Fundargerð bæjarstjórnar 123
123. fundur
Fundur haldinn í Bæjarstjórn Hornafjarðar, fimmtudaginn 15. nóvember 2007, kl. 16:00 í Nýheimum
Mætt voru: Árni Rúnar Þorvaldsson forseti bæjarstjórnar, Reynir Arnarson, Gunnar Sigurjónsson, Gunnar Ingi Valgeirsson, Guðrún Ingimundardóttir, Björn Ingi Jónsson og Halldóra B. Jónsdóttir. Einnig Hjalti Þór Vignisson bæjarstjóri, Ásta H. Guðmundsdóttir, Stefán Ólafsson og Haukur Ingi Einarsson.
Forseti setti fund og bauð fundarmenn velkomna. Einnig bauð hann Gunnar Inga Valgeirsson varabæjarfulltrúa sérstaklega velkominn á sinn fyrsta fund í bæjarstjórn.
1. Fundargerðir
- Bæjarráð Hornafjarðar, 397. fundur, dags. 1. nóvember 2007.
- Byggingar- og skipulagsnefnd Hornafjarðar, 82. fundur 18. október 2007.
- Félagsmálaráð Hornafjarðar, 171. fundur 23. október 2007.
- Heilbrigðis- og öldrunarráð Hornafjarðar, 85. fundur 24. október 2007.
- Húsnæðisnefnd Hornafjarðar, 78. fundur 25. október 2007.
- Skólanefnd Hornafjarðar, 97. fundur 24. október 2007.
- Æskulýðs- og tómstundaráð Hornafjarðar, 93. fundur 18. október 2007.
- Starfshópur um félagslíf grunnskólanema, 2. fundur 23. október 2007.
- Fundargerð 747. fundar stjórnar sambands ísl. sveitarfélaga 29. október 2007.
Halldóra Bergljót ræddi fundargerð byggingar- og skipulagsnefndar og gerði að umtalsefni fyrirhugaða staðsetningu kirkjugarðs á Höfn. Sagðist koma af fjöllum ef ákvörðun um það hafi verið tekin og taldi það ekki hafa verið rætt í bæjarráði og bæjarstjórn um alllangt skeið. Einnig ræddi hún á nauðsyn þess að aðal- og deiliskipulag verði tekin til meðferðar í nefndum sveitarfélagsins. Þá fjallaði hún um skautasvell sem fjallað var um í æskulýðs- og tómstundaráði. Benti á að slíkt svell hafi hún séð staðsett á einu aðaltorgi ákveðins bæjar í Danmörku. Benti á að skoða mætti miðbæjarsvæðið og svæði nærri íþróttavöllum.
Halldóra ræddi stöðu þjónustusamnings um heilbrigðis og öldrunarmál við ríkið. Hún sagði að enn hafi hvorki bæjarstjórn eða bæjarráð skipað samninganefnd, eða veitt neinum umboð, til að vinna að gerð nýs þjónustusamnings við ríkið, þrátt fyrir að samningar hafi verið lausir frá 1. janúar síðastliðnum. Hvergi í fundargerðum bæjarstjórnar eða bæjarráðs síðastliðið eitt og hálft ár sé að finna tillögu eða samþykkt um samninganefnd. Því hafi í raun enginn umboð til að ganga til samninga fyrir hönd bæjarstjórnar. Mismunandi hafi verið hverjir hafi komið að þessu og engin festa verið í undirbúningi hér heima og því erfitt að henda reiður á hver staðan er frá einum tíma til annars. Hún óskaði eftir að fá skriflegt yfirlit frá bæjarstjóra yfir fundi og annað sem átt hefur sér stað í þessu máli síðastliðið eitt og hálft ár. Halldóra sagðist leggja ríka áherslu að vel sé vandað til allra verka við allan undirbúning. Hún minnti á orð þingmanna Suðurkjördæmis í heimsókn þeirra til Hornafjarðar í síðasta mánuði um mikilvægi þess að bæjarstjórn sé samstillt í þessu samningaferli. Þá sagði hún þingmenn hafa bent á að samningar við heilbrigðis- og tryggingaráðuneytis séu þeir erfiðustu og flóknustu sem hægt sé að komast í.
