Samþykkt um hundahald fyrir Sveitarfélagið Hornafjörð
1. gr.
Hundahald í Sveitarfélaginu Hornafirði, að undanteknu hundahaldi þarfahunda á lögbýlum og hunda sem notaðir eru til leitar- og björgunarstarfa, svo og aðstoðarhunda blindra og fatlaðra, sætir þeim takmörkunum sem getur í 3. grein samþykktar þessarar. Samkvæmt lögum um dýravernd nr. 15/1994 fer Umhverfisstofnun með mál er varða dýravernd.
2. gr. Stjórnsýsla
Bæjarstjóri í umboði bæjarstjórnar fer með umsýslu vegna samþykktar þessarar og getur ráðið sérstaka dýraeftirlitsmenn eða falið starfsmönnum sveitarfélagsins hlutverk dýraeftirlitsmanns. Bæjarstjórn setur dýraeftirlitsmanni starfsreglur. Þeir starfa í umboði Heilbrigðisnefndar Austurlands.
3. gr. Takmarkanir á hundahaldi
Bæjarstjórn er heimilt að veita lögráða einstaklingum leyfi til hundahalds, vegna hunda annarra en þeirra sem undantekning 1. gr. samþykktar þessarar tekur til, með eftirfarandi skilyrðum og gegn greiðslu leyfisgjalds. Leyfið er bundið við nafn og heimilisfang viðkomandi og er ekki framseljanlegt. Leyfið er einnig bundið við þann hund sem það er gefið út fyrir. Tilkynna ber eigendaskipti og sækja um nýtt leyfi.
Sveitarstjórn skal halda skrá yfir hunda sem veitt er leyfi fyrir, þar sem fram koma upplýsingar um hundinn og eiganda hans eða forráðamann. Skráin skal vera aðgengileg lögreglu, heilbrigðiseftirliti og dýraeftirlitsmanni, sé hann starfandi.
- Um hundahald í fjöleignarhúsum fer að 13. tl. A-lið 41. gr. laga nr. 26/1994 um fjöleignahús. Við skráningu hunds skal leggja fram skriflega staðfestingu allra umráðamanna íbúða hússins á samþykki þeirra, auk eiganda viðkomandi húsnæðis, sé um leiguhúsnæði að ræða. ( Í fjöleignahúsalögum segir: Til ákvarðana um eftirfarandi þarf samþykki allra eigenda: Um að halda megi hunda og/eða ketti í húsinu. Þegar hús skiptist í aðgreinda hluta nægir samþykki þeirra eigenda sem hafa sameiginlegan inngang, stigagang eða annað sameiginlegt húsrými.) Óheimilt er að halda hunda í fjöleignarhúsum ef hundur sannanlega veldur eða viðheldur sjúkdómum hjá íbúum.
- Hundur sem færður er til skráningar skal vera merktur með örmerki skv. reglugerð um aðbúnað og umhirðu gæludýra og dýrahald í atvinnuskyni nr. 1077/2004. Eigandi hundsins skal strax að lokinni örmerkingu koma upplýsingum um númer örmerkis og nafn og kennitölu eiganda til sveitarstjórnar auk myndar.
- Leyfisgjald fyrir hundahaldi skal greiða árlega til sveitarsjóðs, eftir gjaldskrá sem sveitarstjórn setur að fenginni umsögn Heilbrigðiseftirlits Austurlands samkvæmt ákvæðum 25. gr. laga nr. 7/1998 um hollustuhætti og mengunarvarnir, m.s.br. Gjaldið skal ekki vera hærra en sem nemur rökstuddum kostnaði fyrir veitta þjónustu og eftirlit og skal birt í B-deild Stjórnartíðinda. Í gjaldskrá er einnig heimilt að ákveða handsömunargjald.
- Gjaldið skal greitt í fyrsta sinn við skráningu hundsins og síðan árlega fyrirfram, fyrir lok febrúar ár hvert. Hafi gjaldið ekki verið greitt innan tveggja mánaða frá gjalddaga , er heimilt að afturkalla leyfi til hundahalds.
