Bæjarstjórn Hornafjarðar

Til máls tók Sæmundur Helgason undir lið 2. umhverfisnefnd, til andsvars Matthildur Ásmundardóttir.
Fundargerðin samþykkt með sjö atkvæðum.

Kristján Guðnason tók til máls undir lið 12. Matís og Matarsmiðjan. Guðbjörg Lára Sigurðardóttir tók einnig til máls undir lið 12 og lagði fram eftirfarandi bókun:
"Sveitafélagið hefur leigt nýtt rými fyrir Matarsmiðjuna og ber því að fagna. Hinsvegar hefur vinna við reglur og leiguverð ekki verið kláruð, hér er verið að nota opinbert fé skattgreiðenda og því mikil krafa að allt ferlið sé opið og gegnsætt, því hvet ég til þess að það verði klárað strax í byrjun nýs árs svo hægt sé að auglýsa og hvetja áhugasama og frumkvöðla til þess að nýta aðstöðuna". Til andsvars Matthildur Ásmundardóttir.
Fundargerðin samþykkt með sjö atkvæðum.

Guðbjörg Lára Sigurðardóttir tók til máls undir lið 3. menningarmálanefnd, Mikligarður og lagði fram eftirfarandi bókun
"Miklar umræður hafa verið um framtíð Miklagarðs og hafa umsóknir borist um að vera með aðstöðu í húsnæðinu. Það er dapurlegt að þurfa að vísa frumkvöðlum frá þar sem ekki hefur verið tekin afstaða til framtíðar hússins. Tel ég því mjög brýnt að unnið verði hörðum höndum að skipulagningu og vinnu í framtíðarsýn hússins og koma því í nýtingu svo það standi ekki áfram næstum autt um ókomna tíð. Búið er að meta það að hækka húsið kosti um 100 milljónir og tel ég það vera einn af fyrsta þættinum í því að hægt verði að koma húsinu í nýtingu."
Til andsvars Kristján Guðnason.
Björgvin Sigurjónsson tók til máls undir lið 2. heilbrigðis- og öldrunarnefnd, hjúkrunarheimili og lagði fram eftirfarandi bókun.

"Ég fagna erindi Félags eldri Hornfirðinga varðandi ósk um samstarf við sveitarfélagið varðandi málþing um stöðu eldri borgara hér sveitarfélaginu í nútíð og framtíð. Það er orðið tímatímabært að fjalla nánar um málefni þeirra og kjörið að gera það á málþingi sem væri hægt að halda á vormánuðum næsta árs. Töluvert hefur verið rætt um húsnæðismál hér í sveitarfélaginu undanfarin misseri eða öllu heldur skorti á húsnæði. Í tengslum við þá umræðu hefur einnig verið rætt um húsnæðismál eldri borgara. Því fyndist mér kjörið að samhliða undirbúningi fyrir málþingi að sveitarfélagið mundi leggja í þá vinnu að skoða heilstætt húsnæðismál eldri borgara í sveitarfélaginu. Hvernig það væri útfært þarf að skoða vel en það yrði t.d. gert með skoðanakönnun meðal eldri íbúa í sveitarfélaginu varðandi málefnið. Þannig væri síðan hægt að kynna niðurstöður þessarar skoðunar á málþingi eldri Hornfirðinga í vor."

Páll Róbert Matthíasson tók einnig til máls undir lið 3. menningarmálanefnd, Mikligarður.
Fundargerðin samþykkt með sjö atkvæðum.

Sæmundur Helgason tók til máls undir lið 4. samningur milli íbúðafélagsins og sveitarfélagsins.
Fundargerðin samþykkt með sjö atkvæðum.

Kristján tók til máls undir lið 15. almenningssamgöngur á Suðurlandi. Lagði til að bæjarstjórn bóki um almenningssamgöngur.

