Fudnargerð bæjarstjórnar 90
90. fundur
Fundur haldinn í Ekru, fimmtudaginn 6. október 2005 kl. 16:00. Mætt voru: Halldóra B. Jónsdóttir, forseti, Elín Magnúsdóttir, Björn E. Traustason, Reynir Arnarson, Björk Pálsdóttir og Kristín G. Gestsdóttir. Ólafur Sigurðsson boðaði forföll. Einnig: Albert Eymundsson, bæjarstjóri, Hjalti Þór Vignisson, Ásta H. Guðmundsdóttir, Helgi Már Pálsson og Stefán Ólafsson. Þrír áheyrendur voru mættir. Gengið var til dagskrár og eftirfarandi tekið fyrir:
1. Fundargerðir
Bæjarráð Hornafjarðar 304. fundur 8. september 2005
· Æskulýðs- og tómstundaráð 70. fundur 31. ágúst 2005.
Kristín spurði um flugvöllinn á Árnanesi. Þá ræddi hún um gatnamót Kirkjubrautar og Vesturbrautar. Kristín lýsti sig andvíga ákvörðun meirihluta bæjarráðs frá því fyrr um daginn um að hafna umsókn um greiðsluþátttöku fyrir framhaldsnema sem stundar tónlistarnám samhliða framhaldsnámi utan heimabyggðar.
Reynir spurði um starfshóp vegna uppbyggingu íþróttamannvirkja í tengslum við landsmót árið 2007.
Elín ræddi um ákvörðun bæjarráðs fyrr um daginn varðandi greiðsluþátttöku vegna tónlistarnáms.
Bæjarstjóri upplýsti að óskað hafi verið eftir fundi með æðstu stjórnendum Flugmálastjórnar varðandi Árnanesflugvöll. Þá greindi hann frá því að tækni- og umhverfissvið séu að vinna að því að auka öryggi gatnamóta Vesturbrautar og Kirkjubrautar. Bæjarstjóri sagði frá samtali sínu við framkvæmdastjóra Sambands íslenskra sveitarfélaga og fleiri aðila um greiðsluþátttöku vegna tónlistarnáms. Þá ræddi hann um Ungmennalandsmót á Hornafirði 2007 og taldi það mikla áskorun að halda slíkt mót. Í tengslum við það fjallaði bæjarstjóri um uppbyggingu íþróttamannvirkja.
Fundargerð samþykkt.
Bæjarráð Hornafjarðar 305. fundur 22.september 2005
· Atvinnumálanefnd 20. fundur 5. september 2005.
· Byggingar- og skipulagsnefnd 62. fundur 7. september 2005.
· Húsnæðisnefnd 63. fundur 6. september 2005.
· Menningarmálanefnd 70 . fundur 14. september 2005.
· Stjórn Sambands íslenskra sveitarfélaga, 727. fundur 26. ágúst 2005 til kynningar.
· Heilbrigðiseftirlit Austurlands 56/25. fundur 7. september 2005 til kynningar.
Elín gerði málefni upplýsingamiðstöðvar að umtalsefni.
Björk spurði um lóð að Hafnarbraut 38 þar sem fyrirhugað er að pósthús rísi. Þá spurði hún um sölu íbúða sveitarfélagsins. Björk lýsti sig fylgjandi því að upplýsingamiðstöð yrði flutt á Jöklasýningu.
Kristín gerði skipulagsbreytingar á Menningarmiðstöð að umtalsefni.
Albert ræddi um upplýsingamiðstöð og fyrirhugaðar framkvæmdir á lóð að Hafnarbraut 38. Varðandi sölu á eignum taldi bæjarstjóri rétt að selja þær eignir sem eiga heima á markaði ef réttar aðstæður eru fyrir hendi. Þá sagði hann frá vinnu varðandi skipulagsbreytingar á Menningarmiðstöð og að það mál yrði tekið formlega á dagskrá á síðari stigum.
Fundargerð samþykkt.
Bæjarráð Hornafjarðar 306. fundur 29. september 2005.
