Hljóðfæranám

Hljóðfæranám byggist að miklu leyti á reglubundinni þjálfun og er því að mestu heimanám. Án markvissra æfinga verður árangur rýr.

Hlóðfæri sem kennt er á eru:

Píanó, hljómborð, harmónika, klarínett, þverflauta, saxófónn, trompet, horn, baritone, básúna, gítar, bassi og trommur.

Tónskólinn á töluvert af hljóðfærum sem eru lánuð út til nemenda í 3 ár þeim að kostnaðarlausu, eftir það er innheimt leiga.

Forskólanám

Forskóli tónskólans er skyldunám 7 og 8 ára barna í Grunnskóla Hornafjarðar. Nemendur í 2. og 3. bekk fá tónlistarnám og kemur það til viðbótar tónmenntakennslu grunnskólans. Kennslan fer fram á skólatíma í húsnæði grunnskólans. Ekki þarf að greiða fyrir tónlistarnámið og er það tónskólinn sem hefur umsjón með kennslunni. Markmið forskólanámsins er að búa nemendur sem best undir hljóðfæranám.

2. bekkur fær tónlistarfræðslu á vegum tónskólans 1 x 40 mín. á viku en 3. bekkur kemur 2 x 40 mín á viku og þar sem kennt er í 3-6 manna hópum. Að auki fá nemendur einn tónmenntatíma á vikur þar sem allur bekkurinn er saman. Í tónlistartímum fer fram alhliða þjálfun í tónlist, en höfuðáherslan er lögð á blokkflautuna. Þar læra þau alla undirstöðuþætti hljóðfæranáms, nótnalestur og tónfræði. Auk þess er mikið sungið, hlustað, dansað og fengist við skapandi þætti.

Nemendur koma fram á tónleikum og öðrum uppákomum hjá skólanum. Í 3. bekk taka nemendur próf  í tónfræði og á blokkflautuna í lok vetrar. Áhersla er lögð á gott samstarf milli skólans og heimilanna. Ætlast er til að nemendur æfi sig samviskusamlega heima því það er undirstaða farsæls tónlistarnáms. Foreldrar þurfa ekki að kunna á blokkflautu, en mikilvægt er að hvetja börnin  áfram og sýna námi þeirra áhuga.  

Tónfræðanám

Þegar nemendur hafa lokið einu ári í námi á sitt hljóðfæri fá þau einn tíma á viku í tónfræði. Kennsla fer fram í  5 – 12 manna hópum og er kennt í 1 klst. í senn. Í tímum fá nemendur m.a. þjálfun í nótnaritun, tónheyrn, taktþjálfun, tónlistarsögu, hlustun og greiningu. Nemendur taka próf í lok námstímans. Ætlast er til að allir nemendur skólans stundi nám í tónfræði sem er mikilvægur þáttur samhliða hljóðfæranáminu og styrkir nemandann almennt. Nemandi hefur ekki að fullu lokið áfangaprófi á hljóðfærið sitt nema að hafa einnig lokið samsvarandi prófi í tónfræðagreinum.