Íbúaráð - Suðursveit og Mýrar

Íbúaráð ítrekar fyrri beiðni sína um að ráðist verði sem fyrst í uppbyggingu leikvallar við Hrollaugsstaði og telur mikilvægt að börnum og fjölskyldum á svæðinu standi til boða örugg og aðlaðandi leik- og útivistaraðstaða sem nýtist jafnt íbúum sem gestum.

Jafnframt bendir íbúaráð aftur á nauðsyn þess að bæta og lagfæra núverandi leik- og útivistaraðstöðu í Holti, þar sem viðhald og endurbætur eru orðnar tímabærar til að tryggja öryggi á leiksvæðinu.

Íbúaráð óskar því eftir að sveitarfélagið setji þessi verkefni í forgang og að hafist verði handa við undirbúning og framkvæmd þeirra sem fyrst.

Í kynningu á fyrirhugaðri uppbyggingu á jörðinni Birgi kemur fram að markmið verkefnisins sé að efla ferðaþjónustu í Suðursveit með því að fjölga gistirýmum, bæta þjónustu við ferðamenn og styðja við fjölbreytt atvinnulíf á svæðinu.

Íbúaráð óskar eftir frekari rökstuðningi fyrir þessum fullyrðingum. Ljóst er að á svæðinu er þegar fjölbreytt framboð gistirýma og ferðaþjónustu, þar sem fjölmargir íbúar og fjölskyldurekin fyrirtæki hafa byggt upp atvinnu sína og afkomu á slíkri starfsemi. Því vakna spurningar um með hvaða hætti fyrirhuguð hótelbygging muni í raun efla ferðaþjónustu á svæðinu umfram það sem þegar er til staðar.

Sérstaklega er óskað eftir upplýsingum um hvaða þjónustu við ferðamenn fyrirhugað er að bæta og hvort fyrir liggi greining sem sýnir fram á skort eða vöntun á gistirýmum á svæðinu.

Íbúaráð hefur einnig áhyggjur af áhrifum slíkrar uppbyggingar á rekstrarumhverfi þeirra fyrirtækja sem þegar starfa á svæðinu. Stór hótelrekstur getur haft veruleg áhrif á samkeppnisstöðu smærri aðila. Nauðsynlegt er að meta hvort verkefnið styrki í raun atvinnulíf heimamanna eða hvort megináhrif þess verði að skapa störf sem að stórum hluta verði mönnuð af aðfluttu vinnuafli.

Íbúaráð telur mikilvægt að ákvarðanir um frekari uppbyggingu séu byggðar á traustum gögnum, raunhæfu mati á þörf fyrir aukið gistirými og heildstæðu mati á áhrifum á samfélag, atvinnulíf og byggðaþróun. íbúaráð telur að fyrirhuguð framkvæmd samræmist ekki þeim sjónarmiðum sem íbúar á svæðinu hafa almennt komið á framfæri um þróun ferðaþjónustu og uppbyggingu á svæðinu.

Íbúaráð óskar því eftir að fram fari frekari greining á þörf verkefnisins og áhrifum þess áður en ákvörðun verður tekin um breytingu deiliskipulags.

Íbúaráð telur starfstímabilið hafa verið bæði lærdómsríkt og ánægjulegt. Samstarf innan ráðsins hefur lukkast vel og tækifærið til að koma sjónarmiðum íbúa á framfæri mikilvægt.

Að mati íbúaráðs hefur verkefnið tekist vel og skapað gagnlegan vettvang fyrir umræðu og þátttöku íbúa í málefnum nærsamfélagsins. Skýr vilji er meðal ráðsmanna til að halda starfinu áfram og efla það enn frekar á komandi kjörtímabili.

Íbúaráð tekur undir ályktun Aðalfundar Búnaðarfélags Suðursveitar og hvetur bæjarstjórn til að beita sér gegn fyrirhugaðri gjaldtöku á nýja Fljótaveginum.

Íbúaráð telur að slík gjaldtaka feli í sér tvísköttun íbúa, þar sem vegaframkvæmdir og uppbygging vegakerfis eru þegar fjármagnaðar með sköttum og nýlega innleiddu kílómetragjaldi. Umrædd framkvæmd var jafnframt nauðsynleg af öryggisástæðum og liður í að fækka einbreiðum brúm á þjóðvegakerfinu.

Íbúaráð bendir á að nýi vegurinn veiti ekki þá viðbótarþjónustu sem almennt réttlætir veggjöld, svo sem tvöfaldar akreinar, aukinn hámarkshraða eða sérstaka þjónustu við vegfarendur. Gjaldtakan gæti hins vegar haft veruleg áhrif á heimamenn sem þurfa að fara leiðina reglulega vegna atvinnu, skólasóknar eða annarra nauðsynja. Jafnframt eru líkur á að aukinn flutnings- og rekstrarkostnaður vegna gjaldtökunnar mun endurspeglast í hærra vöru- og þjónustuverði á svæðinu og þannig hafa víðtæk áhrif á íbúa og atvinnulíf.

Íbúaráð skorar því á bæjarstjórn að vinna að því að heimamenn verði undanþegnir gjaldtöku eða að hún verði felld niður með öllu.