Halldóra lagði fram eftirfarandi tillögu sjálfstæðismanna:
Mikilvægt er að góð samstaða ríki í bæjarstjórn við gerð þjónustusamning við ríkið um heilbrigðis- og öldrunarmál. Allra leiða þarf að leita til að tryggja sem besta niðurstöðu og því nauðsynlegt að bæjarstjórn stilli saman strengi og vinni saman að þessu mikilvæga hagsmunamáli allra íbúa samfélagsins.
Því samþykkir Bæjarstjórn Hornafjarðar að skipaður verði 5 manna starfshópur til að vinna að þjónustusamningi við ríkið um heilbrigðis- og öldrunarmál. Í þennan hóp skipi hvert framboð sem fulltrúa eiga í bæjarstjórn sinn fulltrúa auk þeirra eigi þar sæti framkvæmdastjóri sveitarfélagsins og framkvæmdastjóri heilbrigðisstofnunarinnar.
Reynir Arnarson ræddi endurskoðun á aðalskipulagi sagði að verið væri að vinna að undirbúningi að staðsetningu nýs kirkjugarðs og rifjaði upp fyrri umræðu um það mál. Á sínum tíma hafi nokkrir staðir verið skoðaðir og þá hafi menn verið sammála um einn stað, skammt frá Gömlubúð. Hins vegar liggi ekki fyrir nein ákvörðun um staðsetningu.
Hjalti Þór sagðist skilja bókun byggingar- og skipulagsnefndar svo að engin ákvörðun hafi verið tekin um staðsetningu kirkjugarðs. Hann sagði byggingu knattspyrnuhúss vera mikilvæga framkvæmd. Unnið væri að því máli, þar á meðal mögulegar staðsetningar. Hann fagnaði ábendingu Halldóru um staðsetningu skautasvells. Þá ræddi hann um þjónustusamning um heilbrigðismál. Ræddi í því sambandi breytta verkskiptingu á milli ráðuneyta. Hann sagði samningaferlið hafa verið þannig að margir hafi komið að málinu þó ekki hafi verið formlega frá því gengið hverjir hafi staðið í samningunum. Hann ræddi stöðu Akureyringa í samningum um sama málaflokk. Hann sagðist og reikna með að bæjarráð verði hans bakhjarl í samningum við ríkið.
Árni ræddi skiplagsmál og tók undir með Halldóru um að halda þurfi vel á þeim málum. Hann ræddi þjónustusamning um heilbrigðismál. Sagði hann brýnt að ríkisvaldið klári sín mál varðandi verkaskiptingu á milli ráðuneyta sem fyrst. Árni fjallaði um heilbrigðisþjónustu í dreifbýli og nauðsyn þess að stjórnvöld setji sér stefnu í þeim málum. Hann ræddi hugmyndir Halldóru um starfshóp. Taldi það ekki tímabært, taldi málið statt í bæjarráði. Flutti hann breytingatillögu við tillögu sjálfstæðismanna sem er á þessa leið:
Því samþykkir Bæjarstjórn Hornafjarðar að bæjarráði Hornafjarðar verði falið að vinna að þjónustusamningi við ríkið um heilbrigðis- og öldrunarmál í samstarfi við framkvæmdastjóri sveitarfélagsins og framkvæmdastjóri heilbrigðisstofnunarinnar.
Björn Ingi ræddi heilbrigðismálin sagði mjög æskilegt að allir flokkar komi að því máli. Þá ræddi hann fundargerð skólanefndar þar sem fjallað er um lengda viðveru. Sagði að ganga þurfi lengra í lækkun gjalda fyrir hana, svo sem um systkinaafslátt á milli skólastiga. Spurði hann hvort reiknaður hafi verið kostnað við slíkan viðbótarafslátt.
Reynir ræddi um gjaldtöku vegna lengdrar viðveru. Hann sagði að rætt hafi verið um þessa hluti. Sagðist hann vera tilbúinn að ræða þau mál frekar.
Hjalti þakkaði umræðu um fjölskyldustefnu. Benti á að annað árið í röð væru leikskólagjöld ekki hækkað sem þýddi vaxandi útgjöld fyrir sveitarfélagið. Þá fjallaði hann um hugmyndir að fjölskyldustefnu fyrir sveitarfélagið.
Árni fjallaði um fjölskyldustefnu og þakkaði þeim fallega jafnaðarmannahljómi sem var í málflutningi Björns Inga. Sagði að stigin hafa verið lítið skref í þá átt að lækka gjöld vegna leikskóla og lengdrar viðveru.
