Sumarfrístundir

Uppfærslur koma inn jafnóðum og þær berast

Zajęcia wakacyjne        

Summer Leisure Activities

Á þessari síðu reynum við að halda utan um sumarstarf sem er í boði fyrir börnin í sveitarfélaginu. Við minnum á að hægt er að nýta frístundastyrkinn í mikið af þessu starfi. 

Nýbreytni í barnastarfi sumarsins

Eins og flestir vita þá verða hin hefðbundnu „leikjanámskeið“ Sindra ekki í boði í sumar. Í staðinn hefur sveitarfélagið leitað eftir samstarfi við ýmsa aðila varðandi allskonar námskeið og fjölbreyttar frístundir fyrir börn. Markmiðið er að bjóða upp á fjölbreytt og spennandi starf með ólíkum aðilum og leyfa sem flestum að njóta sín, börnum og fullorðnum. Endanlega niðurröðun námskeiða og fyrirkomulags verður ekki ljóst fyrr en líður á maímánuð. Þá verður dagsskráin auglýst á www.hornafjordur.is og mun öll skráning fara fram í gegnum Abler.
Námskeiðin fyrir 1.-4. bekk verða klukkan 9-12 á morgnana. Boðið verður upp á „gæslu“ eða frístund í Kátakoti milli kl. 8-9 á morgnana og aftur kl. 13-16. Áhersla verður á frjálsan leik og góðan félagsskap í og við Kátakot. Boðið verður upp á fylgd með börnum frá gæslu á námskeiðssvæði á morgnana og á íþróttaæfingar eftir hádegi.
Sumarstarfið í Þrykkjunni fyrir 5.-7. bekk milli kl. 10-15 verður með gjörbreyttu sniði og færist starfsemin að mestu út á svæði aftan við Krónubúðina. Starfið mun byggja á sjálfbærni og sjálfstæðum leik en boðið verður upp á skólagarða, kofabyggð, hjólabraut, sandhauga og ýmislegt fleira. Þetta starf verður einnig auglýst nánar síðar.
Vinnuskólinn verður svo að sjálfsögðu á sínum stað.
Eins og þið sjáið er ýmislegt spennandi í farvatninu og áfram verður tekið við öllum góðum hugmyndum. Saman stuðlum við að fjölbreyttu og uppbyggilegu sumarstarfi.
Frekari upplýsingar gefur Ágústa Margrét Arnardóttir agustam@hornafjordur.is sem leysir Emil Morávek af næstu mánuði sem verkefnastjóri á fræðslu- og frístundasviði.

Ef þú hefur áhuga á að bjóða upp á námskeið eða frístundastarf fyrir börn í sumar, vinsamlegast hafðu samband við fræðslu- og frístundasvið til að fá nánari upplýsingar á netfangið: agustam@hornafjordur.is

---

Til að skrá börnin þarf að fara inn á sportabler.com/shop og skrá sig þar inn. Ef það er íþróttanámskeið hjá Sindra þá er það www.sportabler.com/shop/umfsindri en ef það er gæsla, Tónskóli eða annað á vegum Sveitarfélagsins þá er það www.sportabler.com/shop/hornafjordur