Fræðslu- og frístundanefnd

Fundargerð lög fyrir og samþykkt.

Til að byrja var farið í aðstöðu Kátakots í Vöruhúsi, þá í Kátakot í lausu kennslustofurnar bak við Hafnarskóla og þaðan í Hafnarskóla. Að endingu var farið í Heppuskóla þar sem eiginlegur fundur fór fram. Fræðslu- og frístundanefnd þakkar fyrir fróðlegar og góðar móttökur.

Niðurstöður Skólapúlsins fyrir 2.-5. bekk koma mjög vel út og óskar fræðslu- og frístundanefnd starfsmönnum Grunnskóla Hornafjarðar og nemendum til hamingju.

Vegna lélegra drena á Jökulfellsvelli var farið í að tappagata völlinn þrisvar í sumar og sanda á eftir auk þess sem hann var teinagataður á um þriggja vikna fresti eða 6 sinnum alls. Þessar aðgerðir höfðu góð áhrif á völlinn og ekki þurfti að fresta neinum leik vegna vallaraðstæðna. Stefnt er að því að vera með sama viðhald á vellinum næsta sumar.

Á Mánagarðsvelli er ekki aðstaða til að vökva en til stendur fyrir sumarið 2024 að koma upp vökvunaraðstöðu. Loftræstingin í Mánagarði er biluð en það er verið að vinna í að laga hana.

Í Íþróttahúsinu á Höfn er búið að setja tvær nýjar skotklukkur, mála svalir og laga gólf í áhorfendastúku, pússa og lakka gólf í sal. Í vinnslu eru tvær nýjar körfur sem verða upphífanlegar og glerhandrið í stað rimlahandriðs. Þetta er gert til að auka ánægju áhorfenda úr stúku íþróttahúss. Áætluð verklok eru í kringum áramót. Á næsta ári er stefnt að því að skipta um hurðar í íþróttahúsinu, setja nýtt tjald til að skipta salnum, laga vegginn við útihurðina og ýmislegt fleira. Það er líka löngu kominn tími á að skipta um útidyrahurð.

Í sundlauginni er búið að taka báða pottana í gegn, skipta um sand í sandsýjum, endurnýja báða miðlunartankana og endurkipuleggja allar lagnir við báða pottana. Það á eftir að endurnýja og endurbæta brunn í kjallara sundlaugar en ekki er komin tímasetning á það verk frá verktaka.

Að lokum sagði Gunnar Ingi frá skyndihjálparnámskeiðum sem starfsfólk sundlauga þarf að fara á árlega og námi fyrir sundlaugaverði og starfsfólk í íþróttahúsum sem er að fara í gang og Simey stendur fyrir. Þrír starfsmenn héðan ætla að því að fara í það.

Síðustu ár hefur fræðslu- og frístundanefnd haft 500.000 kr. til styrkveitinga. Óskar nefndin eftir því til bæjarráðs að þessi upphæð verði hækkuð í að minnst kosti 1.000.000 kr.

Málið kynnt. Ákveðið að taka næsta mánuð í að ræða við baklandið og kanna forsendur.

Frístundaaksturinn kom inn sem tilraunaverkefni 2020. Umræður um hvort það eigi að halda honum áfram í óbreyttri mynd. Ákveðið að taka næsta mánuð í að ræða við baklandið og kanna forsendur.

Heildarnýting á frístundastyrknum er um 73% það sem af er ári.
Fræðslu- og frístundanefnd leggur til að styrkurinn hækki úr 50.000 krónum í 75.000 krónur á ári fyrir 6-18 ára börn og úr 10 í 15 þúsund fyrir 5 ára. Málinu vísað til bæjarráðs.

Niðurstöðurnar eru áhugaverðar og verða kynntar í nefndum og ráðum á næstunni og ungmennaráð er að vinna að því að búa til myndband með niðurstöðunum.

Umræðu efnin á þinginu voru:
1. Hvað er gott á Höfn?
2. Hvað má bæta á Höfn?
3. Hvernig bætum við samfélagið?
4. Hvernig virkjum við sem fjölbreyttasta hóp ungmenna til þess að þaka þátt í samfélaginu?
Hér kemur stutt samantekt;

-Ungmennaráð er sammála að í samfélaginu líðum við ekki hegðun eins og einelti, óvirðingu og fleira. Við viljum að allir hjálpist að við að taka vel á móti allskonar fólki sem flytur hingað og að allir séu velkomnir. (Þó við vitum ekki til annars en að það hafi verið tekið vel á móti flestu fólki).
-Við teljum að ungmennahús myndi virkja mjög fjölbreyttan hóp til að taka þátt í samfélaginu. Þá er t.d. hægt að laga rústirnar fyrir aftan Miklagarð eða gömlu sundlaugina og gera það að ungmennahúsi og mögulega halda þar ungmennakvöld og böll í kjallaranum.
-Þá viljum við virkja Hornafjörð á Instagram þar sem ekkert hefur verið sett þar inn í meira en ár. Þannig geta allir fylgst betur með og unga fólkið mun örugglega fylgjast betur með líka.
-Við þurfum að vera duglegri að draga fram hvað unga fólkið er að gera. Draga fram hvaða starfsemi er í skólunum og vera með gott samstarf við unga fólkið í bænum þar sem opinberir aðilar vinna markvisst að því að hitta okkur og tala við okkur og spyrja okkur hvað við viljum.

Í næstu viku stendur til að fá erindi frá Hafnarfirði um hvernig verið er að bregðast við í leikskólamálum þar. Þetta er liður í því að skoða leikskólamál frá sem flestum hliðum. Leikskólaráði, fræðslu- og frístundanefnd, starfshópi um leikskólamál og bæjarstjórn verður boðið á þann fund. Áður hefur þessum aðilum boðist að horfa á kynningu á leikskólamálum frá Reykjavík, Vestmannaeyjum og Kópavogi sem fram fór á fjármálaráðstefnu sveitarfélaga í haust.