Um Hornafjörð, náttúrulega!
Í lok ársins 2019 ákvað sveitarstjórn Sveitarfélagsins Hornafjarðar að hefja heildarstefnumótun fyrir sveitarfélagið allt með áherslu á heimsmarkmið Sameinuðu þjóðanna. Að stefnumótuninni kom stór hópur úr sveitarfélaginu, kjörnir fulltrúar, starfsmenn sveitarfélagsins auk íbúa og hagsmunaaðila. Hornafjörður, náttúrulega! snýst um að heimsmarkmiðin séu höfð til hliðsjónar í starfi stofnana sveitarfélagsins.
Stefnan var fyrst innleidd árið 2021, en á síðasta ári, 2025, var hún endurskoðuð og uppfærslan samþykkt í bæjarráði 12. febrúar 2026. Markmiðið með endurskoðuninni var að skerpa áherslurnar og gera Hornafjörð, náttúrulega! að markvissara stjórntæki fyrir sveitarfélagið. Ein af meginbreytingum í uppfærðri stefnu er að stoðum hennar hefur verið fækkað úr fjórum í þrjár. Með því er leitast við að einfalda framsetninguna og tryggja skýrari forgangsröðun. Stoðir stefnunnar, eftir endurskoðun, eru nú umhverfi, fólkið og þjónusta, sem mynda grunn að allri stefnumótun sveitarfélagsins.
Umhverfi snýr að sjálfbærni, loftslagsmálum og vernd náttúrunnar. Þar er lögð áhersla á ábyrgari auðlindanýtingu, eflingu hringrásarhagkerfisins og að draga úr úrgangi. Jafnframt er sett fram skýr stefna um að sveitarfélagið stefni að kolefnishlutleysi í eigin starfsemi fyrir árið 2038.
Fólkið tekur til velferðar íbúa og þeirra samfélagslegu innviða sem styðja við heilbrigði, jöfnuð og gott mannlíf. Áhersla er lögð á inngildingu, fjölmenningu og að allir íbúar hafi jöfn tækifæri til þátttöku í samfélaginu. Þá er einnig horft til þess að efla gæði í skóla-, frístunda- og velferðarþjónustu.
Þjónusta fjallar um hvernig sveitarfélagið sinnir hlutverki sínu, bæði gagnvart íbúum og öðrum hagaðilum. Þar er lögð áhersla á faglega, skilvirka og aðgengilega stjórnsýslu, aukna upplýsingagjöf, gagnsæi og áframhaldandi stafræna þróun þjónustunnar.
Framtíðarsýn sveitarfélagsins er áfram hin sama: Sveitarfélagið Hornafjörður á að vera eftirsóknarverður og fjölskylduvænn búsetukostur, þar sem lífsgæði eru í fyrirrúmi, þjónusta er framúrskarandi og nýsköpun blómstrar í sátt við náttúru og samfélag. Markmið sveitarfélagsins er að stefnan styrki sameiginlega sýn íbúa, starfsfólks og stjórnenda um framtíð sveitarfélagsins.
Ef einhverjar spurningar vakna hafið endilega samband við verkefnisstjóra á natturulega@hornafjordur.is .