Fundargerð skóla, íþrótta- og tómstundanefndar 11
11. fundur
Fundur haldinn í skóla-, íþrótta- og tómstundanefnd Hornafjarðar miðvikudaginn 25. maí 2011 kl. 16:30 í ráðhúsi Hornafjarðar.
Mætt voru: Ásgerður K. Gylfadóttir, formaður, Arna Ósk Harðardóttir, Ásgeir Ásgeirsson, Lovísa Rósa Bjarnadóttir, Matthildur Ásmundardóttir, Þórgunnur Torfadóttir, Árdís Halldórsdóttir, Margrét Ingólfsdóttir, Hera Guðmundsdóttir, Herdís Tryggvadóttir, Íris H. Jóhannsdóttir, Valdemar Einarsson, Hólmfríður Þrúðmarsdóttir og Stefán Ólafsson.
1. Fundargerð 10. fundar
Engar athugasemdir gerðar.
2. Sumarstarf Sindra 2011
Valdemar Einarsson gerði grein fyrir starfi Sindra á sumri komandi - leikjanámskeið, knattspyrna, frjálsar íþróttir, sund, körfubolti og dans sem verður í ágúst. Sagði hann sumarstarfið verða hefðbundið, leikjanámskeiðin verði í júní og ágúst en ekki í júlí enda reynslan sýnt að þau væru nær ekkert sótt í þeim mánuði. Valdemar sagði aðstöðuna hafa gerbreyst með gervigrasvellinum, hann verði mikið nýttur í sumar. Einnig greint frá brennibolta, kvennahlaupi, 17. júní hátíð og humarhátíð. Upplýsingar um starfsemina mun birtast á vefnum og einnig í Eystrahorni. (Valdemar vék af fundi)
3. Starf félagsmiðstöðvar 2010 – 2011
Hólmfríður greindi frá lagfæringum á húsnæði félagsmiðstöðvar og fór yfir starfsemi hennar á starfsárinu. Greint frá markmiðum vetrarins, opnum húsum, viðburðum, starfsemi klúbba og SamAust hátíð sem haldin var á Höfn í þetta sinn. Einnig greint frá starfi ungmennaráðs. Sagði Hólmfríður mjög hafa skort á frumkvæði ráðsins og velti upp spurningum um hvernig virkja mætti ráðið betur. Þá sagði Hólmfríður að samstarf við grunnskólann hafi aukist töluvert í vetur frá því sem var. Rætt var um lán á húsnæði félagsmiðstöðvarinnar. Aðspurð sagðist Hólmfríður ekki vera ánægð með umgengni þeirra sem fengið hefðu húsið lánað á sumrin. Spurt um aðkomu þeirra sem eldri eru en 16 ára að húsnæði félagsmiðstöðvar. Kom fram að sá aldurshópur hafi lítið notað húsnæðið þrátt fyrir að það væri í boði.
(Hólmfríður vék af fundi)
4. Skýrsla rýnihóps um leikskólamál
Rýnihópurinn hélt fjóra formlega fundi og skilaði af sér skýrslu 23. maí sl.
Skóla-, íþrótta- og tómstundanefnd styður niðurstöður rýnihóps um leikskólamál. (Margrét og Hera viku af fundi)
5. Ytra mat grunnskóla, tillögur faghóps
(Þórgunnur kom inn á fundinn.) Stefán gerði grein fyrir tillögum faghóps sem skipaður var til að gera tillögur um ytra mat grunnskóla. Í faghópnum sátu sex manns, þrír frá mennta- og menningarmálaráðuneyti og þrír fulltrúar sveitarfélaga. Í tillögum faghópsins kemur m.a. fram að með sameiginlegu átaki ríkis og sveitarfélaga hafi allir skólar á landinu farið í gegnum ytra mat á fimm árum eftir að það hefur göngu sína. Í skýrslunni eru kynntar tvær tillögur um skipan matsaðila. Önnur gerir ráð fyrir að ráðnir verði fimm til sex matsaðilar sem hver og einn fengi til liðs við sig einn til tvo aðila úr heimahéruðum. Tillaga tvö gerir ráð fyrir að sett verði á laggirnar fjögur til sex landshlutateymi sem samanstanda að lágmarki af tveimur matsaðilum hvert. Einnig gert ráð fyrir að matsteymin, eins og í tillögu 1, fái til liðs við sig aðila úr nærsamfélagi skólanna til að skapa nálægð við þá. Greint frá að seinni tillagan hafi fengið mun meiri stuðning á vorþingi Grunns, félags starfsmanna skólaskrifstofa. Við matið verði m.a. lögð áhersla á kennslu og nám en rannsóknir sýna að gæði kennslu hafi meiri áhrif á frammistöðu nemenda en nokkur annar þáttur í skólastarfi. Stjórnun komi þar næst á eftir sem áhrifaþáttur á árangur nemenda.
6. Ákvörðun um opinn fund um skólamál
Skóla-, íþrótta- og tómstundanefnd samþykkir að opinn fundur um skólamál verði haldinn í sept. – okt. 2011.
7. Ósk Grunnskóla Hornafjarðar um að fá að ráða stuðningsfulltrúa fyrir skólaárið 2011 – 2012
Grunnskóli Hornafjarðar óskar eftir að fá að ráða stuðningsfulltrúa í 80% starf fyrir skólaárið 2011 - 2012. Gert er ráð fyrir að launakostnaður verði um 2,4 – 2,5 milljónir vegna þessa starfs. Þórgunnur benti á að skorin hafi verið niður sambærileg staða stuðningsfulltrúa fyrir það skólaár sem nú er að ljúka. Málið fer fyrir bæjarráð til lokaafgreiðslu.
