Fræðslu- og tómstundanefnd

Nefndarmenn byrjuðu fundinn með heimsókn í nýja leikskólann og fannst þeim ánægjulegt hve framkvæmdum miðar vel og hve öllu virðist vera haganlega fyrirkomið.

Fræðslu- og tómstundanefnd fjallaði um ósk stjórnenda leikskólans um þrjá viðbótar starfsdaga áður en starfsemi hefst í nýjum leikskóla í ágúst. Dagarnir eru skipulagðir í flutninga, uppstilllingar og skipulag á deildum og sameiginleg námskeið þar sem allir starfsmenn deilda fá sömu grunnfræðslu m.a. í Uppeldi til ábyrgðar, heilsueflandi leikskóla, tákn með tali, auk þess verður eldhússtarfsfólki boðið upp á sérstaka fræðslu um næringu o.fl. Nefndin hrósar leikskólastjóra fyrir skipulagt og vel útskýrt erindi og samþykkir framlagða ósk stjórnenda.

Leikskólastjóri lagði fram viðbragðsáætlun við því þegar margir starfsmenn eru frá vinnu á sama tíma vegna veikinda eða veikinda barna. Komið hefur fyrir að það vanti 10-15 manns og það gerir alla starfsemi mjög erfiða. Fræðslu- og tómstundanefnd telur það til mikilla bóta að foreldrar viti fyrirfram til hvaða skipulagðra viðbragða verður gripið í slíkum aðstæðum og samþykkir viðbragðsáætlunina.

Nefndin þakkar forstöðumanni Vöruhúss og verkefnastjóra Fab Lab smiðju fyrir greinargóða skýrslu. Í umræðum um skýrsluna kom fram að smiðjan er alfarið rekið á kostnað Sveitarfélagsins og hefur verið frá upphafi. Eina aðkoma Nýsköpunarmiðstöðvar Íslands (NMÍ) hefur verið fjárframlag í eitt skipti til tækjakaupa og aðgangur verkefnastjóra að samstarfsneti smiðjanna. Afrakstur kennslumyndbanda sem verkefnastjórinn hefur unnið er notað í kennslu í framhaldsskólum víða um land.

Fræðslu- og tómstundanefnd hvetur til þess að Atvinnu- og nýsköpunarráðuneytinu og verði send skýrsla um þá vinnu sem fram hefur farið í Fab Lab Hornafirði síðustu þrjú ár. Samhliða skýrslunni verði sent inn erindi þar sem farið er fram á að ráðuneytið og NMÍ upplýsi sveitarfélagið um með hvaða hætti þessar stofnanir hugsa sér að styðja við nýsköpun á landsbyggðinni til framtíðar.

Eygló lýsti því að hér eins og annars staðar voru nemedur að detta út og inn af vefnum í próftökunni. Hún lýsti aðdáun sinni á einbeitingu nemenda þrátt fyrir þessa ágalla, en þau héldu þetta út og luku prófunum. Þetta er í þriðja sinn sem samræmd próf eru tekin rafrænt og hefur gengið vel fram að þessu.

Farið var yfir upplýsingar um Písa prófið sem lagt verður fyrir þann 10. apríl n.k. í 10. bekk og tekur um þrjá og hálfan tíma. Hvatt var til þess sveitarfélög umbunuðu nemendum með einhverjum hætti s.s. með því að bjóða upp á morgunverð eða pítsur eða eitthvað þess háttar. Skólastjórnendur leggja til að nemendum verði boðið í pítsur í lok prófdags og er nefndin hlynnt því.

Fundargerð 79. fundar velferðarteymis lögð fram til kynningar.