Þetta vilja börnin sjá! er sýning á myndskreytingum úr íslenskum barnabókum. Sýningin hefur verið haldin í Gerðubergi frá árinu 2002 og er hún orðin fastur liður í starfsemi menningarmiðstöðvarinnar. Á sýningunni nú eru myndir úr bókum sem komu út árið 2012 og taka 28 myndskreytar þátt. Sýningin er farandsýning og í ár verður hún sett upp á sex stöðum utan Reykjavíkur.
Þátttakendur keppa jafnframt um íslensku myndskreytiverðlaunin sem kennd eru við Dimmalimm. Dómnefnd er skipuð þeim Aðalsteini Ingólfssyni, Halldóri Baldurssyni og Kalman le Sage de Fontenay. Úrslitin verða kunngerð við opnun sýningarinnar, kl. 14 á sunnudag. Verðlaunin eru styrkt af Myndstefi og Félagi bókagerðarmanna.