Samningur almenningssamgangna á suðurlandi milli Vegagerðarinnar og Samband sveitarfélaga á Suðurlandi (SASS) hefur verið sagt upp vegna tapreksturs. Staðan er alvarleg og ljóst að óvissa ríkir um áframhald almenningssamgangna á Suðurlandi eða um veruleg þjónustuskerðing verður að ræða ef ekki nást samningar. Bæjarstjórn Hornafjarðar hvetur SASS og Vegagerðina til að vinna fljótt og farsællega að framtíð almenningssamgangna á Suðurlandi og leggur jafnframt áherslu á að leitað verði annarra leiða en að fækka ferðum og skerða þjónustu.
Forseti bar bókunina upp til atkvæða.
Fundargerðin samþykkt með sjö atkvæðum.

Fundargerðin lögð fram til kynningar.

Matthildur Ásmundadóttir bæjarstjóri greindi frá helstu niðurstöðum áætlunarinnar fyrir A og B hluta sem eru eftirfarandi:

Rekstrarniðurstaða 417,8 m.kr.
Skuldir í hlutfalli af tekjum 54,9%
Framkvæmdir 640 m.kr.
Framlegð 20,9%
Veltufé frá rekstri 622 m.kr.
Handbært fé í árslok 133 m.kr.
Afborganir langtímalána 124 m.kr.
Ný lántaka A-B hluta 100 m.kr.
Langtímalán við lánastofnanir 685 m.kr.

Bæjarstjóri lagði til að bæjarstjórn samþykki fyrirliggjandi fjárhagsáætlun fyrir árið 2019.
Til máls tók Guðbjörg Lára Sigurðardóttir og lagði fram eftirfarandi bókun:
"Það er ánægjulegt að sjá að það er mikil samstaða meiri og minnihlutans í ýmsum brýnum verkefnum Sveitarfélagsins við gerð fjárhagsáætlunar. Vil ég þakka starfsmönnum og samstarfsfélögum fyrir flotta vinnu. Ýmsir draumar eru að taka sín fyrstu skref til veruleikans og má þá sérstaklega nefna Hjúkrunarheimilið. Einnig er mikið gleðiefni að bygging leiguíbúðanna hefur tekist vel til og munu þeir hafa fengið úthlutað íbúð tækifæri til að halda jólin í þessum flottu íbúðum.

Hinsvegar verð ég að nefna óánægju mína yfir lækkun fasteignaskattsins og að ekki var farið í að nýta aðrar leiðir til að lækka álögur á íbúa Sveitafélagsins. En þegar litið er á heildarmyndina þá eru þetta um 11 milljónir sem tekjur sveitafélagsins skerðast um fyrir utan framlag Jöfnunarsjóð, þær tekjur hefði verið t.d. hægt að nýta í að koma á móts við ýmisleg verkefni hvað varðar t.d. daggæslu ungra barna, endurskoðun á upphæð stofnbúnaðar eða viðgerðasjóðs á brýnum verkefnum sem sitja eftir á húsnæðum Sveitafélagsins, má þá helst nefna Félagsheimilin okkar.

Einnig er dapurlegt að sjá að enn sitja stór verkefni eftir eins og íþróttamannvirkin. Í haust var stofnaður hópur af tilstilli meirihlutans til að vinna að tillögu að uppbyggingu íþróttamannvirkja og mun hann skv. plani skila af sér í apríl. Hefði ég viljað sjá að það hefði verið gert ráð fyrir einhverju fjármagni í það verkefni svo hægt væri að hefja vinnu við hönnun og því sem fylgir slíkri framkvæmd, sérstaklega í ljósi þess að þessi vinna hefur þegar farið fram á fyrra kjörtímabili og er því augljóst að ekki mun sjást í neina framþróun í bættri aðstöðu fyrir íþróttaiðkendur á næstunni.

