Húsaleigubætur

Nú um áramótin verður breyting á umsóknarferli og afgreiðslu húsaleigubóta en öll umsýsla almennra húsaleigubóta færist til Vinnumálastofnunar sem er að opna sérstaka Greiðslustofu húsaleigubóta sem staðsett er á Sauðárkróki. Þessar breytingar munu hafa þau áhrif að allir þeir sem eru með húsaleigubætur í dag þurfa að sækja um að nýju til Greiðslustofu húsaleigubóta fyrir árið 2017.

Opnað hefur verið fyrir umsóknir og eru allir þeir sem þiggja húsaleigubætur í dag hvattir til að kanna stöðu sína og sækja um húsaleigubætur fyrir árið 2017 til Greiðslustofu. Nánari upplýsingar um umsóknarferlið má finna á heimasíðu Greiðslustofu húsnæðisbóta husbot.is  

Umsækjendur húsnæðisstuðnings bera sjálfir ábyrgð á því að sækja um sínar húsaleigubætur og geta nálgast húsaleigusamninga sína á bæjarskrifstofur. Sé ekki sótt um tímanlega til Greiðslustofu getur fólk misst af greiðslum enda hættir sveitarfélagið alfarið að greiða út almennar húsaleigubætur um áramótin. Hægt er að nálgast húsaleigusamninga vegna eldri umsókna í Ráðhúsinu.

Sveitarfélagið mun áfram sjá um afgreiðslu og framkvæmd vegna húsnæðisstuðnings til foreldra framhaldsskólanema á aldrinum 15-17 ára sem og sérstakra húsaleigubóta. Sveitarfélagið mun setja sér reglur vegna sérstakra húsaleigubóta og nemabóta sem verða kynntar síðar.

Húsnæðisfulltrúi annast umsóknir vegna félagslegra leiguíbúða hægt er að sækja um íbúðir á íbúagátt sveitarfélagsins.