Fræðslu- og tómstundanefnd

Nefndin ræddi kosti og galla eftirfarandi þriggja sviðsmynda um sameiningu við skóla á Höfn:
Sviðsmynd 1
Leikskólinn Lambhagi í Hofgarði verði deild í leikskólanum Sjónarhóli og Grunnskólinn í Hofgarði verði deild í Grunnskóla Hornafjarðar (GH).
Sviðsmynd 2.
Samrekinn leik- og grunnskóli í Hofgarði verði starfsstöð/deild í Grunnskóla Hornafjarðar(GH).
Sviðsmynd 3
Óbreytt skipulag - samrekinn leik- og grunnskóli sérstök eining undir stjórn skólastjóra.
Brynja skólastjóri lagði áherslu á að sviðsmynd 3 hugnaðist starfsfólki í Hofgarði best þ.e. að halda óbreyttu skipulagi og halda þannig sérstöðu sinni. Hún lagði áherslu á að það mættu vera meiri samskipti við skólana á Höfn þótt skólinn væri áfram sérstök eining.
Fræðslustjóra falið að leggja kostnaðaráætlun um allar sviðsmyndirnar fyrir fund nefndarinnar 16. desember.
Fræðslu- og tómstundanefnd áætlar að funda með íbúum í Öræfum um málið í byrjun næsta árs.

Farið yfir niðurstöður samræmdra prófa í 4. og 7. bekk. Fundarmenn lýsa ánægju sinni yfir niðurstöðunum sem eru í flestum þáttum yfir landsmeðaltali. Þórgunnur skólastjóri telur að áherslur skólans og vinna kennaranna sé að skila sér í bættum árangri nemenda.

Brynja Dögg umhverfis- og skipulagsstjóri fór yfir tillögu Eflu að deiliskipulagi miðsvæðis á Höfn. Markmið með deiliskipulaginu er m.a að styrkja miðsvæði bæjarins umhverfis skóla- og íþróttasvæðið og efla svæðið sem aðlaðandi útivistarsvæði til samverustunda og mannfagnaðar, allan ársins hring. Fræðslu- og tómstundanefnd leggur áherslu á að tryggja þurfi nægilegt rými fyrir skólastarf í grunnskólanum til framtíðar.

Farið var yfir tilgang og markmið kjarasamninga með styttingu vinnuvikunnar og kynnt sú undirbúningsvinna sem farið hefur fram meðal starfsfólks í leikskólanum Sjónarhóli.

Reglur og gjaldskrá um útleigu á húsnæði í eigu sveitarfélagsins lagðar fram. Nefndin gerir ekki athugasemdir við þær.

Kynnt var samantekt og ályktanir í skýrslunum. Niðurstöðurnar munu nýtast sveitarfélögum til að styrkja skólaþjónustu sína með það fyrir augum að efla skóla sem faglegar stofnanir, beina athygli að menntun fyrir alla og jafnræði til náms á landsvísu. Málinu vísað til umræðu í skólunum. Fræðslu- og tómstundanefnd óskar eftir ábendingum og tillögum frá starfsfólki um úrbætur á skólaþjónustu sveitarfélagsins.

Frumdrög að hugmyndavinnu um hönnun líkamsræktarstöðvar lögð fram til kynningar og umræðu. Fræðslu- og tómstundanefnd fagnar því að undirbúningsvinna um byggingu fyrir líkamsrækt sé hafin.

Formaður Ungmennaráðs Ingunn Ósk Grétarsdóttir fór yfir fundargerð 56. fundar ráðsins. Ingunn er nýr áheyrnarfulltrúi á fundum fræðslu- og tómstundanefndar og Alexandra Hernandez er varamaður hennar. Fræðslu- og tómstundanefnd býður þær velkomnar til þátttöku á fundum nefndarinnar. Fundagerðin samþykkt.

Tvær fundargerðir lýðheilsuráðs lagðar fram. Lýðheilsuráð er samráðshópur um starf Heilsueflandi samfélags, hlutverk ráðsins er að fjalla um forvarnir á breiðum grunni ásamt aðgerðum til að stuðla að bættri almennri heilsu íbúa.

Fræðslustjóri fór yfir starf stýrihóps um Barnvænt sveitarfélag til þessa. Stýrihópurinn er staddur á 2. skrefi innleiðingarferlisins. Verið er að afla gagna um líðan, lífsskilyrði og réttindi barna svo hægt sé að búa til mælikvarða á velferð og réttindi barna í sveitarfélaginu.

Fræðslu- og tómstundanefnd styður þá hvatningu sem fram kemur í þingsályktunartillögunni og hvetur til þess að mennta- og menningarmálaráðherra, í samvinnu við Íþrótta- og Ólympíusamband Íslands, móti heildstæða stefnu um faglegan og fjárhagslegan stuðning við afreksfólk í íþróttum.