Bæjarstjórn Hornafjarðar

Ársreikningur Sveitarfélagsins Hornafjarðar 2023 lagður fram til síðari umræðu í bæjarstjórn.

Mannréttindastefna sveitarfélagsins Hornafjarðar hefur verið samþykkt í fastanefndum sveitarfélagsins. Fjölbreytni, jöfn meðferð og vernd gegn mismunun í víðum skilningi er leiðarstef Sveitarfélagsins Hornafjarðar og markmið stefnunnar er að uppfylla allar kröfur laga og reglna um mannréttindi.

Endurnýjaður samningur um samræmda móttöku flóttafólks lagður fram til staðfestingar. Samningurinn tekur til þjónustu sveitarfélagsins vegna samræmdrar móttöku flóttafólks. Samræmd móttaka flóttafólks stendur einstaklingum með vernd skv. 1. mgr. 3. gr. a. laga um málefni innflytjenda, nr. 116/2012, til boða, án tillits til þess með hvaða hætti fólkið hefur komið til landsins. Markmið samningsins er að samræma móttöku flóttafólks þannig að ríki og sveitarfélög tryggi flóttafólki samfellda og jafna þjónustu óháð því hvaðan það kemur.

Viljayfirlýsing á milli Sveitarfélagsins Hornafjarðar og Bríetar leigufélags um uppbyggingu á leiguíbúðum í Sveitarfélaginu Hornafirði lögð fram.

Á fundi bæjarráðs 9. apríl sl. tók bæjarráð upp ákvörðun sína frá 6. janúar 2021, um að hafna erindi lóðarhafa um endurgreiðslu gatnagerðargjalda að Hagaleiru 11. Endurupptaka málsins fór fram í ljósi bréfs Innviðaráðuneytisins, dags. 6. mars 2024, sem bar yfirskriftina: Fyrirmæli innviðaráðuneytisins skv. 3. tölul. 2. mgr. 112. gr. sveitarstjórnarlaga nr. 138/2011. Í niðurlagi bréfsins koma fram þau fyrirmæli ráðuneytisins að fella úr gildi ákvörðun bæjarráðs frá 6. janúar 2021 um að hafna beiðni málshefjanda um niðurfellingu gatnagerðargjalda vegna Hagaleiru 11 á Höfn og taka beiðni málshefjanda til lögmætrar meðferðar.Til grundvallar nýrri ákvörðun leitaði bæjarráð enn á ný ráðgjafar óháðs lögmanns um málið. Niðurstaða bæjarráðs var sú að á grundvelli þeirra laga og reglna sem málið byggir á væri ekki heimild til að samþykkja beiðni lóðarhafa að Hagaleiru 11 um niðurfellingu gatnagerðargjalda og var beiðninni því hafnað að nýju, með vísan til gjaldskrár embættis byggingar- og skipulagsfulltrúa, sem í gildi var við úthlutun lóðarinnar þann 6. október 2020 og hjálagðrar greinargerðar, þar sem gerð er ítarleg grein fyrir sjónarmiðum bæjarráðs í málinu. Samkvæmt 33. gr. samþykktar um stjórn og fundarsköp Sveitarfélagsins Hornafjarðar skulu mál sem eru endurupptekin af bæjarráði lögð fyrir bæjarstjórn til endanlegrar afgreiðslu.

Á fundi bæjarráðs 9. apríl sl. tók bæjarráð ákvörðun sína, frá 15. febrúar 2023, um að hafna beiðni lóðarhafa að Álaleiru 15 um endurgreiðslu gatnagerðargjalda til endurskoðunar að beiðni lóðarhafa. Bæjarráð fór ítarlega yfir beiðni lóðarhafa og taldi að álagning gatnagerðargjalda væri í samræmi við þær reglur sem voru í gildi á þeim tíma sem lóðinni var úthlutað, þann 9. júní 2022 og var beiðninni hafnað á þeim grundvelli.Samkvæmt 33. gr. samþykktar um stjórn og fundarsköp Sveitarfélagsins Hornafjarðar skulu mál sem eru endurupptekin af bæjarráði lögð fyrir bæjarstjórn til endanlegrar afgreiðslu.

Bjarni Ingvar Bergsson sækir um byggingarheimild fyrir 343,5 m2 skemmu í landi Viðborðsels. Ekki er til gildandi deiliskipulag fyrir svæðið en samkvæmt aðalskipulagi er um landbúnaðarland að ræða.

Umsókn Gröfuþjónustu Olgeirs ehf. um lóð að Sæbraut 4. Bæjarráð er jákvætt fyrir lóðarúthlutuninni.

Tillaga að deiliskipulagi Leiðarhöfða var auglýst frá 24. janúar með athugasemdarfresti til 6. mars 2024. Tilgangur deiliskipulagsins er að móta heildstætt skipulag fyrir Leiðarhöfða og styrkja hann sem áfangastað á Höfn. Markmiðið er að skipulagið auki aðdráttarafl Hafnar sem ferðamannastaðar og dragi til sín heimamenn auk þess að uppbyggingin falli vel að landi og nærliggjandi byggð, mannvirki verði lágstemmd og rýri ekki gæði þess. Umsagnir bárust frá Umhverfisstofnun, Náttúrustofu Suðausturlands, Minjastofnun Íslands og Náttúrufræðistofnun Íslands.

Deiliskipulag Smyrlabjarga var auglýst með athugasemdarfresti frá 22. janúar til 4. mars 2024. Skipulagsgögn hafa tekið breytingum eftir auglýsingu eftir að skýrsla um minjaskráningu lá fyrir.

Erindi dagsett 18. apríl 2024 þar sem Vegagerðin óskar eftir framkvæmdarleyfi í Stígá í Öræfum til að taka efni austan við varnargarð í farvegi og lágum eyrum Stígár. Efnistakan er í námu E 66 í aðalskipulagi. Jákvæð umsögn hefur borist frá Fiskistofu.

Lögð er fram tillaga að deiliskipulagi svæðis við Hvalvörðugilslæk í landi Hofs í Öræfum. Samhliða er lögð fram tillaga að breytingu aðalskipulags.Meginmarkmið skipulagsins er að bjóða ferðamönnum upp á stoppistöð þar sem safnast er saman í sérferðir, t.d. inn á jökul eða aðrar áhugaverðar ferðir í fylgd með reyndum leiðsögumönnum. Boðið verður upp á veitingasölu og geta ferðamenn skilið bíla/farangur eftir yfir daginn og gengið eða tekið aðra farmöguleika, s.s. rútur að áhugaverðum viðkomustöðum. Ferðamönnum gefst tækifæri til að njóta náttúrunnar sem svæðið hefur upp á að bjóða með ýmsum afþreyingarmöguleikum og skapast tækifæri til að lengja viðkomutíma ferðamanna í sveitarfélaginu.

Lögð er fram tillaga að breytingu á Aðalskipulagi Sveitarfélagsins Hornafjarðar 2012-2030, vegna nýs verslunar- og þjónustusvæðis í landi Hofs í Öræfum ásamt ofanflóðamati. Samhliða er lögð fram tillaga að deiliskipulagi.Með aðalskipulagsbreytingunni er verið að auka uppbyggingu á ferðaþjónustu í Öræfum. Samhliða uppbyggingunni styrkist tekjugrundvöllur íbúa og atvinnumöguleikar í Öræfum.