Safnamál virðast eiga að sitja eftir á hakanum og er það grafalvarlegt í mínum augum. Mikil vinna starfsmanna sveitafélagsins og bæjarráðs fer í það að láta verkefni sem eru ekki brýn þörf á, torvelda þeirri vinnu sem þarf til að auka fjölbreytileika og skapa vettvang fyrir áhugaverða afþreyingu fyrir bæjarbúa og ferðamenn. En til dæmis fer að koma að niðurrifi Akureyjar þar sem hún ekki lengur örugg fyrir að standa til sýninga. Árin sem hún hefur fengið að standa hafa sýnt að hún var eitt af helstu minnisvörðum um Sjávarþorpið Höfn. Því hefði ég talið mikilvægt að það hefði verið úthlutað fjármunum í hugmyndarvinnu og útboð á verkefnum til að byggja undir þá ímynd.

En ég er samt sem áður mjög ánægð með marga þætti innan þessarar fjárhagsáætlunar, því hlakka ég til að vinna í verkefnum hennar á komandi ári og mun ég styðja hana með mínu atkvæði."

Sæmundur Helgason tók einnig til máls og lagði fram eftirfarandi bókun:

Sæmundur þakkaði starfsmönnum og samverkafólki fyrir góða vinnu vegna fjárhagsáætlunar 2019. Áætlunin sýnir að Sveitarfélagið stendur fjárhagslega á traustum grunni með sterkar stoðir. Skuldahlutfall er lágt og við höfum byggt upp getu til framkvæmda fyrir 500-800 milljónir á ári.
3. áfangi fráveita og gatnagerð á Leirunni - hreinsivirki í Óslandi klárað. Vöruhús - þar sem 3.hluti fer í útboð skv. 4 ára viðhaldsáætlun, Hjúkrunarheimili. Malbikun í Nesjahverfi, á Leirunni o.fl. Nýbygging í Öræfum kláruð, Ljósleiðari lagður í Nes og Mýrar, Tvö ný stöðugildi í ráðhúsinu sem er viðbragð á úttekt Capasent á starfsemi sveitarfélagsins. Þetta eru verkefni sem voru komin af stað á síðasta kjörtímabili og voru í áætlunum síðasta meirihluta að vinna og gera.

Því miður þá tekst ekki að fara af stað með öll verkefnin sem framboðin kepptust við að lofa fyrir kosningar. Það verður ekki farið í framkvæmdir á Hafnarbraut á næsta ári. Ekki eru settir nægir fjármunir í þarft viðhald á félagsheimilunum. Sæmundur segir að betur færi hætta við lækkun fasteignaskattsprósentunnar, úr 0.5 í 0.45% og nota þessar 11 milljónir sem meirihlutinn gefur nú frá sveitarfélaginu. Sér ekki að máli skipti þessar 1200 - 1300 krónur á mánuði sem lækkunin á fasteignaskattsprósentunni færir íbúum. Nær væri að innheimta þennan pening af okkur öllum og setja hann í viðhaldssjóð fasteigna, til að viðhalda félagsheimilunum. Það væri líka góð ráðstöfun, því að þessar 11 milljónir myndu tryggja okkur a.m.k. 6 milljónir frá Jöfnunarsjóði til viðbótar.



Til andsvars Matthildur Ásmundardóttir.

Forseti bar fjárhagsáætlun 2019 upp til atkvæða.
Samþykkt með sjö atkvæðum.

Bæjarstjóri lagði til að bæjarstjórn samþykki fyrirliggjandi þriggja ára fjárhagsáætlun sveitarfélagsins fyrir árin 2020-2022. Forseti bar áætlunina upp til atkvæða.
Samþykkt með sjö atkvæðum.

Matthildur kynnti tillögu að álagningarreglum 2019: Útsvar 14,52%. Fasteignaskattur á íbúðahúsnæði 0,45% af fasteignamati (hám. 0,625%). Fasteignaskattur á atvinnuhúsnæði 1,65% af fasteignamati (hám. 1,65%). Lóðaleiga 1% af lóðamati. Holræsagjöld 0,30% af fasteignamati. Vatnsgjöld 0,18% af fasteignamati. Sorpgjöld eru skv. gjaldskrá.
Lagði til að bæjarstjórn samþykki álagningareglur 2019.
Forseti bar tillöguna upp til atkvæða.
Samþykkt með sjö atkvæðum.

