Fundargerð umhverfis- og skipulagsnefndar 22

Birgir gerði grein fyrir fyrirhugaðri dælingu úr Höfninni. Gerði hann einnig grein fyrir lausnum til að binda fok af því svæði sem dælt verður upp á.  Umhverfis- og skipulagsnefnd gerir ekki athugasemd við það að dælt verði upp á land innan Hafnar að því gefnu að öllum brögðum verði beitt til að hefta fok með þeim úrræðum sem rædd voru á fundinum.  Svo sem með bikblöndu eða yfirkeyrslu með öðru efni. 

 Björn Ingi benti á að í þessum máli sýni reynslan að um mikil óþægindi er fyrir íbúa leirusvæðisins samhliða uppdælingu og fok í framhaldi af því. Ekki er alveg augljóst að lausnir sem notaðar eru á fáförnum stöðum utan þéttbýlis séu lausnir sem nothæfar eru í þéttbýli. Það þarf að vera ljóst áður en farið er á stað í uppdælingu hvernig staðið verður að heftingu foks. Einnig þarf að huga að því að uppdæling dreifist ekki út fyrir þann varnargarð sem settur var á leirusvæðinu og átti að afmarka það svæði sem dæla átti á.

Birgir gerði grein fyrir hugmyndum að breytingum á móttökustöð fyrir endurvinnsluúrgang ef til kemur tveggja tunnu kerfi, fór hann yfir hugmyndir að breytingum á húsnæði og gámaporti.  Inn á fundinn komu einnig aðilar frá Efnamóttökunni hf og Gámaþjónustunni hf, Jón H. Steingrímsson, Gunnar Bragason og Sveinn Hannesson og gerðu þeir grein fyrir fyrirkomulagi tveggja tunnukerfi Dalvíkurbyggðar.  Gerðu þeir einnig grein fyrir reynslu sinni af endurvinnslumálaum almennt og buðu fram aðstoð við ýmsar útfærslur og val á tækjabúnaði, skipulagi á gámaporti og uppbyggingu flokkunaraðstöðu.

Lögð fram drög að starfsleyfi fyrir urðunarstaðinn á Mel í landi Fjarðar.  Starfsmönnum falið að fara yfir drög að starfsleyfi fyrir urðunarstað á mel í Landi Fjarðar með það að leiðarljósi að kanna breytingar á núverandi rekstrarfyrirkomulagi.  Björn Ingi benti á að nýtt starfsleyfi muni auka rekstrarkostnað urðunarstaðarins.  Bent var á mikilvægi þess að drögin verði einnig send á Djúpavogshrepp til yfirlestrar.

Farið yfir skipulag hreinsunarviku í endann mars 2012. Starfsmönnum falið að undirbúa hreinsunarviku í lok mars og fyrirkomulag hennar verði eins og á síðasta ári.

Umhverfis- og skipulagsnefnd vill benda á að ef Gamli vatnstankurinn verði tekin undir atvinnustarfsemi kalli það á breytingar á aðalskipulagi sem og gerð deiliskipulags. Í þeim tilfellum þarf að gæta að viðhorfi þeirra sem búa í grennd við umrætt svæði, aðgengi að því og margt annað sem huga þarf að við skipulagsgerðina. Nefndin beinir því til bæjarráðs að áður en nokkuð annað verði ákveðið í málinu að kanna ástand hússins með það fyrir augu að kanna raunhæfni þess að útbúa húsið fyrir atvinnurekstur og meta heildarkostnað sem gæti fallið á sveitarfélagið við skipulagsgerðina og framkvæmdir sem falla mundi á sveitarfélagið vegna þess, áður en nokkuð annað er ákveðið.  Einnig að óskað verði eftir viðskiptaáætlun vegna framkvæmdarinnar.