Sveitarfélagið Hornafjörður vill minna íbúa og gesti á að blautþurrkur, sótthreinsiklútar og annað rusl má ekki setja í klósett eða niðurföll.
Slíkur úrgangur leysist ekki upp eins og klósettpappír og getur valdið alvarlegum skemmdum á fráveitukerfinu.
Nýverið skemmdist dæla í fráveitukerfi sveitarfélagsins eftir að hún fylltist af blautþurrkum. Slík tjón geta valdið stíflum, bilunum og kostnaðarsömum viðgerðum sem hægt er að koma í veg fyrir með réttri umgengni.
Blautþurrkur, klútar, tannþráður, eyrnapinnar, smokkar og aðrar hreinlætisvörur eiga að fara í ruslið en ekki í klósettið.
Með því að passa hvað fer í fráveitukerfið verndum við bæði innviði sveitarfélagsins og umhverfið.