Atvinnuleysi í Sveitarfélaginu Hornafirði greint frá 2020–2025 – Ný samantekt
Byggða- og nýsköpunarfulltrúi Sveitarfélagsins Hornafjarðar hefur tekið saman yfirlit yfir þróun atvinnuleysis á árunum 2020–2025.
Samantektin sýnir skýrt hvernig atvinnuleysi hefur þróast í kjölfar COVID-faraldursins og hvernig mismunandi atvinnugreinar og svæði innan sveitarfélagsins hafa orðið fyrir áhrifum.
Gögnin eru sett fram á myndrænan og aðgengilegan hátt og greind út frá atvinnugreinum, árstíðasveiflum og póstnúmerum. Markmiðið er að dýpka skilning á þróun atvinnulífsins og veita sveitarfélaginu betri grunn til stefnumótunar.
Helstu niðurstöður samantektarinnar eru:
- COVID-19 hafði mikil áhrif á vinnumarkaðinn – atvinnuleysi náði hámarki í apríl 2020 með yfir 480 skráða atvinnulausa.
- Ferðaþjónusta er langstærsti hluti atvinnuleysis – með árstíðasveiflum sem endurtaka sig ár frá ári, sérstaklega yfir vetrarmánuði.
- Sjávarútvegur er stöðug atvinnugrein – atvinnuleysi þar er yfirleitt á bilinu 1–6 einstaklingar og litlar sveiflur mælast yfir árið.
- Önnur störf (utan ferðaþjónustu og sjávarútvegs) sveiflast minna – en voru stærri hluti atvinnuleysis á ákveðnum tímabilum, sérstaklega sumarið 2022.
- Sterk tenging sést milli gistinátta og atvinnuleysis – þegar ferðamennska eykst dregur úr atvinnuleysi í ferðaþjónustu.
Þessi samantekt er mikilvægur liður í því að efla gagnsæi og dýpka skilning á atvinnulífinu í sveitarfélaginu. Vonast er til að greiningin nýtist í samtali við samfélagið um atvinnulíf, áskoranir og tækifæri framundan.
