Fræðslu- og tómstundanefnd

Jóhann lagði til að föstudagurinn 23. apríl verði starfsdagur hjá Tónskólanum eins og í grunnskólanum og að skólaslitin verði fimmtudaginn 20. maí í stað föstudagsins 21. Fræðslu- og tómstundanefnd samþykkir þessar breytingar.

Fræðslu- og tómstundanefnd samþykkir fyrirliggjandi tillögu að viðmiðum um barnafjölda á hvern starfsmann eftir aldri barnanna en stjórnendur eru jafnframt hvattir til að gæta hagræðis í mannaráðningum.

Fræðslu- og tómstundanefnd samþykkir tillögu formanns um að hefð um skerta starfsemi sem þróast hefur í leikskólum á Höfn verði hér eftir fest sem verklag og að þeir foreldrar sem skrá börnin sín í frí milli jóla og nýárs fái afslátt af leikskólagjöldum í samræmi við fjölda frídaga. Jafnframt að foreldrar leikskólabarna í Öræfum fái afslátt af leikskólagöldum þá virku daga sem leikskólinn þar er lokaður yfir jól og páska. Málinu vísað til afgreiðslu bæjarráðs.

Niðurstöður umræðna í nemendaráði, skólaráði og meðal starfsmanna grunnskólans eru þær að halda áfram að leyfa notkun snjallsíma í skólanum. Umræður sköpuðust um snjalltækjanotkun í grunnskólanum og reglur þar um. Nemendur í 1. - 6. bekk mega ekki koma með snjalltæki í skólann en í 7. - 10. bekk er það leyfilegt. Ljóst er að til að gæta jafnræðis má skólinn ekki gera ráð fyrir að allir eigi snjallsíma til að nýta í námi. Því hvetur fræðslu- og tómstundanefnd til þess að haldið verði markvisst áfram að ljúka tölvu- og iPadvæðingu skólans sérstaklega á eldri stigum.

Rannsóknin hefur verið gerð meðal 15 -16 ára nemenda á fjögurra ára fresti frá 1995. Þar er t.d. fylgst með þeim aldri þegar unglingar reykja fyrstu sígarettuna og drekka fyrsta áfengissopann, breytingum á tíðni og magni áfengisneyslu, hlutdeild bjórs, léttvíns, sterks áfengis og áfengra gosdrykkja í unglingadrykkju. Þá er fylgst með öllum helstu tegundum ólöglegra vímuefna. Jafnframt eru vandamál vegna vímuefnaneyslu metin og fylgst með breytingum á viðhorfum unglinga til mismunandi vímuefna. Hafa ber í huga við túlkun niðurstaðna fyrir Hornafjörð að árgangar eru fámennir og sveiflur geta verið verulegar milli ára.

Undir fræðslu- og félagssvið heyra átta stofnanir. Farið var yfir niðurstöðu fjárhagsáætlana þeirra og óskir um stofnbúnað. Áætlanirnar gera ekki ráð fyrir breytingum á útgjöldum milli ára.

Fræðslu- og tómstundanefnd leggur til 2.5% hækkun gjalda fyrir skólamáltíðir og fyrir skólagjöld í Tónskólanum til að halda í við verðlagsþróun. Aðrar gjaldskrár eru vísitölutengdar og uppfærast árlega í takt við þróun neysluvísitölu. Gjaldskránum vísað til afgreiðslu bæjarráðs.

Farið var yfir breytingar á reglum frá 2011 til að skerpa á tímamörkum vegna umsókna. Fræðslu- og tómstundanefnd samþykkir breytingarnar.

Fræðslu- og tómstundanefnd hvetur til þess að foreldrum verði boðið upp á námskeiðið Uppeldi sem virkar - færni til framtíðar, þeim að kostnaðarlausu til loka ársins 2022. Þá verði metið á grunni þátttöku og árangurs hvort þau verði í boði áfram. Markmiðið er að bjóða upp á tvö námskeið árlega. Málinu vísað til afgreiðslu bæjarráðs.

Farið yfir upplýsingar um fagráð eineltismála. Þeir sem geta leitað til fagráðsins eru nemendur, foreldrar/forráðamenn og starfsfólk grunn- og framhaldsskóla. Einnig aðilar sem starfa með börnum í skóla-, frístunda- eða tómstundastarfi sem hefur stoð í grunnskólalögum.

Skýrslurnar lagðar fram til kynningar.