- Innifalið í skráningargjaldinu er ábyrgðartrygging og hreinsun og merkispjald, eigandi hunds ber annan kostnað svo sem af örmerkingu og hálsól o.þ.h.
- Við greiðslu leyfisgjalds ber leyfishafa að framvísa vottorði dýralæknis um að hundurinn hafi verið ormahreinsaður á undangengnum 12 mánuðum. Heimilt er að afturkalla leyfi til hundahalds ef hundahreinsun er ekki framkvæmd.
- Auk örmerkis skulu hundar bera hálsól með upplýsingum um heimilisfang eiganda og símanúmer.
- Óheimilt er að láta hund dvelja lengur en 2 mánuði á heimili án þess að sótt sé um leyfi fyrir honum. Það fríar þó eiganda ekki ábyrgð á því tjóni sem hundurinn kann að valda meðan hann er óskráður. Ekki skal veita leyfi fyrir fleiri en tveim hundum á hverju heimili. Ef sérstakar ástæður mæla fyrir um getur bæjarstjórn veitt tímabundna undanþágu frá þessu ákvæði.
- Hundar skulu aldrei ganga lausir á almannafæri. Utandyra skulu hundar ávallt vera í taumi í fylgd með aðila, sem hefur fullt vald yfir þeim. Þegar hundur er í festi á húslóð, skal lengd festarinnar við það miðuð að óhindrað megi ganga að aðaldyrum hússins.
- Hundaeigendum ber að hlíta að öðru leyti lögum og reglum, er hundahald varðar, þ.á m. reglum um árlega hreinsun hunda og greiðslu leyfisgjalds, sbr. ákv. b-liðar þessarar greinar, svo og fyrirmælum sem heilbrigðisnefnd setur.
- Bændum á lögbýlum er heimilt að hafa þarfahunda án greiðslu leyfisgjalds en ber þó að skrá, ábyrgðartryggja, örmerkja og hreinsa þá á eigin kostnað. Hundar á lögbýlum mega ganga frjálsir á landareign eigenda sinna. Að öðru leyti skulu slíkir hundar háðir ákvæðum þessarar samþykktar. Skylt er bændum á lögbýlum og eigendum hunda sem nefndir eru í 1. gr. hér að framan að sjá til þess að hundar þeirra séu ekki lausir á almannafæri innan þéttbýlis.
4. gr. Óheimilir staðir
Eigi er leyfilegt að hafa með sér hunda, þó í taumi séu, inn í opinberar stofnanir, skólahús, matvöruverslanir eða aðra þá staði sem um ræðir skv. ákvæðum 19. gr. reglugerðar 941/2002. Slíkir staðir eru m.a. eftirfarandi skv. ákvæðum í fylgiskjali 3 með reglugerð um hollustuhætti 941/2002:
- Heilbrigðis- og meðferðarstofnanir
- Skólar
- Lækna- og tannlæknastofur
- Sjúkrahús og aðgerðarstofur
- Vistarverur handtekinna manna
- Heilsuræktarstöðvar
- Íþróttastöðvar og íþróttahús
- Gæsluvellir
- Snyrtistofur
- Nuddstofur og sjúkraþjálfun
- Sólbaðsstofur
- Húðflúrsstofur
- Samkomuhús s.s. kirkjur, leikhús, hljómleikasalir, söfn og kvikmyndahús
- Gististaðir
- Veitingastaðir
- Sumarbúðir fyrir börn
Um matvælafyrirtæki fer samkvæmt ákvæðum reglugerðar um matvælaeftirlit og hollustuhætti við framleiðslu og dreifingu matvæla.
Heimilt er þó að fara með gæludýr inn í íþróttamannvirki, heilbrigðisstofnanir, snyrtistofur og aðra starfsemi sem sérstaklega eru ætluð dýrum.
5. gr. Ónæði og óþrif af völdum hunda
Eigendum hunda ber að sjá svo um að dýrið valdi ekki hávaða, ónæði, óþrifnaði né óhollustu.