Björn Ingi sagðist telja að nú væri búið að eyrnamerkja sig viða alla flokka í byggðarlaginu. Sagði hann að stíga þurfi stærri skref í lækkun gjalda fyrir leikskóla og lenda viðveru. Þau skref þurfi að stíga fyrr en með fjárhagsáætlun 2009, menn þurfi að einhenda sér í að finna einhverja lausn á fyrsta ársfjórðungi næsta árs.
Halldóra sagði athyglisvert hve fáir vildu tjá sig um heilbrigðis- og öldrunarmál. Fór hún yfir mál sem sjálfstæðismenn hafa stuðlað að ýmsu í málefnum fjölskyldunnar. Þá ræddi hún mikilvægi innisundlaugar, einkum fyrir börn, fatlaða og aldraða. Taldi hún að sú framkvæmd væri nú komin á ?hold?. Þá fór hún yfir tillögur um heilbrigðismál. Taldi hún að meirihlutinn væri hræddur við sig, vildi haga því þannig að meirihlutinn treysti ekki framboðunum að velja sinn fulltrúa. Þá rakti hún gang mála og ræddi mismunandi skipan þeirra hópa sem komu að samningamálum um heilbrigðismálin. Halldóra fór og yfir ýmis atriði sem fram hafa komið í samningsdrögum heimamanna um málaflokkinn til þessa, svo sem orðalag og atriði sem ekki koma fram en nauðsynleg eru að hennar mati. Þá sagðist hún fegin þeim sinnaskiptum sem orðið hafa með því að bæjarráð skipi samninganefndina þó að í því felist um leið að hennar mati að verið sé að velja hverjir sitji við samningaborðið að hálfu heimamanna. Þá óskaði hún eftir svörum frá meirihlutanum um hvernig bæjarráð ætli að vinna að samningamálunum um heilbrigðismál og minnti menn á mikilvægi samstöðu heimamanna.
Reynir ræddi um meinta hræðslu sem Halldóra gerði að umtalsefni. Hann sagðist hræddur við ýmislegt en ætlaði ekki telja það upp hér, það væri of langt mál og hafi treyst þeim fullkomlega sem farið hafa með samningagerð um heilbrigðismál. Sagðist hann ekki hafa velt fyrir sér hverjum sjálfstæðismenn treysta best til að fara með þessi mál. Sagðist sjálfur bera fullt traust til Björns Inga.
Hjalti sagði það vera markmiðið að ná utan um fjölskyldumál með heildarstefnumótun. Sagði m.a. að skoða þurfi systkinaafslátt á milli skólastiga. Hjalti ræddi byggingu íþróttamannvirkja og sagði mikilvægt að næst á eftir sundlaug verði bætt aðstaða til knattspyrnuiðkunar yfir vetrartímann. Hann sagði að samningamál við ríkið um heilbrigðismál hafa verið unnin fyrir opnum tjöldum, þar hafi engu verið leynt. Hjalti ræddi um þjónustusamninginn frá 2003 og taldi samninginn ágætan að mörgu leyti. Hann fjallaði um hliðarsamkomulag sem gert hafi verið eftir þann samning um fullar greiðslur fyrir hjúkrunarrými sem hvergi væri skráð. Ræddi hann ábendingar Ríkisendurskoðunar um þau atriði og hvernig Tryggingastofnun hafi brugðist við með að greiða nú í samræmi við nýtingu hjúkrunarrýma. Hjalti sagðist tilbúinn að vinna með hverjum þeim sem fara munu með samningamál við ríkið. Þá ræddi hann læknamálin og þann vanda sem væri að ráða hingað lækna. Sagði að nú væri í fyrsta skipti horfst í augu við þann vanda og reynt að leysa hann.
Árni ræddi óformlegt samkomulag við ríkið um greiðslu fyrir hjúkrunarrými. Sagði hann að heyrast mundi nú hljóð úr horni yfir skorti á formfestu. Þá ræddi hann ,,þann leik? að láta bæjarráð fjalla um heilbrigðismáli í stað þessa að fá þar til verks ,,hæfan fulltrúa? með góða yfirsýn yfir málið. Þá ræddi hann einnig um hæfi og vanhæfi í sambandi við skipan samninganefndar. Árni sagðist tilbúinn til að heilbrigðismálin væru rædd á hverjum einasta fundi bæjarráðs. Hann sagði að eflaust hafi eitthvað mátt betur fara í þessu samningaferli öllu en málið hafi verið gegnsætt allan tíma og minnihlutinn hafi haft öll tækifæri til að koma að þeim.