8. Ósk foreldra nemanda í Grunnskólanum í Hofgarði um að hann geti stundað sitt nám í 8. bekk Grunnskóla Hornafjarðar á skólaárið 2011 – 2012
Greint frá framangreindri ósk og hvernig hún er til komin. Skóla-, íþrótta- og tómstundanefnd leggur til að þetta verði heimilað enda er það í samráði við það sem sagt var af hálfu nefndarinnar á fundi með foreldrum og starfsmönnum í Grunnskólanum í Hofgarði sl. vetur.
9. Ráðning í stöðu verkefnastjóra við Grunnskóla Hornafjarðar
Þórgunnur greindi frá óánægju eins starfsmanns við skólann sem beinist að því hvernig staða verkefnastjóra við skólann var kynnt (auglýst) innan skólans, þ.e. að skort hafi á að staða verkefnisstjóra hafi verið vel kynnt fyrir kennurum sem starfa við skólann og deilt var á ráðningu í stöðu verkefnastjóra. Þá var deilt á úthlutun starfa sem greidd eru úr svo nefndum potti. Þórgunnur fór yfir svarbréf skólastjórnenda til viðkomandi starfsmanns og útskýrði með hvaða hætti ferlið var við kynningu og ráðningu í stöðu verkefnastjóra. Skóla-, íþrótta- og tómstundanefnd leggur áherslu á vönduð vinnubrögð við ráðningar starfsmanna skólanna. Þórgunnur sagði að eflaust mætti bæta vinnubrögð og tímamörk við auglýsingu og umsóknir.
10. Tilkynning mennta- og menningarmálaráðuneytis um könnun á framboði valgreina á unglingastigi í grunnskóla
Til kynningar.
11. Styrkumsókn íþróttamanns, vísað til nefndarinnar af bæjarráði
Sveinbjörg Zophoníasdóttir fjölþrautarkona sækir um styrk að upphæð 500 þús. kr. vegna æfinga og keppnisferðalaga innan lands og erlendis. Fram kemur að mjög hefur dregið úr styrkjum vegna þessa frá því sem áður var, m.a. af hendi Frjálsíþróttasambands Íslands og frjálsíþróttadeildar Sindra.
Skóla-, íþrótta- og tómstundanefnd samþykkir að veita Sveinbjörgu styrk að upphæð kr. 300 þús.
12. Önnur mál
· Ósk forsvarsmanna Skólahreysti um styrk til starfseminnar. Skóla-, íþrótta- og tómstundanefnd leggur til að styrkbeiðni verði hafnað. Vill fremur auka styrki til skólans og nemenda hans vegna þátttöku í keppninni.
· Þórgunnur greindi frá ferðum með 9. bekk að Laugum í Sælingsdal sem væru mjög vel heppnaðar. Þá lagði hún til að í stað skólaferðalags 7. bekkinga til Vestmannaeyja verði farið í skólabúðir að Reykjum í Hrútafirði. Sagði hún sveitarfélagið þurfa koma sterkar að þessum þætti skólastarfsins með fjárframlögum.
· Greint frá fyrirspurn hauks Helga Þorvaldssonar forstöðumanns íþróttamannvirkja til umhverfisráðuneytis vegna túlkunar á 14. gr. reglugerðar nr. 814/2010 um hollustuhætti á sund- og baðstöðum. Svar ráðuneytisins er eftirfarandi:
„Vísað er til fyrirspurn yðar frá 9. þ.m. þar sem óskað er eftir túlkun á 14. gr. reglugerðar nr. 814/2010 um hollustuhætti á sund- og baðstöðum þar sem kveðið er á um að einungis foreldri eða forráðamaður barna megi hafa fleiri en tvö börn yngri en tíu ára með sér í sund. Óskað er eftir nánari skilgreiningu á hugtakinu forráðamaður.
Forráðamaður er einhver annar en foreldri barns og hefur forsjá yfir viðkomandi barni. Forráðamaður getur t.d. verið stjúpforeldri eða einstaklingur sem hefur fengið forsjá barnsins með samningi eða dómi. Um inntak forsjár fer samkvæmt ákvæðum barnalaga nr. 76/2003. Í 2. ml. 1. mgr. 14. gr. reglugerðar nr. 814/2010 er þar af leiðandi verið að vísa til foreldris eða annars forsjáraðila barns. Sé ekki um foreldri eða forráðamann barna að ræða má einstaklingur eldri en 15 ára ekki hafa með sér í sund fleiri en tvö börn undir tíu ára aldri. Syndur einstaklingur eldri en 15 ára má einungis hafa með sér tvö börn undir tíu ára aldri nema að hann sé foreldri eða forráðamaður.
Dæmi l: Foreldri kemur með tvö börn sín bætir við einu barni sem annað foreldri á - óheimilt ef börnin eru undir tíu ára aldri.
Dæmi ll: Foreldri kemur með þrjú börn sín en að auki með þrjú börn sem annað foreldri á - óheimilt ef börn eru undir tíu ára aldri.
Telst foreldri sem kemur með börn annarra yngri en 10 ára forráðamaður þeirra ? Nei“
· Greint frá frumvarpi til laga um breytingu á lögum um grunnskóla nr. 91/2008. Frumvarpið gerir m.a. ráð fyrir að val um námsgreinar og námssvið skuli vera allt að fimmtungi námstíma en var áður um þriðjungur.
Fundi slitið kl. 19:00
