Sveitarfélagið Hornafjörður hefur opnað nýjan vef sem tekur við af eldri vef sveitarfélagsins, www.hornafjordur.is. Með nýjum vef er stigið mikilvægt skref í átt að nútímalegri upplýsingamiðlun og betri stafrænni þjónustu fyrir íbúa, fyrirtæki og aðra.
Eldri vefurinn var byggður í vefumsjónarkerfinu Eplica, sem hefur þjónað sveitarfélaginu um árabil. Kerfið er nú í útleiðingu og því var tímabært að færa vefinn yfir í nýrri og sveigjanlegri lausn sem styður betur við þarfir notenda og áframhaldandi þróun.
Nýi vefurinn er byggður í Craft CMS vefumsjónarkerfinu og vinnur með Strapi til að halda utan um efni vefsins. Þessi uppbygging gefur sveitarfélaginu aukinn sveigjanleika, betri möguleika á þróun og einfaldari leiðir til að miðla efni með skýrum og aðgengilegum hætti.
Vefurinn var unninn í samstarfi við Stefnu, sem sérhæfir sig í upplýsingatækni, hugbúnaðarþróun og notendamiðaðri hönnun.
Við hönnun og uppsetningu nýja vefsins var lögð áhersla á nútímalegt viðmót, skýrari framsetningu upplýsinga og betri notendaupplifun. Markmiðið er að íbúar og aðrir gestir vefsins geti með einföldum hætti fundið upplýsingar um þjónustu sveitarfélagsins, stjórnsýslu, menningu, framkvæmdir og annað sem snýr að samfélaginu í Hornafirði.
Með nýja vefnum koma einnig ýmsar nýjungar og endurbætur sem auðvelda íbúum að nálgast upplýsingar og nýta stafræna þjónustu sveitarfélagsins. Þar má meðal annars nefna:
Sorphirðudagatal
Íbúar geta flett upp hvenær næsta sorphirða fer fram út frá götuheiti. Þannig verður einfaldara að sjá hvaða dag sorp er sótt við viðkomandi heimili. Sjá hér
Viðburðardagatal
Á vefnum er viðburðardagatal þar sem íbúar, félagasamtök og aðrir geta sent inn viðburði til birtingar. Markmiðið er að gera viðburði í sveitarfélaginu sýnilegri og auðvelda fólki að fylgjast með því sem er fram undan. Sjá hér
Endurbætt leit
Leitin á nýja vefnum hefur verið endurbætt til muna. Nú er mun auðveldara að finna efni og upplýsingar á vefnum, en leit á eldri vef var orðin ófullnægjandi og uppfyllti ekki lengur þarfir notenda.
Laus störf í sveitarfélaginu
Á nýja vefnum er sérstakt starfatorg með síum þar sem auglýsingar um laus störf birtast. Þar er bæði hægt að finna störf hjá Sveitarfélaginu Hornafirði og hjá öðrum aðilum í sveitarfélaginu. Sjá hér
Starfsmannasíða
Á vefnum er einnig endurbætt starfsmannasíða þar sem hægt er að leita að starfsfólki eftir nafni eða sviði. Þetta auðveldar íbúum og öðrum að finna réttan tengilið innan stjórnsýslu sveitarfélagsins. Sjá hér
Vefurinn er lifandi verkefni og verður þróaður áfram á næstu misserum. Með nýrri tæknilegri uppbyggingu skapast auknir möguleikar til að bæta þjónustu, einfalda aðgengi að upplýsingum og þróa nýjar lausnir í takt við þarfir samfélagsins.
Við hvetjum íbúa til að kynna sér nýja vefinn og senda okkur gjarnan ábendingar ef eitthvað má betur fara. Slíkar ábendingar eru mikilvægur hluti af því að gera vefinn enn betri.