væri verið að skapa atvinnu. Bæjarstjóri gerði atvinnumál í sveitarfélagið að umtalsefni og taldi að undirstöðuatvinnugreinar í sveitarfélaginu stæðu vel.
Forseti bar upp fjárhagsáætlun upp til atkvæða. Fjárhagsáætlun samþykkt með 6 atkvæðum en 1 sat hjá.
3. Yfirstjórn sveitarfélagsins
Bæjarstjóri gerði grein fyrir tillögum um breytta yfirstjórn sveitarfélagsins.
Kristín taldi að tækifæri væri til staðar til að breyta sviðum og spara í rekstri sveitarfélagsins. Hún gerði stöðu framkvæmdastjóra stjórnsýslusviðs að umtalsefni og lýsti hún sig sammála því að sú staða verði lögð niður. Hins vegar taldi hún gagnrýnivert að færa starf forstöðumanns Menningarmiðstöðvar inn í yfirstjórn sveitarfélagsins. Hún gerði mikla uppbyggingu í Menningarmiðstöð og sýninga- og safnamálum í héraðinu á undanförnum árum og auknum sértekjum í stofnunina og taldi gagnrýnivert að setja Menningarmiðstöð undir tilraun í eitt ár. Þá telur hún eðlilegt að auglýst sé eftir forstöðumanni og vísaði í 7. gr. stofnskrár Menningarmiðstöðvar um að auglýsa beri störf í Menningarmiðstöð. Þá gerði hún starf framkvæmdastjóra HSSA að umtalsefni og ræddi til dæmis um að tvívegis hafi verið auglýst eftir framkvæmdastjóra en ekki fengist hæfur umsækjandi. Kristín taldi að starf forstöðumanns Menningarmiðstöðvar væri áhugaverðari í augnablikinu og auðveldara væri að fá hæfan umsækjanda um það starf, t.d. vegna þess að þjónustusamningur við ríkið um HSSA rennur út árið 2006. Kristín taldi því að staða framkvæmdastjóra stjórnsýslusvið ætti að renna inn í starf framkvæmdastjóra HSSA. Reynir las upp bókun meirihluta menningarmálanefndar frá 1. des. 2004 og tók undir þau orð í bókuninni að ekkert skipulag væri fullkomið og rétt að og skylt væri að endurmeta það og breyta í ljósi breyttra aðstæðna. Hann lýsti því yfir að hann samþykkti framlagðar tillögur fyrir sitt leyti sem tilraunaverkefni í eitt ár.
Björn fagnaði þeim tillögum sem lagðar voru fram.
Bæjarstjóri ræddi um að á hverjum tíma væri stjórnendum skylt að leita hagræðingar í rekstri og hagræðing verði til þess að skapa svigrúm á öðrum sviðum. Bæjarstjóri gerði mun á veltu og starfsmannafjölda HSSA samanborið við Menningarmiðstöð að umtalsefni. Hann áréttaði að um tilraun er að ræða. Þá sagði bæjarstjóri að ekki sé hægt að gera kröfu um aðhaldssemi í rekstri hjá stofnunum sveitarfélagsins ef yfirstjórn gangi ekki á undan með gott fordæmi. Þá gerði hann ráðningu framkvæmdastjóra HSSA að umtalsefni. Bæjarstjóri gerði grein fyrir að þrátt fyrir að samningur sveitarfélagsins við ríkið um HSSA sé aðeins til 2006 verði stofnunin rekin áfram hvort sem ríkið og sveitarfélagið annist reksturinn.
Kristín gerði grein fyrir að hún væri ekki með hræðsluáróður heldur þætti henni skynsamlegra miðað við núverandi ástand að staða framkvæmdastjóra stjórnsýslusviðs rynni saman við starf framkvæmdastjóra HSSA.
Forseti bar upp tillögur um breytingar á yfirstjórn í sveitarfélaginu. Fimm bæjarfulltrúar samþykktu tillögurnar, einn sat hjá og einn var á móti.
4. Hafnarreglugerð – fyrri umræða.
Bæjarstjóri fór yfir reglugerðina og skýrði meðal annars út mörk hafnarinnar. Bæjarstjórn samþykkir að vísa hafnarreglugerð til annarrar umræðu.
5. Fyrirspurnir
Engar fyrirspurnir.
Fundi slitið kl. 16.05
