Fræðslu- og tómstundanefnd

Mikil uppbygging í faglegri starfsemi hefur átt sér stað í nýjum sameinuðum leikskóla. Verið er að vinna nýja skólanámskrá, starfsáætlanir, skipulag innra mats, uppfylla ákvæði persónuverndarlaga o.fl Fræðslu- og tómstundanefnd samþykkir skóladagatal leikskólans Sjónarhóls með sjö skipulagsdögum þetta skólaárið. Tveir dagar í ágúst verða þá nýttir til skipulags og námskeiðahalds fyrir starfsfólk.

Leik- og grunnskóli hafa samhæft skóladagatöl sín eins og hægt er. Skóladagatal grunnskólans er samþykkt. Vakin er athygli foreldra á því að næsta skólaár er gert ráð fyrir bæði vetrarfríi í febrúar og vorfríi í apríl. Til að draga úr fjarvistum nemenda eru foreldrar hvattir til að hafa þetta í huga ef þeir hugsa sér að fara með fjölskylduna í frí.

Ljóst er að húsnæði Kátakots er of lítið til að rýma starf með 60, jafnvel 70 börnum eins og stefnir í næstu árin. Lítið rými er til viðbyggingar en þó væri hægt að setja niður viðbótarhús á púða sunnan eða
suðaustan við eystra húsið. Fræðslu- og tómstundanefnd ræddi kosti og galla ýmissa valkosta til að leysa húsnæðismál Kátakots næsta haust. Starfsmanni falið að skoða fleiri valkosti þar með talið færanlegt hús við Víkurbraut 24 og vinna kostnaðaráætlun fyrir þá.

Ársskýrsla Golfklúbbs Hornafjarðar lögð fram til umræðu. Fram kom að í fyrra var haldið námskeið sem um 30 börn og unglingar sóttu. Í framhaldinu er börnum boðið að æfa sig á vellinum þeim að kostnaðarlausu. Draumur klúbbsmanna er að stofna barna- og unglingadeild en til þess að af því geti orðið vantar PGA-golfþjálfara. Mesta fjölgun iðkenda var í kringum golfástundun kvenna.

Ársskýrsla Björgunarfélag Hornafjarðar (unglingadeildar) lögð fram til umræðu.Fram kom að nokkrir nýjir meðlimir bættust við Unglingadeildina Brand á síðasta ári.Núna eru um 10-15 unglingar í deildinni. Helstu verkefni á árinu voru:
- Kids save lives, Kjarni þess verkefnis er að kenna börnum frá 12 ára aldri endurlífgun árlega.
- Landsfundur umsjónarmanna á Akureyri, sem var síðustu helgina í september.
- Haldið landshlutamót unglingadeilda helgina 8.-10. júní í Skaftafelli fyrir unglingadeildir af suður og suðvesturhorninu, alls komu um 120 unglingar og 42 umsjónarmenn frá 13 unglingadeildum. Ekki var haldið sér námskeið fyrir 8. bekkinga því stjórnarmönnum í BFH finnst betra að leggja meiri tíma og vinnu í unglingadeildina Brand þar sem ungmenni fá fræðslu og þjálfun yfir veturinn.

Ársskýrslur aðalstjórnar UMf. Sindra og deilda lagðar fram til umræðu. Fram kom að aðsókn í greinar er oft aldursskipt t.d. fer ásókn í blak að aukast í kringum 20 ára. Sindri hefur verið að gera almenningsíþróttum hærra undir höfði með því m.a. að hvetja fólk til þátttöku það hefur borið árangur t.d. í körfubolta. Rædd var hugmynd um fjölskyldutíma í íþróttahúsinu fyrir fólk til að leika sér saman. Ferðastyrk ÍSÍ er nú deilt beint til deilda Sindra en ekki til aðalstjórnar eins og áður var. Stjórn Umf. Sindra stefnir að því að uppfylla gæðakröfur fyrir því að gerast fyrirmyndarfélag ÍSÍ. Þær kröfur gera m.a. ráð fyrir að þjálfarar séu starfsmenn á launaskrá og það aftur eykur starfamannakostnað Sindra um að lágmarki 35%. Sveitarfélagið fær síðan hluta af launagreiðslum til baka í útsvarsgreiðslum þjálfaranna. Áður voru þjálfarar verktakar. Umf. Sindri uppfyllir nú nánast öll skilyrði þess að geta orðið fyrirmyndarfélag. Umræða var um vegalengdir sem iðkendur Sindra þurfa að aka í keppnisferðir, fram kom að viðgerðarkostnaður bíla í eigu Sindra var 2,5 millj. á síðasta ári og ekið var yfir 100.000 km. Rætt var um tryggingar ökumanna sem aka í sjálfboðavinnu.