· Hafnarstjórn Hornafjarðarhafnar 69. fundur 19. september 2005.
· SSA - fundargerðir stjórnar og framkvæmdaráðs til kynningar.
Reynir ræddi um framkvæmdir við höfnina og óskaði eftir upplýsingum um dælinguna fyrir utan Ósinn.
Kristín gerði málefni Þjóðgarðsins í Skaftafelli að umtalsefni. Forseti bæjarstjórnar upplýsti um hvernig stjórnun og rekstri þjóðgarðsins sé háttað og greindi frá óskum ráðgjafanefndar þjóðgarðsins og sveitarstjórnar varðandi uppbyggingu hans.
Albert greindi frá dælingum á Grynnslunum og framkvæmdir við bryggju við netagerðina.
Fundargerð samþykkt.
Bæjarstjórn Hornafjarðar 89. fundur 8. september 2005, fundargerð áður samþykkt.
2. Málefni dvalarheimilis
Bæjarstjóri rakti aðdraganda málsins þar sem fram kom m.a. að tillaga kom frá starfsfólki HSSA um breytingar á rekstri og fyrirkomulagi stofnunarinnar sem fólust í að leggja niður starfsemi í gamla Skjólgarði við Hvannabraut. Tillagan gerði ráð fyrir að eldhúsið flyttist á hjúkrunarheimilið, dvalardeildin í Mjallhvíti og dagvistin í Ekru. Málið hefur fengið mikla umfjöllun á vettvangi sveitarstjórnar, verið kynnt vandlega fyrir skjólstæðingum og eldri borgurum ásamt starfsmönnum í heilbrigðisráðuneytinu. Tillagan er í samræmi við almenna stefnumörkun og þróun þessara mála í þjóðfélaginu. Kristín lýsti sig sammála breytingunum en taldi að kynna þyrfti málið betur til að skapa betri sátt. Bæjarstjóri greindi frá því að rætt hafi verið við alla sem beinna hagsmuna hafa að gæta varðandi málið. Þá greindi hann frá fjölmennum fundi með eldri borgurum þar sem hann kynnti m.a. málefni dvalarheimilis.
Kristín greindi frá samtölum sínum við ýmsa íbúðareigendur í Ekrunni um eignaskipti í húsinu sem varðar aukin umgang í sameign. Forseti gerði grein fyrir eignaskiptingu í Ekrunni. Þá ræddi hún rekstur dvalarheimilis og greindi frá að hann lækki við breytingarnar. Auk þess taldi hún að þjónusta og öryggi batnaði.
Bæjarstjórn samþykkir framlagða tillögu um dvalarheimili. Kristín sat hjá.
3. Endurskoðun fjárhagsáætlunar 2005
Bæjarstjóri fór yfir endurskoðaða fjárhagsáætlun fyrir árið 2005 sem bæjarráð vísaði til afgreiðslu í bæjarstjórn.
Helstu breytingar á fjárhagsáætluninni eru þær að skatttekjur í heild hækka um 82,4 m.kr. m.a. vegna aukaframlaga úr Jöfnunarsjóði sveitarfélaga um 36 m.kr. og hækkun á útsvari um 25,6 m.kr. Heildarupphæð skatttekna er þá um 818,3 m.kr.
Útgjöldin aukast hins vegar um 50,5 m.kr. m.a. vegna fráveitu- og gatnaframkvæmda sem voru á áætlun 2004 um 31,8 m.kr. Heildarupphæð útgjalda eru um 875,8 m.kr. Ekki er gert ráð fyrir samþykktri lántöku að upphæð 100,0 m.kr. Þar með lækka langtímalán sem nemur afborgunum um 90,0 m.kr. en þar á móti lækkar hreint veltufé um 75,4 m.kr.
Björn vék af fundi kl. 17.30 og tók ekki þátt í afgreiðslu málsins.
Samþykkt með fjórum atkvæðum.
Kristín sat hjá.
Halldóra vék af fundi kl. 17.35 og Elín tók við fundarstjórn.
4. Fyrirspurnir
Engar.
Fundi slitið kl. 17:50
