Endurnýjun Jökulfellsvallar

Fyrsti stóri áfanginn í þessari uppbyggingu og endurnýjun er hafinn með því að framkvæmdir við Jökulfellsvöll eru komnar af stað. 

Í tilefni af þessum mikilvæga áfanga í uppbyggingu íþrótta- og félagsstarfs á Höfn hyggst sveitarfélagið birta reglulegar stöðuuppfærslur og ljósmyndir af framkvæmdunum fyrir íbúa, auk þess að birta yfirlit yfir fyrirhugaðar framkvæmdir. Á þessari síðu verða birtar slíkar upplýsingar eftir því sem verkefnunum vindur fram. 

Yfirlit yfir fyrirhugaðar framkvæmdir 

Jökulfellsvöllur var síðast endurnýjaður árið 2007 þegar núverandi hlaupabrautir voru lagðar og grasvöllur endurnýjaður. Hlaupabrautirnar hafa náð endingartíma sínum og bera veruleg merki um slit. Auk þess er nýting núverandi grasvallar verulega takmörkuð utan þess tíma árs þegar veðurskilyrði eru hagstæðust, líkt og almennt á við um grasvelli á Íslandi.  Það er sérstaklega mikilvægt í ljósi lengingar keppnistímabila á vegum KSÍ. 

Helstu atriði er varðar endurnýjun á Jökulfellsvelli eru eftirfarandi: 

• Núverandi grasvelli verður skipt út fyrir gervigraskerfi sem uppfyllir gæðastaðal FIFA . Með því verður hægt að nýta völlinn yfir lengra tímabil, meðal annars yfir vetrarmánuðina, langt umfram það sem mögulegt er með náttúrulegum grasvelli. Með því að uppfylla staðalinn uppfyllir völlurinn allar gæðakröfur KSÍ auk þess að þola mikla notkun. 

• Sett verður upp vökvunarkerfi, sambærilegt við þau sem notuð eru á öðrum knattspyrnuvöllum á háu stigi á Íslandi, til að tryggja sem bestar leikaðstæður og auðvelda þrif og viðhald vallarins. 

• Gerðar verða breytingar á legu núverandi hlaupabrauta til að stækka öryggissvæði umhverfis knattspyrnuvöllinn, bæta öryggi á beygjum hlaupabrautanna og uppfylla betur viðmið KSÍ. Áfram verður þó haldið í 400 metra hlaupabraut með fjórum brautum sem uppfyllir viðeigandi kröfur. 

• Yfirborð hlaupabrautanna verður endurnýjað með nýju tartanlagi til að bæta notagildi og öryggi brautanna. 

• Aðstaða fyrir frjálsar íþróttir, svo sem í tengslum við langstökk og þrístökk, verður ennfremur lagfærð enda komin til ára sinna. 

Við hönnun nýja gervigrassins hefur verið tekið mið af fyrirhuguðum gæðakröfum sem taka gildi árið 2031 á sölu innfylliefna úr örplasti, þar á meðal gúmmíkurls sem almennt er notað. Í ljósi þessa er sveitarfélagið, í samráði við UMF Sindra, að skoða möguleika á að nota náttúruleg innfylliefni í stað hefðbundins gúmmíkurls. Ef sú leið verður farin gæti Jökulfellsvöllur orðið fyrsti gervigrasvöllur sinnar tegundar á Íslandi að nota slíkt efni. 

Áætluð framkvæmdaáætlun 

Stefnt er að því að ljúka jarðvinnu, uppsetningu vökvunarkerfis og lagningu gervigrass áður en heimaleikir UMF Sindra í Íslandsmótinu í knattspyrnu hefjast í byrjun maí 2027. 

Við lagningu tartansyfirboðs þarf hitastig að vera hærra en þegar gervigrasið er lagt, þá er gert ráð fyrir því að sú vinna fari fram í júní og júlí 2027. Hins vegar er gert ráð fyrir að hægt verði að taka nýja gervigrasvöllinn að fullu í notkun að lokinni lagningu hans og að síðari framkvæmdir við hlaupabrautirnar hafi ekki áhrif á notkun knattspyrnuvallarins. 

Rétt er að taka fram að bæði lagning gervigrass og endurnýjun tartanyfirborðs hlaupabrauta eru mjög háð veðurskilyrðum. Í báðum tilvikum þarf hitastig að ná ákveðnu lágmarki svo hægt sé að framkvæma verkið. Því ber að líta á framangreinda tímaáætlun sem áætluð markmið fremur en endanlegar dagsetningar fyrir verklok og opnun. 

Ef íbúar hafa einhverjar spurningar eða ábendingar varðandi verkefnið er þeim velkomið að hafa samband við Jack Michael Tunstall, verkefnastjóra uppbyggingar íþrótta- og skólamannvirkja, eða Trausta Magnússon, deildarstjóra þjónustu og framkvæmda, í gegnum netföngin jack@hornafjordur.is eða trausti@hornafjordur.is.