Breytt fyrirkomulag styrkveitinga Sveitarfélagsins Hornafjarðar
Breytingar hafa verið gerðar á styrkjafyrirkomulagi sveitarfélagsins til að tryggja enn betur jafnræði, gagnsæi og faglega úthlutun fjármagns til samfélagslegra verkefna sem styðja við menningu, íþróttir, frístundir, atvinnuþróun, félagsstarf og fræðslu. Með nýju fyrirkomulagi er umsóknarferli einfaldað og samræmt.
Sameinaður styrktarsjóður
Styrktarsjóðir atvinnu- og menningarmálanefndar og fræðslu- og frístundanefndar hafa nú verið sameinaðir í einn verkefnasjóð sveitarfélagsins og þurfa umsækjendur því ekki að velja milli ólíkra sjóða með sambærilegar áherslur. Innsendar umsóknir verða metnar í sameiningu af nefndunum tveim og áfram verða styrkir afhentir til verkefna og viðburða á breiðum grunni við hátíðlega athöfn á Menningarhátíð sveitarfélagsins. Hér má finna nýjar úthlutunarreglur sjóðsins og hér má finna matsblað sem gott er að miða við við gerð umsóknar.
Rekstrarstyrkir
Athygli er vakin á því að nú hafa rekstrarstyrkir verið teknir út fyrir umsóknarform menningarstyrkja nefndanna en félagasamtök geta óskað sérstaklega eftir rekstrarstyrk til bæjarráðs sveitarfélagsins sem getur veitt starfsmanni umboð til samningagerðar. Þá eru forsendur styrksins metnar út frá fjárhagsstöðu, starfsemi félags og samfélagslegu gildi. Sé samþykkt að veita rekstrarstyrk er gerður samningur við félagið. Með þessu er tryggð samræmd aðkoma bæjarráðs að langtímasamningum og jöfn málsmeðferð fyrir öll félög.
Auglýsingastyrkir
Nýr styrktarsjóður hefur verið settur á laggirnar til að mæta eftirspurn um línu, nafn eða merki sveitarfélagsins í útgefnu efni svo sem tímaritum, söngskrám eða bæklingum hverskonar. Umsóknir um auglýsingastyrki eru opnar allt árið en mat og úthlutun fer fram annan hvern mánuð. Ekki verður tekið við umsóknum um auglýsingastyrki eftir öðrum leiðum hjá stofnunum sveitarfélagsins eða bæjarráði. Hér má finna reglur um auglýsingastyrki sveitarfélagsins en með nýju fyrirkomulagi er tryggt að allar beiðnir um birtingar séu unnar á samræmdan hátt og að jafnræði sé gætt.
Opnað hefur verið fyrir umsóknir
Umsóknarform fyrir verkefnastyrki og auglýsingastyrki hefur þegar verið gert aðgengilegt í íbúagátt sveitarfélagsins sem nálgast má á forsíðu hornafjordur.is.
Nauðsynlegt er að skrá sig inn í íbúagátt með rafrænum skilríkjum og undir umsóknir skal velja 08 Annað og umsókn um verkefnastyrki eða umsókn um auglýsingastyrki.
Umsóknarfrestur í verkefnastyrki nefndanna er til miðnættis 4. janúar 2026 og umsóknarfrestur í auglýsingastyrki er til miðnættis 4. janúar og svo á tveggja mánaða fresti.
Sveitarfélagið hvetur íbúa og félagasamtök til að kynna sér nýtt fyrirkomulag og umsóknarform og leita til starfsmanna ef spurningar vakna.