Halldóra sagðist játa að hún hafi haft gaman að þessum umræðum, menn hafi ,,komið út úr skápnum?. Sagðist frábiðja sér að heyra það að Björn Ingi hefði ekki traust sjálfstæðismanna. Þá sagðist hún frábiðja sér að talað væri svona um fyrrverandi bæjarstjóra eins og gert hafi verið. Halldóra sagði að fáir af kjörnum fulltrúum hafi mætt á fund sem hér var haldinn með fulltrúa Capacent. Á þeim fundi hafi verið farið yfir læknamálin og þjónustusamninginn. Einnig hafi þessi fulltrúi fjallað um áhyggjur landlæknis sem funda mun hér á morgun. Þar hafi og komið fram góður starfsandi á HSSA sem og góður rekstur stofnunar. Hún ræddi kynningu á sveitarfélaginu og sameiginlegar auglýsingar eftir starfsfólki. Sagði hún meirihlutann nú loksins orðinn tilbúinn til að setjast sameiginlega yfir samningamálin. Halldóra ræddi skipulagsmálin og sagðist taka undir með Reyni að engin ákvörðun hafi verið tekin. Við þurfum að vera með heildarsýn og skýr markmið til framtíðar. Halldóra sagðist aldrei hafa sagt Árna hafa verið vanhæfan til að fjalla um skólastefnu en um stjórnunarþátt grunnskóla hafi hann verið vanhæfur. Það væri sambærilegt við skólastefnuna að hún sæti í samninganefnd um heilbrigðismál, þar væri ekki verið að ræða um kaup og kjör framkvæmdastjóra HSSA.
Hjalti gerði grein fyrir ástæðum umrædds hliðarsamnings.
Árni sagði sjálfstæðismenn mega ráða hvernig þeir skipi sínum málum. Hann furðaði sig á því hvernig Halldóra hafi komið því á framfæri að fyrrverandi bæjarstjóri hafi gert hliðarsamkomulagið. Enginn annar hafi dregið hans persónu inn í umræðuna.
Reynir sagði Birni Inga treyst til allra verka bæði stórra og smárra um það efaðist hann ekki.
Breytingartillaga meirihlutans við tillögu sjálfstæðismanna um heilbrigðis- og öldrunarmál borin undir atkvæði og hún samþykkt með 5 atkvæðum einn er á móti og einn situr hjá
Tillagan borin undir atkvæði með samþykktri breytingatillögu og hún samþykkt samhljóða.
Fundargerð samþykkt samhljóða.
- Bæjarráð Hornafjarðar, 398. fundur, dags. 12. nóvember 2007.
- Atvinnumálanefnd Hornafjarðar, 34. fundur 2. nóvember 2007.
- Heilbrigðis- og öldrunarráð, 85. fundur 24. október 2007.
- Starfshópur um félagslíf grunnskólanema, 3. fundur, 6. nóvember 2007.
- Svæðisráð Vatnajökulsþjóðgarðs, 7. nóvember 2007.
Hjalti ræddi bókun í fundargerð bæjarráðs um framkvæmdastjóra Vatnajökulsþjóðgarðs þar sem lögð er áhersla á að hann verði staðsettur hér. Þá ræddi hann um tillögu svæðisráðs að staðsetningu gestastofu á Stekkanesi sem hann taldi ákaflega heppilega.
Hjalti ræddi góðan árangur nemenda grunnskólans í ?Legókeppninni?. Greindi hann frá því að hann hafi fengið að horfa á sýningu barnanna sem hafi verið ákaflega skemmtileg. Ræddi hann mikilvægi vinnu sem þessarar og hrósaði nemendum og kennurum fyrir.
