Ný og glæsileg íbúðarbyggð

18.7.2023

Íbúum hefur fjölgað hratt
Í dag er skortur á íbúðarhúsnæði í sveitarfélaginu, ekki síst hér í þéttbýlinu á Höfn. Íbúum hefur fjölgað hratt undanfarin ár og til þess að bregðast við þessari þróun vill bæjarstjórn undirbúa uppbyggingu á íbúðarsvæði í norðurhluta bæjarins sem hefur auðkennið ÍB5 í aðalskipulagi. Frá því að núgildandi aðalskipulag var mótað hafa ýmsar áherslur breyst. Því var afmörkun fyrrgreinds íbúðasvæðis endurskoðað og þéttleiki aukinn. Svæðið sem um ræðir er 9,5 hektarar og að þar verða byggðar á bilinu 175-200 íbúðir.

Áhersla á góðar tengingar við þjónustustofnanir og skólasvæði
Svæðið sem um ræðir er óbyggt í dag. Vestan þess er Hafnarbraut, sem er stofnbraut og aðal aðkomuleið inn í bæinn. Handan Hafnarbrautar og nokkru vestar eru mikilvægar þjónustustofnanir eins og heilsugæsla, leikskóli og kirkja, ásamt íbúðum fyrir aldraða. Góð tenging við þessa þjónustu er því mikilvæg og unnið er að slíkri hönnun. Leið fyrir skólabörn í skóla, íþróttir og sund verður um 0,8 til 1,2 kílómetrar, meðfram Hafnarbraut, en án þess að fara þurfi yfir hana. Nýja íbúðarhverfið mun kalla á stórbættar göngu- og hjóla tengingar meðfram Hafnarbraut austan megin.

Fjölbreyttar íbúðir og tenging við náttúruna
Í deiliskipulagi verða götur og lóðir afmarkaðar og tilgreint hvaða húsagerðir verða á hverri lóð, með áherslu á fjölbreytilegar íbúðir og ferðamáta. Mikilvægt er að innan hverfisins verði skjólsælt og gróðurríkt umhverfi með vistlegum dvalarrýmum. Áhersla verður m.a. lögð á gæði byggðar, tengsl við nærliggjandi náttúru og stígakerfi og tengingar við skóla-, íþrótta- og miðsvæði og umhverfi sem styður við virkan lífsstíl. Lagður verður grunnur að hagkvæmri nýtingu lands í sátt við umhverfi og samfélag.

Hærri byggingar nærri Hafnarbraut
Svæðið verður deiliskipulagt í minnst tveimur áföngum mun fyrsti áfangi leiða í ljós hvaða íbúðargerðir eru eftirsóttastar. Tvær götutengingar verða við Hafnarbraut og ný miðlæg göngutenging fyrir miðju skipulagssvæðinu milli Hafnarbrautar og náttúrustígsins okkar sem liggur meðfram ströndinni. Hærri byggingar, 2-3 hæðir, mynda skjól gagnvart umferð næst Hafnarbraut. Minni þéttleiki og uppbrotið byggðamynstur þróast í átt til austurs og opnar sig í átt að grænum stíg, náttúru og útsýnis.

Fyrstu lóðum úthlutað í lok árs
Sem stendur er unnið að því að undirbúa tillöguna til kynningar og er gert ráð fyrir að skipulagstillögur verði kynntar fyrir íbúum og hagsmunaaðilum í ágúst og september. Þá ætti að verða unnt að staðfesta tillögurnar í nóvember. Þá tekur við hönnun gatna og lagna. Fyrstu lóðirnar ættu því að vera tilbúnar til úthlutunar upp úr næstu áramótum.

Mikil uppbygging í Hornafirði
Það er virkilega spennandi tími framundan hjá okkur hér í Hornafirði og mikil uppbygging í kortunum. Skinney-Þinganes hyggur á fjárfestingu í enn öflugri uppsjávarvinnslu, nýtt og glæsilegt hótel er að rísa á Reynivöllum í Suðursveit og bundnar eru vonir við kröftuga uppbyggingu á aðsetri og höfuðstöðvum Vatnajökulsþjóðgarð í sveitarfélaginu. Þá er undirbúningur fyrir framkvæmdir við Nýjan Miðbæ í fullum gangi. Mörg önnur verkefninu er einnig í farvatninu hjá okkur en umræða um þau, bíður betri tíma.

Áfram Hornafjörður!
Sigurjón Andrésson bæjarstjóri