Bæjarstjóri lagði fram viðauka III við fjárhagsáætlun 2018. Er hann vegna samþykktra fjárheimilda sem mætt er með tilfærslu verkefna innan framkvæmdaáætlunar og lækkun á handbæru fé. Einnig hafa verið settar inn ákvarðanir bæjarráðs sem ekki hafa áhrif á niðurstöðu ársins eða sjóðstreymi, þ.e. tilfærslur fjárheimilda innan málaflokka og tilfærslur af óráðstöfuðu til aukningar fjárheimilda deilda/málaflokka.
Lagði til að bæjarstjórn samþykki viðauka III.
Forseti bar viðauka III upp til atkvæða.

Samþykkt með sjö atkvæðum.

Íris Jóhannsdóttir greindi frá grænu bókhaldi sveitarfélagsins. Það er álit KPMG að skýrslur Sveitarfélagsins Hornafjarðar um grænt bókhald fyrir árið 2017 sé gert í samræmi við lög og reglur um innihald skýrslu um grænt bókhald og að tölulegar upplýsingar í skýrslunni eru í samræmi við þær aðferðir sem þar er gerð grein fyrir. Bæjarstjórn undirritar skýrsluna sem verður send Umhverfisstofnun til samþykktar.
Lagt fram.

Lagði til að bæjarstjórn samþykki breytingartillögu ferðaþjónustukafla aðalskipulagi sveitarfélagsins 2012-2020, skv. 30.-32.gr. skipulagslaga og vísi málinu í lögformlegt ferli.
Forseti bar tillöguna upp til atkvæða.
Samþykkt með sjö atkvæðum.

Lagði til að bæjarstjórn samþykki breytingu á aðalskipulagi við Háhól og fyrirliggjandi lýsingu, skv. 30- 32.gr. skipulagslaga nr. 123/2010 og vísi málinu í lögformlegt ferli.
Forseti bar tillöguna upp til atkvæða.
Samþykkt með sjö atkvæðum.

Lagði til að bæjarstjórn samþykki deiliskipulagstillöguna og vísi henni í lögformlegt ferli skv. 40. gr. skipulagslaga.
Forseti bar tillöguna upp til atkvæða.
Samþykkt með sjö atkvæðum.

Ásgrímur lagði til að bæjarstjórn taki undir bókun sem hann las upp. "Samkvæmt aðalskipulagi Sveitarfélagsins Hornafjarðar 2012-2030 er hið umsótta land við Hornafjarðarhöfn, austan við Ásgarð, á svæði þar sem Akurey SF-52 stendur og er landið á svæði sem skilgreint er sem hafnarsvæði (H), verslun og þjónusta (VÞ) og miðsvæði (M), skv. núgildandi aðalskipulagi. Til að hugmyndir umsækjanda geti orðið að veruleika þarf að breyta að hluta landnotkunarflokki hafnarsvæðis í miðsvæði eða verslun- og þjónustu
Með vísan til gildandi aðalskipulags við hafnarsvæðið og skilgreiningar landnotkunarflokksins hafnir í skipulagsreglugerð, er ljóst að fyrirhuguð hótel bygging er hvorki í samræmi við landnotkunarflokk svæðisins samkvæmt skipulagsreglugerð né skilmála aðalskipulags. Verður ekki hjá því komist að breyta landnotkun svæðisins í miðsvæði eða verslun- og þjónustu. Jafnframt þarf að breyta deiliskipulagi, merkt M1 og deiliskipulagi við nýjan Óslandsveg, merkt VÞ34. Aukin heldur þarf að stofna nýja lóð áður en til úthlutunar byggingarréttar kemur.