Halldóra ræddi fundargerð svæðisráðs og benti á að fulltrúi sjálfstæðismanna, Björn Ingi Jónsson, hafi staðið sig mjög vel, taldi nauðsynlegt að benda á það í ljósi fyrri aðdróttana. Hún ræddi staðsetningu yfirstjórnar þjóðgarðsins, sagðist vera sammála því sem þar kemur fram. Fram hafi komið að auglýsa eigi stöðu framkvæmdastjóra þjóðgarðsins og sagðist hafa áhyggjur af því hvar hann ætti að hafa aðsetur, ekki væri komin niðurstaða í því. Það væri góð niðurstaða að staðsetja gestastofuna í Stekkanesi. Þá ítrekaði hún að Björn Ingi nyti fulls trausts. Halldóra ræddi um háhraðatengingar og benti á að um leið og einhver einkaaðili ætlaði sér að bjóða upp á slíkt dytti okkar svæði út úr útboði fjarskiptasjóðs. Lagði hún áherslu á að við byggjum ekki við verri kost en aðrir landsmenn.
Björn Ingi ræddi háhraðanetstengingar og áhuga einstaklinga hér á að setja upp slíkan búnað. Það væri því tvíeggjað þar sem þá dytti svæðið út úr útboði fjarskiptasjóðs. Var hann með efasemdir um að einstaklingar hefðu af slíku fjárhagslegan ávinning.
Árni óskaði nemendum og starfsfólki Grunnskóla Hornafjarðar til hamingju með fyrstu verðlaun í FIRST LEGÓ. Einnig tekur hann undir með Birni Inga um bókun bæjarráðs varðandi háhraðatengingu í dreifbýli. Hann segist ánægður með staðsetningu gestastofu Vatnajökulsþjóðgarð á Stekkanesi. Einnig ræddi hann um að höfuðstöðvar Vatnajökulsþjóðgarð ættu heima hér í sveitarfélaginu. Ræddi hann síðan um fund samgönguráðherra og viðskiptaráðherra hér í gær með byggingar- og skipulagsnefnd í gær og opinn fund Samfylkingarinnar í gær varðandi vegstæði við Hornafjarðarfljót.
Forseti kom með tillögu um að bæjarstjórn geri eftirfarandi bókun bæjarráðs varðandi staðsetningu á höfuðstöðvum Vatnajökulsþjóðgarð sem samþykkt var þann 12. nóv. 2007 að sinni:
Umræða um stofnun Vatnajökulsþjóðgarðs hefur lifað meðal íbúa í Austur-Skaftafellssýslu í um áratug. Sérstaða héraðsins byggir ekki síst á nábýli við Vatnajökul. Sigurður Þórarinsson, jarðfræðingur, skrifaði eitt sinn að það skipti ekki máli fyrir Austur-Skaftfellinga hvaða stjórnarfar ríkti í landinu, hvort það væri þjóðveldi, einveldi eða lýðveldi. Á þeim slóðum ríkti Vatnajökull einn. Saga þess byggðarlags bæri öll merki um glímu mannsins við jökulinn.
Nú eru aðrir tímar. Jökullinn er tekinn að hörfa inn til landsins, tekist hefur að hemja jökulárnar með varnargörðum og tryggja greiðar samgöngur um héraðið. Nábýli við jökulinn felur núna í sér tækifæri sem íbúar vilja nýta til fullnustu.
Uppbygging Vatnajökulsþjóðgarðs er mikilvægur hluti af framtíðarsýn Sveitarfélagsins Hornafjarðar. Þjóðgarðurinn kemur til með auka stórlega möguleika ferðaþjónustu á svæðinu til frekari landvinninga. Rannsóknartækifærum á náttúrunni fjölgar í kjölfar tilkomu þjóðgarðsins sem styrkir þekkingarstarfsemi í sveitarfélaginu. Helsti rökstuðningur bæjarráðs Hornafjarðar fyrir því að staðsetja framkvæmdastjóra þjóðgarðsins í Sveitarfélaginu Hornafirði er að:
Hornfirðingar líta til Vatnajökulsþjóðgarðs sem einn helsta aflvaka í byggðaþróun í héraðinu.
Allar aðstæður fyrir framkvæmdastjóra yfirstjórnar eru til staðar á Hornafirði. Samgöngur til og frá svæðinu eru greiðar. Yfirstjórnin yrði hluti af þeirri starfsemi sem byggst hefur upp í Nýheimum.
Starfsstöð Vatnajökulsþjóðgarðs á Hornafirði er mikilvæg viðbót við þá grósku sem er í rannsóknum og atvinnuþróun í tengslum við ferðaþjónustu, útivist og þjóðgarða á svæðinu.
