Fræðslu- og frístundanefnd

Fram kom að foreldrar eru ekki ánægðir með húsnæði skólans, sérstaklega á yngra stigi og í Kátakoti. Einnig eru foreldrar óánægðir með hraða á úrvinnslu eineltismála þó einungis séu verið að vinna í þremur eineltismálum. Að öðru leyti kom foreldrakönnunin vel út.

Farið var yfir tildrög málsins og vísar fræðslu- og frístundanefnd því áfram til afgreiðslu í bæjarráði.

Sú nálgun sem hér er rædd felur í sér að í stað þess að gefa foreldrum færi á að sækja um lækkun leikskólagjalda um jól og páska með því að taka barnið úr leikskólanum þá sé leikskólinn í raun lokaður á þessum tíma en hægt sé að sækja um gæslu á leikskólanum fyrir þau börn sem þess þurfa og greitt sé aukalega fyrir hana. Þannig er reynt að skerða ekki þjónustu við þá sem nauðsynlega þurfa á henni að halda heldur frekar lokað á þjónustu til þeirra sem ekki þurfa á henni að halda. Einnig er verið að færa starfstíma leikskóla nær starfstíma grunnskóla.
Með þessu móti standa vonir til að flestir starfsmenn geti tekið að minnsta kosti helming styttingarinnar út í jóla- og páskafríi og myndi það þá létta á öðrum dögum. Einnig væri möguleiki að skoða fleiri útfærslur svo sem sambærilega lokun í tengslum við vetrarfrí og lengri lokun leikskólans í sumarfríi.
Fræðslu- og frístundanefnd styður að byrja á jóla og páskafríi og breyta reglum um starfsemi leikskóla í samræmi við það. Þetta verði gert næsta skólaár og árangur metinn eftir það. Málinu vísað til bæjarráðs.

Fræðslu- og frístundanefnd telur að um bætta þjónustu sé að ræða fyrir alla og vísar málinu til bæjarráðs til afgreiðslu.

Halldóra Guðmundsdóttir nýr formaður GHH fylgdi skýrslunni úr hlaði. Fræðslu- og frístundanefnd þakkar fyrir skýrsluna og óskar GHH til hamingju með breytingar sem gerðar hafa verið á golfskálanum en nú fer að sjá fyrir endann á þeim. Um síðustu áramót skrifaði sveitarfélagið undir nýjan samning við GHH og styrkti félagið auk þess vegna endurbóta og vonandi á hvort tveggja eftir að efla starfsemi klúbbsins.

Fræðslu- og frístundanefnd þakkar fyrir framlögð gögn og óskar HH til hamingju með glæsilegt barna- og unglingastarf. Nú er verið að leggja lokahönd á lóðaleigusamning vegna Reiðhallarinnar og þar með er löngu ferli vegna samnings HH og SVH að ljúka.

Fræðslu- og frístundanefnd þakkar fyrir greinagóða skýrslu og ársreikninga og óskar Björgunarfélaginu góðs gengis með byggingu nýrrar björgunarmiðstöðvar.

Farið var yfir stöðuna á knattspyrnuvöllunum. Vonir standa til þess að vellirnir verði í betra standi eftir þær aðgerðir sem farið verður í á næstu vikum. Eftir sumarið er mikilvægt að meta stöðuna og hvort þurfi að fara í meiri framkvæmdir.
Framtíðaruppbygging íþróttamannvirkja er til skoðunar og knattspyrnuvellirnir eru inn í þeirri skoðun líkt og skólahúsnæðið. Ljóst er að þessi vinna tekur tíma og ekki ljóst hvað verður gert né hver forgangsröðun verður. Því er mikilvægt að sinna viðhaldi og umhirðu vallanna sem best.
Knattspyrnudeildin óskaði eftir auka stuðningi við bikarleik 8. apríl þar sem hvorugur völlurinn var í keppnisástandi. Bæjarráð vill ekki skapa fordæmi með því að styrkja eina deild umfram aðra og fræðslu- og frístundanefnd tekur undir það.

Umræður sköpuðust um skýrslu Sindra og fjárhag félagsins sem hefur oft verið betri. Í haust kom ósk frá félaginu um aukinn stuðning en þar sem óljóst var hver staðan var í raun og veru og áætlanir um rekstur félagsins lágu ekki fyrir var ákveðið að bíða eftir ársreikningum og rekstraráætlun þessa árs. Töluverð vinna var í að gera ársreikningana og enn á eftir að gera rekstraráætlanir fyrir stærstu deildirnar. Sú vinna er þó farin í gang og lögð verður áhersla á vinna meira í þeim. Ljóst er að það þarf að fá kerfi sem auðveldar utanumhald um fjármál félagsins og aðstoða við yfirsýn.

Fræðslu- og frístundanefnd vísar ósk um stuðning við félagið sem fram kom i haust til bæjarráðs sem mun boða aðalstjórn og framkvæmdastjóra á fund þegar áætlanirnar um reksturinn liggja fyrir.

Það skal þó tekið fram að allar deildir eru í góðum málum fyrir utan meistaraflokka í körfu og knattspyrnu. Hjá Sindra eru 9 deildir og mikill fjöldi iðkenda og almennt mjög blómlegt starf.

Fræðslu- og frístundanefnd óskar Sindra til hamingju með blómlegt starf og óskar þeim góðs gengis við að koma rekstrarmálum í gott horf.

Fræðslu- og frístundanefnd leggur áherslu á að horft verði til framtíðaruppbyggingar skólahúsnæðis samhliða vinnu við framtíðarskipulag íþróttamannvirkja.

Óskað er eftir samtals 85% stöðuaukningu sem deilist á alla skóla sveitarfélagsins. Fræðslu- og frístundanefnd fór yfir málið og er jákvæð gagnvart þessu erindi og vísar því til bæjarráðs til afgreiðslu.

Mál lagt fram til kynningar. Fræðslu- og frístundanefnd óskar Suðursveitungum og aðstandendum Vísis til hamingju með að hafa endurvakið félagið og óskar þeim velfarnaðar í starfi og leik.

Sveitarfélagið Hornafjörður fagnar fjölbreytileikanum og í öllu starfi sveitarfélagsins er réttur alls fólks jafn.
Öll eigum við tilkall til mannréttinda óháð kynvitund, kynhneigð, litarhætti, kynþætti, kynferði, trúar, skoðana, tungu, þjóðernis, uppruna, ætternis, eigna eða annarra aðstæðna.
Því telur sveitarfélagið sig ekki eiga samleið með þeim gildum sem Samtökin 22 hefur sett sér.

Vísar nefndin að lokum í 3. grein Mannréttindayfirlýsingar Sameinuðu þjóðanna sem er svo hljóðandi:

Allir eiga rétt til lífs, frelsis og mannhelgis.

Fræðslu- og frístundanefnd þakkar Hafdísi fyrir vel unnin störf og óskar henni velfarnaðar á nýjum slóðum.