Meirihluti bæjarstjórnar telur hugmynd aðila áhugaverða, raunhæfa og mikilvæga fyrir áframhaldandi þróun og uppbyggingu ferðaþjónustunnar á Höfn og eru þau sjónarmið lögmæt. Auk þess er hugmyndin ný og spennandi. Umfang verkefnisins er stórt og hefur jákvæð áhrif á atvinnuþróun í samfélaginu með fjölgun starfa og fjölbreyttari atvinnutækifæri.
Bæjarstjórn leggur til að samþykkt verði viljayfirlýsing við Gísla Má Vilhjálmsson þar sem hótelbygging verði heimiluð að uppfylltum skilyrðum og honum veittur 12 mánaða frestur til að klára vinnu að fjármögnun verkefnisins. Bæjarstjórn leggur jafnframt á það áherslu að breytingar á skipulögum verði kostaðar af umsækjanda ásamt öðru því kynningarefni sem leggja þarf til."
Lagði til að bæjarstjórn samþykki að gerð verði viljayfirlýsing við Gísla Má Vilhjálmsson.
Til máls tók Páll Róbert Matthíasson. Guðbjörg Lára lagði fram eftirfarandi bókun:
"Ég vil undirstrika bókun mína á neitun minni gegn viljayfirlýsingu varðandi byggingu hótels á vesturenda hafnarsvæðisins í bæjarráði. En búið er að skipuleggja lóðir fyrir svona starfsemi rétt vestan við þetta svæði með stórkostlegu útsýni yfir fjörðinn og jöklana. Mér finnst varhugavert þegar verið er að breyta deiliskipulagi sem lagt hefur verið fjármagn og vinnu í eftir hentisemi fjáraðila. Þetta er mjög mikilvægt svæði miðbæjar Hafnar, en með byggingu hótels þá hverfa möguleikar á ýmis konar draumum um að hægt væri að nýta miðsvæðið til sjávartengdra verkefna og minnisvarða. Þá er vert að nefna að Hafnarstjórn setti sig á móti þessari tillögu og það hefur verið virt að vettugi. En ég tel að þessi bygging þrengi að atvinnustarfsemi hafnarsvæðisins og muni hafa mikil áhrif á framtíðarmöguleika hafnarinnar. Á teikningum er ekki gert ráð fyrir bílastæðum fyrir hótelið og sé ég ekki í hendi mér að þessi lóð og svæði hafi rými til að hýsa stæði fyrir hótel. Einnig er útlit hótelsins ekki í samræmi við hugmyndina Hafnarvík Heppa, uppbygging gamalla bygginga á Hafnarsvæðinu í sem upprunalegasta stíl.

Þá vil ég benda á að lykt frá hafnarvinnslu er óumflýjanleg og dæmi hafa sýnt víðsvegar um landið að það hefur alltaf haft í för með sér óánægju íbúa og gesta á þeim svæðum sem hefur verið byggt í kring um starfsemi sem lykt fylgir."
Einnig tók til máls Sæmundur Helgason og tók undir að málið verði sett í íbúakosningu.
Páll Róbert tók við fundarstjórn. Til andsvars Ásgrímur Ingólfsson.
Sæmundur Helgason svarar andsvari.
Guðbjörg Lára bar upp tillögu: lagði til að málið um uppbyggingu í ferðaþjónustu á Höfn verði sett í íbúakosningu.
Forseti bar tillöguna upp til atkvæða, fellt með fjórum atkvæðum b. lista gegn þremur atkvæðum D. og E. lista.

Forseti bar tillögu um viljayfirlýsingu við Gísla Má upp til atkvæða.
Samþykkt með fjórum atkvæðum B lista á móti þremur atkvæðum D og E lista.

Lagði til að bæjarstjórn samþykki grenndarkynninguna þar sem hún samræmist aðalskipulagi sveitarfélagsins. Forseti bar tillöguna upp til atkvæða.
Samþykkt með sjö atkvæðum.

Forseti bar umsóknina upp til samþykktar. Bæjarstjórn samþykkti með sjö atkvæðum að úthluta lóðinni til umsækjanda.

Bæjarstjóri greindi frá störfum sínum síðastliðinn mánuð.