Með samstarfi Háskólasetursins í Nýheimum og Vatnajökulsþjóðgarðs yrði markvisst sótt fram í að efla fræðslutengda ferðaþjónustu í Vatnajökulsþjóðgarði, efla umhverfisvitund, vinna að samanburðarrannsóknum á þjóðgörðum víðsvegar að í heiminum og byggja upp þekkingargrunn fyrir atvinnustarfsemi sem þrífst innan þjóðgarða víða um heim.
Ferðaþjónusta sunnan Vatnajökuls hefur vaxið umtalsvert á síðustu árum. Stofnun þjóðgarðsins í Skaftafelli, uppbygging á aðstöðu og bætt aðgengi að svæðinu er einn af hornsteinum þessarar þróunar. Á svæðinu er því til staðar mikil þekking á uppbyggingu atvinnulífs í tengslum við þjóðgarða.
Mörg þróunarverkefni í Ríki Vatnajökuls koma til með að styrkja þjóðgarðinn og öfugt. Hægt er að nefna að nú er unnið að gerð göngustíga í Haukafelli á vegum Skógræktar Austur-Skaftafellssýslu, á Heinabergssvæðinu á vegum ferðaþjónustuaðila á Mýrum og Suðursveit, uppbygging vetrarferðamennsku og fuglaskoðun. Stór hluti af samfélaginu á Hornafirði er því vel meðvitaður um gildi þjóðgarðs og mikilvægi hans fyrir þróun byggðar, ferðaþjónustu og útivistar á landinu öllu.
Forseti bar upp eftirfarandi bókun:
Á fundi með starfsmönnum Vegagerðarinnar þann 12. nóv. 2007 kom fram að stofnunin mælir með að farin verði leið 1. Rök Vegagerðarinnar eru þau að umhverfisáhrif þeirrar leiðar séu minnst af þeim leiðum sem eru til skoðunar, leiðin uppfylli einnig öll markmið um umferðaröryggi og greiðfærni.
Þrátt fyrir þessa tillögu Vegargerðarinnar ítrekar bæjarstjórn Sveitarfélagsins Hornafjarðar fyrri afstöðu sína í þessu máli. Bæjastjórn telur það farsælustu lausnina í samgöngumálum Hornfirðinga til framtíðar að ákveðið verði að fara leið 3. Það er sú leið sem kemur til með að styrkja best búsetu og atvinnuskilyrði íbúanna í sveitarfélaginu. Leið 3 styttir vegalegndir innan sveitarfélagsins mest eða um 14,2 km en leið 1 um 10,9 km. Í útreikningum Vegagerðarinnar er áætlað að leið 3 kosti um 2,9 milljarða króna en leið 1 kosti um 2,3 miljarð króna.
Það er skoðun bæjarstjórnar að þegar borinn er saman kostnaður við leið eitt og þrjú sé ekki gætt fulls hlutleysis. Inni í leið eitt er sleppt kostnaði við vegagerð á Mýrum og í Nesjum sem eðlilegt sé að hafa í báðum útfærslum. Þá er einnig horft framhjá ýmsum öryggisþáttum á leið eitt sem gera hana ódýrari í útreikningum Vegagerðarinnar.
Bæjarstjórn Hornafjarðar skorar á ríkisstjórn Íslands að tryggja fjárveitingar til að leggja leið 3. Bæjarstjórn Hornafjarðar er sammála um að forseta bæjarstjórnar verið falið að senda skriflegt erindi til samgönguráðherra og fjármálaráðherra þessu lútandi.
Halldóra Bergljót ræddi um höfuðstöðvar þjógarðsins. Einnig ræddi hún um bréf frá Landhelgisgæslunni varðandi staðsetningu á björgunarþyrlu og spurði um vinnu við verkfallslista.
Björn Ingi sagðist vera sjálfstæðismaður og nyti trausts. Ræddi hann um yfirstjórn Vatnajökulsþjóðgarðs og taldi að það kæmi ekki til greina að hún yrði á höfuðborgarsvæðinu. Þá ræddi hann um veglínuna.
Reynir ræddi um vegamál og taldi að lína Vegagerðarinnar væri ekki endanleg, sagði hann að allar línurnar væru vegtæknilega færar.