Skipulagsforsögn Alta ráðgjafastofu og fundagerðir stýrihóps frá 4. og 8. apríl sl. lagðar fram til umræðu. Fræðslu- og tómstundanefnd styður tillögur og forgangsröðun stýrihópsins.

Fræðslustjóri fór yfir gögn um skólaakstur og frístundaakstur, fjölda barna og vegalengdir. Fræðslu- og tómstundanefnd leggur til að útboð skólaaksturs feli í sér akstur 4 og 5 ára leikskólabarna og akstur 16 og 17 ára framhaldsskólanema. Starfsmanni er falið að gera könnun á mögulegri nýtingu á frístundaakstri síðdegis í sveitir til að undirbyggja ákvörðun um útboð.

Fundargerð ungmennaráðs lögð fram til kynningar.

Framhaldsskólann vantar aðstöðu til að hægt sé að sinna listnáms-,
matreiðslu- og fjallamennskukennslu svo viðunandi geti talist. Í þarfa-greining um húsnæðisþörf skólans vegna þessara greina kemur m.a. fram að FAS vill áfram samnýta list- og verkgreinastofur í Vöruhúsi með öðrum en telur brýna þörf á að fá sérhannað húsnæði fyrir sviðslistir og faglega kennslu í matreiðslugreinum. Áætlanir um það húsnæði gera ráð fyrir samnýtingu með t.d. grunnskólanum og leikfélaginu svo eitthvað sé nefnt. Skólann vantar einnig húsnæði undir búnað og kennslu í fjallamennsku. Fræðslu- og tómstudanefnd telur að bætt aðstaða fyrir nám og þróun kennslu í list- og verkgreinum með þeim hætti sem þarfagreiningin leiðir í ljós, sé brýnt samfélagsverkefni. Nefndin hvetur bæjarstjórn til að styðja við skólann um að ná mennta- og menningarmálaráðuneytinu að borðinu til viðræðna um nauðsynlega uppbyggingu á aðstöðu.

Fram kom að ákveðið hefur verið að senda út dreifibréf í öll hús á næstu dögum þar sem minnt er á landsmótið, óskað eftir sjálfboðaliðum og auglýstur íbúafundur. Íbúafundurinn verður í Nýheimum þann 8. maí n.k. kl. 20:00 en þar verður farið yfir keppnisgreinar og hlutverk sjálfboðaliða. Fræðslu- og tómstundanefnd hvetur íbúa til að mæta á fundinn og taka þátt í sjálfboðavinnu meðan á mótinu stendur og í aðdraganda þess.

Fræðslu- og tómstundanefnd fagnar frumvarpi til laga um menntun, hæfni og ráðningu kennara og skólastjórnenda við leikskóla, grunnskóla og framhaldsskóla. Nefndin telur að með þessu frumvarpi komist menn nær því markmiði að auka samfellu milli skólastiga, færa þau nær hvert öðru og stuðla að því að strax í leikskóla hefjist undirbúningur að samfellu í skólastarfi þar sem eitt skólastig tæki við af öðru. Nefndin gerir ekki athugasemdir við frumvarpið.

84. fundargerð velferðarteymis og fylgiskjöl lagt fram til kynningar.