Nýtt björgunarskip fagnað með hátíðlegri móttöku og nýrri flotbryggju við Hornafjarðarhöfn
Björgunarskipið Ingibjörg verður lykilþáttur í nútímalegu og öflugu björgunarstarfi á svæðinu.
Hornafjarðarhöfn hefur síðustu vikur unnið af miklum krafti að uppsetningu nýrrar flotbryggju, sem mun gegna lykilhlutverki í framtíðarskipulagi hafnarinnar. Nýja björgunarskipið Ingibjörg mun liggja við þessa bryggju og verður hún því mikilvægur þáttur í öflugu og nútímalegu björgunarstarfi á svæðinu. Bryggjan er útbúin öllum helstu innviðum sem nauðsynlegir eru til að tryggja skilvirka þjónustu við skipið, þar á meðal rafmagnstengingar og vatnslagnir.
Björgunarfélag Hornafjarðar ætlar að fagna komu nýja björgunarskipsins Ingibjargar með hátíðlegri móttöku við höfnina. Heimamönnum og gestum er boðið að taka þátt í þessum merku tímamótum og sameinast um að bjóða skipið velkomið til hafnar.
Áætlað er að Ingibjörg sigli inn til hafnar klukkan 12:00 á morgun 12.júlí. Við móttöku skipsins verða flutt stutt ávörp og í kjölfarið mun prestur blessa skipið formlega.
Að blessun lokinni gefst gestum kostur á að
skoða skipið, bæði að innan sem utan. Slökkvilið Hornafjarðar verður til staðar
og tekur þátt í dagskránni og Slysavarnadeildin býður upp á veitingar til að
skapa hlýlegt og samfélagslegt andrúmsloft á bryggjunni.
Hlökkum til að sjá ykkur!