Eigendum eða forráðamönnum hunda er skylt að sjá til þess að saur eftir hundinn sé fjarlægður á tryggilegan hátt.
Ef hundur veldur nágrönnum eða öðrum ítrekuðu ónæði, óþrifum eða tjóni, þá ber eiganda eða forráðamanni að koma í veg fyrir slíkt.
6. gr. Handsömun hunda
Hundar sem fangaðir eru skal færa í sérstaka hundageymslu, sem hefur leyfi heilbrigðiseftirlits skv. hollustuháttareglugerð nr.941/2002 og Umhverfisstofnunar.
Hundar, sem ganga lausir utan húss í þéttbýli, skal handsama og færa til hundageymslu.
Sé ekki unnt að greina hver eigandinn er, með örmerki eða öðru skýru auðkenni, skal auglýsa eftir eiganda. Gefi sig ekki fram eigandi innan 5 sólarhringa frá birtingu auglýsingar er lögreglu eða dýraeftirlitsmanni heimilt að láta lóga viðkomandi hundi án frekari fyrirvara.
Sé hundur merktur skal tilkynna eigenda ástæðu handsömunarinnar. Dýraeftirlitsmaður heldur skriflega skýrslu um ástæðu föngunarinnar og ber eiganda að kvitta á sömu skýrslu þegar hundurinn er sóttur til dýraeftirlitsmanns. Ef eigandi hunds vitjar hans ekki innan 5 sólarhringa og gengst ekki við broti á samþykkt þessari, sé um slíkt að ræða, hefur lögregla eða dýraeftirlitsmaður, heimild til að láta lóga hundinum að þeim tíma liðnum.
Eigandi hundar sem fluttur er í hundageymslu skal greiða handsömunar-, fóður- og vistunargjald skv. gjaldskrá um hundahald í viðkomandi sveitarfélagi áður en honum er afhentur hundurinn á ný. Sé hundur ekki örmerktur skal eigandi hans greiða fyrir örmerkingu og skráningu hundarins áður en hann er afhentur og fær gegn því beiðni sem nýta má hjá dýralækni til greiðslu fyrir örmerkingu.
Hunda, sem ráðast á menn eða skepnur, skal fjarlægja og lóga tafarlaust í samráði við dýralækni.
7. gr. Eftirlit og refsiviðurlög
Lögregla og dýraeftirlitsmenn í umboði heilbrigðisnefndar hafa eftirlit með hundum samkvæmt samþykkt þessari og skulu þessir aðilar tilkynna sveitarfélaginu um kærur sem þeim berast vegna meintra brota á samþykktinni.
Með brot á samþykkt þessari skal fara samkvæmt ákvæðum laga nr. 7/1998 um hollustuhætti og mengunarvarnir með síðari breytingum.
Við minniháttar brot á samþykkt þessari skal eigandi hundsins sæta skriflegri áminningu. Endurtekin eða alvarleg brot geta leitt til leyfissviptingar.
Leyfishafa er skylt að greiða kostnað sem leiðir af brotum á samþykkt þessari.
8. gr.
Sveitarstjórn er heimilt hvenær sem er að afturkalla leyfi fyrir einstökum hundum eða öll veitt leyfi, telji hún þess þörf. Um slíkar ákvarðanir skal gætt ákvæða stjórnsýslulaga.
9. gr. Lagagrundvöllur
Samþykkt þessi staðfestist hér með skv. ákvæðum laga nr. 7/1998 um hollustuhætti og mengunarvarnir m.s.br. og öðlast gildi þegar við birtingu. Jafnframt falla þá úr gildi eldri reglugerðir um hundahald í sveitarfélaginu.
10. gr. Ákvæði til bráðabirgða:
Þeir sem halda hunda við gildistöku samþykktarinnar, en hafa ekki skráð þá, skulu færa þá til skráningar samkvæmt samþykkt þessari fyrir 1. janúar 2008.
Samþykkt á fundi bæjarstjórnar Sveitarfélagsins Hornafjarðar 17. apríl 2007.
