Framsóknarflokkur og Sjálfstæðisflokkur undirrita málefnasamning
Fulltrúar Framsóknarflokks og Sjálfstæðisflokks í Sveitarfélaginu Hornafirði hafa undirritað málefnasamning um samstarf á komandi kjörtímabili 2026–2030.
Markmið samstarfsins er að efla búsetuskilyrði enn frekar og styrkja samfélagið í heild með ábyrgri uppbyggingu, traustum rekstri og aukinni þjónustu við íbúa.
Í samkomulaginu felst að Hjalti Þór Vignisson sest í stól bæjarstjóra, Gauti Árnason verður formaður bæjarráðs og Ingibjörg Sveinsdóttir forseti bæjarstjórnar.
Næstu ár verða mikilvæg fyrir þróun sveitarfélagsins. Tækifærin eru fjölmörg en jafnframt bíða margvíslegar áskoranir. Áhersla samstarfsflokkanna verður á hag fjölskyldna, lækkun álaga, uppbyggingu innviða og bætta þjónustu um allt sveitarfélagið. Sérstök áhersla verður lögð á að tryggja jafnræði íbúa óháð búsetu og mæta áframhaldandi fólksfjölgun með markvissri uppbyggingu bæði í þéttbýli og dreifbýli.
Flokkarnir leggja ríka áherslu á þjónustumiðaða og skilvirka stjórnsýslu, gott samráð við íbúa og opið samtal á fyrstu stigum mála.
Fræðslu- og frístundamál verða áfram í forgangi. Stefnt er að áframhaldandi uppbyggingu leik-, grunn- og framhaldsskóla, eflingu innra starfs og bættri aðstöðu fyrir íþrótta- og frístundastarf í öllu sveitarfélaginu. Jafnframt verður lögð áhersla á að styrkja list-, verk- og raungreinar.
Í velferðarmálum verður unnið að því að bæta aðgengi að þjónustu, efla lýðheilsu og tryggja að íbúar í dreifbýli njóti sambærilegrar þjónustu og aðrir. Þá vilja flokkarnir taka vel á móti nýjum íbúum og styðja þá til virkrar þátttöku í samfélaginu.
Samstarfið byggir einnig á samþættingu umhverfis-, atvinnu- og menningarmála með það að markmiði að skapa skýrari framtíðarsýn fyrir sveitarfélagið. Áhersla verður lögð á ábyrga nýtingu auðlinda, fjölbreytt atvinnulíf og öflugt menningarlíf sem styrkir sjálfsmynd samfélagsins og aðdráttarafl þess.
Á komandi kjörtímabili verður jafnframt lögð áhersla á öflugt samstarf við ríkisvaldið og aðra opinbera aðila, meðal annars um samgöngur, heilbrigðisþjónustu og hagsmuni heimamanna í tengslum við starfsemi Vatnajökulsþjóðgarðs.
Markmið samstarfsins er skýrt, að gera Sveitarfélagið Hornafjörð að enn betri stað til að búa á og eftirsóknarverðum valkosti fyrir fólk sem vill setjast þar að.
Á myndinni eru frá vinstri: Björgvin Óskar Sigurjónsson, Ingibjörg Sveinsdóttir, Hjalti Þór Vignisson, Gauti Árnason og Hjördís Edda Olgeirsdóttir. Myndina tók Hólmfríður Bryndís Þrúðmarsdóttir