Fræðslu- og tómstundanefnd

Breytingar á reglum um starfsemi leikskóla lagðar fram og samþykktar. Nefndin samþykkti einnig breytingar á undirbúningsdögum í Leikskólanum Lambhaga og nýtt skóladagatal í samræmi við þær.

Skóladagatal Tónskóla Austur Skaftafellssýslu lagt fram og samþykkt.

Niðurstöður starfsmannakönnunar Grunnskóla Hornafjarðar lagðar fram til kynningar. Könnunin kemur í heildina vel út.

Fræðslustjóri fór yfir umsóknir sem bárust um störf í samreknum leik- og grunnskóla í Hofgarði. Fræðslu- og tómstundanefnd leggur til að Hafdís Sigrún Roysdóttir verði ráðin í starf skólastjóra. Stjórnendum falið að ganga frá ráðningum annars starfsfólks.

Í ársskýrslunni kemur m.a. fram að Unglingadeildin Brandur hittist þrisvar í mánuði fyrir Covid en eftir að faraldurinn komst á strik var gert hlé á starfinu þar til í janúar s.l. Hafinn er undirbúningur að því að halda Landsmót unglingadeilda á Höfn nú í byrjun sumars en kannski ólíklegt að af því geti orðið.

Í ársskýrslunni kom m.a. fram að Golfklúbburinn hélt tvö vikunámskeið fyrir börn og unglinga s.l. sumar og að þau þurfa ekki að greiða fyrir aðgang að vellinum. Jafnt og þétt hefur fjölgað í klúbbnum og eru meðlimir nú um 130 talsins. Unnið er að breytingum á gólfskálanum og á komandi sumri er gert ráð fyrir að bjóða upp á golfnámskeið fyrir börn og unglinga.

Lárus Páll Pálsson framkvæmdastjóri UMf. Sindra fór yfir árangur af íþróttastarfi félagsins á síðasta ári. Í máli hans kom m.a. fram að fjöldi iðkenda er rúmlega 420 manns, verið er að reyna nýjar leiðir í þjálfun, efla áhuga, félagslega samveru og félagsþroska. Nánast 90% grunnskólanemenda í 8. - 10. bekk stunda einhverjar íþróttir en um 80% grunnskólanemenda í heild. Félagið leggur mikla áherslu á menntun þjálfara t.d. með því að styrkja þá til náms hjá sérsamböndunum. Covid 19 faraldurinn hefur haft áhrif á alla íþróttastarfsemi og finna þjálfarar fyrir dofnandi áhuga eftir því sem oftar er lokað á æfingar. Þjálfarar eru að virkja iðkendur með að setja upp og fylgja eftir æfingum á netinu. Góð reynsla er af sunnudagsopnun íþróttahússins, hún hefur leitt til aukinnar aðsóknar almennings að íþróttaiðkun.

Fræðslu- og tómstundanefnd lýsir ánægju sinni með þær áherslur sem fram koma í nýrri menntastefnu mennta- og menningarmálaráðherra um að móta framúrskarandi menntakerfi þar sem allir hafi jöfn tækifæri til náms. En nefndin leggur áherslu á að afar mikilvægt er að skólafólk hafi stuðning til að innleiða stefnuna og að það sé gert eftir tímaáætlun í viðráðanlegum skrefum. Einnig er mikilvægt kennaramenntun fylgi eftir þeim hröðu þjóðfélagsbreytingum sem orðið hafa, og framundan eru, þannig að kennarar útskrifist vel undirbúnir með hugmyndir, færni og verkfæri til að mennta nemedur á skapandi hátt til þeirrar óráðnu framtíðar sem bíður þeirra.

61. fundargerð Ungmennaráðs lögð fram. Ákveðið er að fræðslu- og tómstundanefnd fundi með ungmennaráði í félagsmiðstöðinni Þrykkjunni þann 19. maí n.k.

Uppfærðar reglur um túlka- og þýðingarþjónustu lagðar fram til kynningar.

Fræðslu- og tómstundanefnd leggur til breytingar á foreldragreiðslum og að þær verði ótímabundnar. Málinu vísað til staðfestingar bæjarráðs.

Í skýrslunni kemur m.a. fram að Ísland er í hópi 10 landa þar sem brottfall úr kennarastétt er hvað mest og streita í starfi mælist fyrir ofan meðaltal í Evrópu. Hér á landi er gert ráð fyrir fleiri tímum til starfsþróunar en í flestum samanburðarlöndunum. Ísland er einnig eitt þeirra landa þar sem gert er ráð fyrir að kennarar geti tekið tiltölulega löng leyfi frá kennslu til starfsþróunar að uppfylltum vissum skilyrðum. Ólíkt mörgum ríkjum, hefur íslensk kennarastétt ekki þurft að glíma við lítið starfsöryggi.