Fræðslu- og tómstundanefnd

Bæjarráð óskar eftir umsögn um umhverfisstefnu sveitarfélagsins frá fastanefndum.

Á fundi umhverfis- og skipulagsnefndar 3. mars kom fram sú ósk að deiliskipulag miðsvæðis yrði kynnt í fræðslu- og tómstundanefnd.

Fyrir liggja tvær kannanir, foreldrakönnun Skólapúlsins og könnun um að loka leikskólanum fyrr á föstudögum.

Arkitektastofan ArkÞing hefur tekið að sér að útfæra hugmyndir af viðbyggingu við Sjónarhól. Fyrir fundinum liggja fyrstu drög en að ýmsu þarf að huga áður en lengra er haldið.

Tilkynnt hefur verið að samræmd próf í grunnskólum falli niður árið 2022 en vinna sé hafin við hönnun nýs matstækis sem leysi samræmdu prófin af hólmi.

Árið 2019 fékk sveitarfélagið styrk frá Þróunarsjóði innflytjendamála til móðurmálskennslu barna af erlendum uppruna á Hornafirði. Um tilraunaverkefni var að ræða þar sem nemendur af pólskum uppruna fengu móðurmálskennslu. Verkefnið gekk með miklum hléum vegna Covid-19 út veturinn 2021 og fór ekki af stað í haust bæði vegna Covid-19 en einnig vantaði kennara. Nú hefur Þróunarsjóður ákveðið að bjóða þeim sem hlutu styrkinn að taka upp þráðinn að nýju þar sem útlit er fyrir að faraldurinn sé á undanhaldi. Verið er að ræða við hugsanlegan kennara og mun kennslan væntanlega fara af stað á næstu vikum.

PISA er umfangsmikil alþjóðleg könnun á hæfni og getu 15 ára nemenda í lesskilningi, læsi á náttúruvísindi og læsi á stærðfræði. Sá aldur er valinn þar sem hann markar lok skólaskyldu í flestum löndum. Könnunin sem tekin er á þriggja ára fresti nær til yfir 80 þjóða og er eina alþjóðlega samanburðarrannsóknin á frammistöðu menntakerfisins sem fram fer hér á landi. Könnunin verður lögð fyrir í Grunnskóla Hornafjarðar 30. mars.

Félagsleg og efnahagsleg staða og brotthvarf úr íslenskum framhaldsskólum er nafn á nýrri skýrslu frá Velferðarvaktinni. Í henni er fjallað um brotthvarf úr framhaldsskóla frá öðru sjónarhorni en venjulega er gert á Íslandi. Í stað þess að beina athyglinni að nálægum orsökum brotthvarfs er brotthvarf skoðað sem birtingarmynd ójafnra tækifæra í íslensku þjóðfélagi með því að beina athyglinni að félagslegum og efnahagslegum bakgrunni. Í því samhengi skipta einkum tvær mælingar máli sem eru menntun foreldra og heildartekjur fjölskyldunnar. Niðurstöðurnar benda til þess að brotthvarf sé birtingarmynd ójafnra tækifæra. Það er þó öðru fremurmenntun foreldra sem skiptir máli. Líkurnar á að hætta í ókláruðu námi eru minni því hærri sem menntun foreldra er. Niðurstöðurnar benda til þess að inngrip snemma í námsferlinum skipti máli. Meirihluti af öllu brotthvarfi á sér stað á aldrinum sautján til nítján ára. Höfundar skýrslunnar gera tillögur til úrbóta fyrir bæði grunnskólastigið og framhaldsskólastigið. Það er þó ekki eingöngu á þeirra verksviðið að bæta úr heldur verður að virkja fleiri opinbera aðila sem og foreldra.

Skólaþing sveitarfélaga sem vera átti í nóvember var flutt alfarið yfir á rafrænan vettvang og hefur það verið í gangi frá 21. febrúar og síðasti hlutinn verður 21. mars. Á þinginu hefur verið fluttur fjöldi fróðlegra erinda en einnig hafa verið haldnar málstofur um þau málefni sem á döfinni eru og má nálgast upptökur af þinginu á slóð Sambandsins https://www.samband.is/vidburdir/skolathing-sveitarfelaga-2021/

Ný norræn skýrsla veitir innsýn í áhættuþætti sem fram hafa komið í norrænum rannsóknum, svo sem einmanaleika, mikla notkun stafrænna miðla og félagslegar aðstæður. Verndandi þættir eru m.a. hreyfing og jákvæð tengsl í skóla. Í frétt á vef Landlæknisembættisins má lesa um helstu niðurstöður skýrslunnar https://www.landlaeknir.is/um-embaettid/frettir/frett/item48973/Ny-norran-skyrsla-um-ahattu--og-verndandi-tatti-fyrir-andlega-vanlidan-medal-ungmenna-

Í október skilaði Gallup samantekt um áhrifaþætti heilbrigðis 2020 fyrir Hornafjörð. Óskað var eftir samanburðarskýrslu sem nú er komin. Hægt verður að fá samskonar skýrslur fyrir árið 2022. Hægt er að nýta skýrslurnar á margvíslega vegu t.d. í markmiðasetningu fyrir heilsueflandi samfélag en einnig til að fylgjast með þróun í samfélaginu og hvernig staðan er hér miðað við annarsstaðar.

Athygli er vakin á því að opnað hefur verið fyrir tilnefningar til Íslensku menntaverðlaunanna 2022.Markmið verðlaunanna er að auka veg menntaumbótastarfs og vekja athygli samfélagsins á metnaðarfullu og vönduðu skóla- og frístundastarfi með börnum og unglingum. Verðlaunin eru veitt fyrir framúrskarandi skólastarf, kennslu, þróunarverkefni, auk sérstakra hvatningarverðlauna til einstaklings, hóps eða samtaka sem stuðlað hafa að menntaumbótum er þykja skara fram úr. Sérstök athygli er vakin á því að í ár bætist við nýr verðlaunaflokkur: Framúrskarandi iðn- eða verkmenntun, ein verðlaun veitt kennara, námsefnishöfundi, skóla- eða menntastofnun fyrir framúrskarandi starf, verk eða framlag til iðn- eða verkmenntunar. Þessi nýi flokkur er til orðinn að frumkvæði Samtaka iðnaðarins sem nú hafa gengið til liðs við þá aðila sem að verðlaununum standa. Tilnefningar þurfa að berast fyrir 1. júní, en viðurkenningarráð velur þrjár til fimm tilnefningar í hverjum flokki til kynningar á alþjóðadegi kennara 5. október. Verðlaunin verða veitt við hátíðlega athöfn í nóvember og mun RUV sýna frá afhendingunni.Nánari upplýsingar um verðlaunin og tilnefningarnar er að finna á þessari slóð: https://skolathroun.is/menntaverdlaun/