Fræðslu- og tómstundanefnd

Fræðslustjóri fór yfir stöðu mála þar sem m.a. kom fram að unnið er að því að hönnun nýs leikskóla á lóð Lönguhóla fari í grenndarkynningu í lok vikunnar. Kynnt voru drög að mismunandi útfærslum að hönnun og þau rædd.

Verið er að standsetja húsnæði í Hofgarði og girða af lóð til þess að geta hafið leikskólastarfsemi í húsinu.

Áætlun um samstarf Grunnskólans í Hofgarði og Grunnskóla Hornafjarðar lögð fram til umræðu. Hún er sniðin að því að mæta þörfum unglinga í Öræfum. Fræðslu- og tómstundanefnd líst vel á áætlunina og hvetur til þess að skólarnir fái að vinna í samræmi við hana.

Fjallað var um hvatningu velferðarvaktarinnar um að halda kostnaði vegna skólagagna nemenda í lágmarki. Fram kom að grunnskólar sveitarfélagsins halda kostnaði í lágmarki og hvetja til endurnýtingar m.a. stílabóka og ritfanga.

Kynntar voru nýjar verklagsreglur um starfsemi fagráðs eineltismála í grunnskólum. Ákveðið var að skólarnir setji upplýsingar um fagráðið inn í eineltisáætlanir sínar.

Jóhann fór yfir rekstur tónskólans og hlutfall skólagjalda af honum. Fram kom að skólagjöld nema um 6.64% af rekstrarkostnaði skólans sem er í lægri kantinum samanborið við nokkur önnur sveitarfélög. Fræðslu- og tómstundanefnd leggur til að skólagjöld Tónskólans hækki um 12% á næsta skólaári. Nefndin felur starfsmönnum að skoða æskilega reiknireglu skólagjalda og vinna drög að markmiðum og stefnu sveitarfélagsins í gjaldskrármálum. Fram kom að vegna kennaraskorts er ekki hægt að halda úti forskólastarfi skólans í samvinnu við GH í óbreyttri mynd.

Farið var yfir reglur sveitarfélagsins um akstur foreldra í dreifbýli vegna þátttöku barna þeirra í íþrótta- og tómstundastarfi fjarri heimili og reglur um akstur foreldra í dreifbýli með börn í leikskóla. Fræðslu- og tómstundanefnd felur starfsmanni að endurskoða reglurnar og samræma þannig að jafnræðis sé gætt.

60. Fundargerð velferðarteymis lögð fram til kynningar og umræðu. Fræðslu- og tómstundanefnd ítrekar álit sitt um að ráðinn verði tómstundafulltrúi sem beri ábyrgð á frístundastarfi í sveitarfélaginu og stýri verkefninu Heilsueflandi samfélag. Einnig er brýnt að auglýsa eftir starfsmönnum í Þrykkjuna.

Farið var yfir drög að umhverfisstefnu og starfsmanni nefndarinnar falið að senda tillögur hennar til umhverfisnefndar í tölvupósti.