Fræðslu- og tómstundanefnd

Hildur Ýr fór yfir starf verkefnastjóra fjölmenningar á síðasta ári. Í máli hennar kom m.a. fram að hún telur mikilvægt að hafa á bak við sig hóp sem hún getur átt samtal og samráð við um fjölmenningarmál. Fræðslu- og tómstundanefnd leggur til að stofnaður verði fjölmenningarhópur sem sinni þessu hlutverki og til að vinna markvisst að framgangi fjölmenningar í sveitarfélaginu. Nefndin leggur til að hópurinn verði skipaður fulltrúum úr fræðslu- og tómstundanefnd, félagsmálanefnd, atvinnumálanefnd, menningarmálanefnd, heilbrigðis- og öldrunarnefnd og ungmennaráði. Hugmyndinni er vísað til nánari umfjöllunar og afgreiðslu í bæjarráði.

Farið var yfir ábyrgð og skyldur fræðslunefnda samkvæmt lögum um leikskóla og gátlista þar um. Fram kom að vinna við skólanámskrá er í fullum gangi og áætlað er að hún verði tilbúin í vor. Ákveðið að leggja drög af námskránni fram til umfjöllunar á fundi nefndarinnar í júní.

Farið var yfir ábyrgð og skyldur fræðslunefnda samkvæmt lögum um grunnskóla og gátlista þar um. Fram kom að skólanámskrá er endurskoðuð árlega. Starfsáætlun er gefin út árlega. Ákveðið að fara yfir það á skólastjórafundi hvaða atriði eiga heima í starfsáætlun sem lögð er fyrir nefndina og hversu ítarleg hún ætti að vera. Rætt var um húsnæði Kátakots og að það stefni í að það verði of lítið miðað við vaxandi aðsókn. Starfsmönnum falið að kanna reglur um fjölda barna á fermetra í frístund.

Árdís fór yfir aðdraganda og þróun verkefnisins sem unnið er í samvinnu við Ystad í Svíþjóð, Sönderborg í Danmörku og Narvik í Noregi. Yfirskrift verkefnisins er innleiðing heimsmarkmiða Sameinuðu þjóðanna. Áhersla sveitarfélagsins er uppbygging grænna svæða, göngu- og reiðhjólastíga á Höfn og íbúalýðræði. Í tengslum við verkefnið er verið að útbúa rafræna könnun sem kynnt verður fyrir íbúum í vor. Bartek fór yfir drög af könnuninni. Rætt var um leiðir til að ná til allra aldurshópa með könnunina.

Fræðslu- og tómstundanefnd samþykkir að veita einstaklingum 18 ára og eldri, sem skráðir eru í
meistaraflokka og afrekshópa hjá Umf. Sindra og keppa á Íslandsmótum, gjaldfrjálsan aðgang í
sundlaug Hafnar til reynslu út árið 2019. Aðgangurinn er gjaldfrjáls á undirbúnings ? og keppnistímabili íþróttagreina og gildir því ekki allt árið um kring. Skilyrði fyrir gjaldfrjálsum aðgangi þessa hóps er að Umf. Sindri útbúi nafnalista fyrir starfsmenn sundlaugar ásamt afmörkun á undirbúnings- og keppnistímabili íþróttagreina. Ekki verða gefin út sérstök sundkort af þessu tilefni heldur veitir sundlaugarstarfsmaður viðkomandi íþróttamanni aðgang á yfirstandnandi undirbúnings ? og keppnistímabili og merkir við hann á nafnalistanum. Forstöðumaður íþróttamannvirkja fer reglulega yfir nafnalista og nýtingu. Fræðslustjóra falið að innkalla áður útgefin sundkort sem Umf. Sindri hefur til umráða.

Umsóknir bárust frá þremur aðilum, Hestamannafélaginu Hornfirðingi, Hafnarkirkju og Fimleikadeild Umf. Sindra, um styrki fræðslu- og tómstundanefndar samtals að upphæð kr. 1.100.000-. Nefndin hefur kr. 500.000- til úthlutunar. Ákveðið var að veita eftirfarandi styrki: Hafnarkirkja kr. 50.000 til kaupa á föndurefni og hljóðfærum til styrktar æskulýðsstarfi. Fimleikadeild Umf. Sindra kr.300.000- til kaupa á æfingaáhöldum fyrir yngri iðkendur kr. 30.000 og kr. 270.000- til styrktar kaupum á svampgryfju. Hestamannafélagið Hornfirðingur kr. 150.000- til styrktar reiðnámskeiði fyrir börn og ungmenni.
Í umfjöllun um styrki kom fram að sveitarfélagið er eigandi að reiðskemmunni við Stekkhól en enginn samningur er í gildi milli Hestamannafélagsins Hornfirðings og sveitarfélagsins um samstarf eða afnot félagsins að skemmunni. Starfsmanni er falið að vinna að gerð samstarfssamnings milli aðila. Íris vék af fundi undir umfjöllun um umsókn Hestamannafélagsins Hornfirðings.

Föstudaginn 15. febrúar s.l. var haldið málþings um heimsmarkmið Sameinuðu þjóðanna og sveitarfélögin. Á þinginu var fjallað var um innleiðingu markmiðanna og samþættingu við stefnur sveitarfélaga. Bæjarstjórn mun í framhaldinu marka nánari stefnu um innleiðingu heimsmarkmiðanna og samþættingu við stefnur sveitarfélagsins og verða frekari skref í að endurskoða stefnu í íþrótta-, æskulýðs- og tómstundamálum tekin þegar sú ákvörðun liggur fyrir.

83. fundargerð velferðarteymis lögð fram til kynningar.

40. fundargerð Ungmennaráðs lögð fram. Fram kom að Nemendafélag FAS ætlar að nýta sér opnunardaga ungmennahúss til að koma saman. Formaður hvatti til þess að hafa opnunarviðburð í tilefni af því að heimasíða Ungmennaráðs fer í loftið.