Hjalti greindi frá vinnu við verkfallslista. Þá ræddi hann um steypustöðina. Sagðist styðja að hún verði nýtt og rifin að verki loknu. Lagði hann áherslu á að steypan uppfyllti alla staðla og kröfur, það væri mikilvægast.
Bókun um niðurstöður Vegagerðarinnar um val á leið fyrir nýjan veg yfir Hornafjarðarfljót og svæði austan þeirra og vestan borin undir atkvæði og hún samþykkt samhljóða með öllum greiddum atkvæðum.
Bókun um yfirstjórn Vatnajökulsþjóðagarð borin undir atkvæði og hún samþykkt samhljóða með öllum greiddum atkvæðum.
Fundargerð samþykkt samhljóða.
Bæjarstjórn Hornafjarðar, 122. fundur, 1. október 2007 , áður samþykkt.
2. Fjárhagsáætlun 2008 - fyrri umræða (sjá pdf skjal)
Bæjarstjóri fylgdi áætluninni úr hlaði. Helstu niðurstöðutölur við fyrri umræðu eru þessar:
A-hluti:
Skatttekjur bæjarsjóðs eru áætlaðar 1.039,7 m.kr. Rekstur málaflokka eru áætlaður 899,4 m.kr. Mismunur tekna og gjalda A-sjóðs sveitarfélagsins er því afgangur um 126,4 m.kr. Handbært fé frá rekstri 212,6 m.kr., fjárfestingar 550 m.kr., tekin ný langtímalán 200 m.kr., afborganir langtímalána 87,0 m.kr. og handbært fé í árslok 143,6 m.kr.
B-hluti:
Hornafjarðarhöfn: Gert er ráð fyrir að tekjur verði 84,9 m.kr. en rekstrargjöld 74,3 m.kr. Tekjur umfram gjöld verði því um 10.7 m.kr. Fjármagnsgjöld eru 9,2 m.kr. Tekjur umfram gjöld eru því um 1,4 m.kr. Handbært fé frá rekstri 13,3 m.kr., fjárfestingar 39,6 m.kr., tekin ný langtímalán 35 m.kr., afborganir langtímalána 7,4 m.kr. og handbært fé í árslok 2,6 m.kr.
Hornafjarðarveitur: Gert er ráð fyrir að tekjur verði 55,4 m.kr., rekstrargjöld 22,1 m.kr. fjármagnsgjöld eru 19,6 m.kr. Tekjur umfram gjöld verði um 13,7 m.kr. Handbært fé frá rekstri 27,6 m.kr. og fjárfestingar 16,5 m.kr.
Leiguíbúðir: Gert er ráð fyrir að tekjur verði um 23,7 m.kr. en rekstrargjöld um 18,4 m.kr. en nú er í fyrsta skipti gert ráð fyrir afskriftum fastafjármuna 7,5 m.kr. fjármagnsgjöld eru um 17,0 m.kr. gjöld umfram tekjur verði um 11,6 m.kr. Handbært fé frá rekstri 6,1 m.kr. og afborganir langtímalána 8,7 m.kr.
Reynir þakkaði Hjalta greinargóða yfirferð og upplýsingar um fjárhagsáætlun 2008. Lagði hann áherslu á traustan fjárhag og þokkalega gott útlit þó einnig séu blikur á lofti.
Björn Ingi þakkaði fyrir yfirferðina. Hann gerði að umtalsefni þá upphæð sem sett er á launabreytingarreikning, hún væri þyrnir í hans augum. Sagðist vita af lausum kjarasamningum á næsta ári, þ.e. um og eftir mitt ár. Því væri e.t.v. réttara að gera tillögur um þann þátt við endurskoðaða fjárhagsáætlun. Einnig sagði hann liðinn ýmislegt hafa hækkað um helming á milli ára. Þá ræddi hann framlög til gatnagerðar og til gangstétta.
Hjalti þakkaði Birni Inga fyrir gott samstarf við fjárhagsáætlun sem og öðrum sem að henni hafa komið. Sagðist skoða ábendingar Björns Inga um hugsanlega tvítekningu útgjalda til gatna og gangstétta. Hjalti sagðist sammála því að ekki væri gott að áætla nákvæmar launabreytingar á árinu en benti á í því sambandi lausa kjarasamninga. Sagði menn vilja taka frá næga fjarmuni til að gera útkomu ársins sem nákvæmasta.
Halldóra þakkaði bæjarstjóra fyrir hans framsögu sem og starfsfólki fyrir vinnuna. Hún sagðist vera nú fyrst að sjá tölur um næstu ár. Hún sagði sjálfstæðismenn vera sammála um góðan fjárhag sveitarfélagsins. Það stafaði af því að ekki hafi verið farið í ákv. framkvæmdir 2006 og 2007 auk þess sem framlög Jöfnunarsjóðs væru hærri en gert hafi verið ráð fyrir. Þá benti hún á að fjárhagsáætlanir væru stjórntæki þegar samdráttur væri í hagkerfinu. Þá sagði hún okkur heppin með það að forstöðumenn sýndu aðhald í rekstri. Þá fór hún yfir áætlanir um framkvæmdir og hvað hafi verið framkvæmt. Hún ræddi launabreytingareikningalykil og greindi frá samtölum við formann launanefndar sveitarfélaga sem hafi sagt að ekki væri ástæða til að gera ráð fyrir kjarasamningum næsta árs í fjárhagsáætlun 2008. Benti á að samningar væru almennt ekki lausir fyrr en seint á árinu að undanteknum samningum við kennara sem væru lausir um mitt ár. Sagði hún að fulltrúar D-listans áskilji sér rétt til að koma með breytingatillögur við seinni umræðu.
Hjalti ræddi hugmyndafræði og aðgerðir opinberra aðila á samdráttar- eða þenslutímum. Hvaða aðgerða ætti að grípa til á hverjum tíma væru skiptar skoðanir um. Þá ræddi hann hug sinn til að fara í viðræður til umf. Sindra um íþróttamál. Þá ræddi hann drátt á byggingu sundlaugar, svo sem drátt á útboðsgögnum, erfiðleika við grundun sundlaugar og því að borist hafi tilboð í laugina sem ekki hafi verið tekið og það seinkað verkinu. Þá ræddi hann skoðun formanns launanefndar og sagðist ekki skilja fyllilega hvað hann væri að fara. Einnig gerði hann að umtalsefni vinnubrögð launanefndar sem ekki væru hafin yfir gagnrýni. Hjalti sagði kjarasamninga við kennara ekki mega sigla í strand. Sagðist bera þá von í brjósti að samningar við þá tækjust fyrir vorið. Hann sagðist ánægður með hvernig talað var um kennarastéttina á fjármálaráðstefnu sveitarfélaga, þar hefði kveðið við nýjan og jákvæðari tón en oft endranær.
Björn Ingi fagnaði framlagi til björgunarhússins í Öræfum. Það bæri vitni um metnað vegna Vatnajökulsþjóðgarðs og fagnaði hann því.
Halldóra ræddi kjarasamninga og sagði launaáætlanir ættu að geta verið nákvæmar fyrir næsta ár vegna stöðu í kjarasamningum. Þá ræddi hún um Menningarmiðstöð og stefnumótun hennar og óskaði eftir upplýsingum um hvar þess gætti í fjárhagsáætlun sem væri kveðið á um í stefnumótun stofnunarinnar.
Hjalti sagði það koma betur fram í 3ja ára áætlun sem lögð verði fram í desember sem snýr að stefnu Menningarmiðstöðvar og ræddi m.a. sértekjur stofnunarinnar.
Forseti bar upp eftirafandi tillögu að álagningarreglum 2008:
| Útsvar | 13,03% |
| Fasteignaskattur | |
| íbúðarhúsnæði | 0,50% |
| opinberar byggingar | 1,32% |
| atvinnuhúsnæði | 1,62% |
| Lóðarleiga | |
| íbúðarlóðir (af lóðarmati) | 1,00% |
| iðnaðarlóðir (af lóðarmati) | 1,00% |
| aðrar lóðir (af lóðarmati) | 1,00% |
| Holræsagjald | 0,30% |
| Vatnsgjöld | 0,18% |
Forseti bar upp tillögu að álagningarreglum 2008 og voru þær samþykktar samhljóða.
Forseti bar upp tillögu um að vísa fjárhagsáætlun 2008 til seinni umræðu og var það
samþykkt samhljóða.
3. Fyrirspurnir
Engar fyrirspurnir hafa borist.
Fundi slitið kl. 20:53
Tengt efni:
Fjárhagsáætlun 2008 fyrri umræða
